ភ្នំពេញ: កម្ពុជាបាននាំចេញកៅស៊ូចំនួន ២៧ ៤៤៥ តោន ដែលមានតម្លៃ ៤០ លានដុល្លារ នៅខែមករា ឆ្នាំ ២០២០ កើនឡើង ១៧ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមមន្ត្រីជាន់ខ្ពស់អគ្គនាយកដ្ឋានកៅស៊ូ។
លោក ឃួន ផល្លា ប្រធានរដ្ឋបាល និងនីតិកម្មនៃអគ្គនាយកដ្ឋានកៅស៊ូបានប្រាប់ភ្នំពេញប៉ុស្តិ៍កាលពីម្សិលមិញថា កំណើននៃការនាំចេញនេះដោយសារតម្រូវការកៅស៊ូសកលកើនឡើង។ លោកបន្តថា ការកើនឡើងនៃចំនួនដើមកៅស៊ូចៀរជ័រក៏បានជំរុញឲ្យបរិមាណនាំចេញកើនឡើងផងដែរ។
លោកបន្ថែមថា ប្រទេស ចិន ជាទីផ្សារធំសម្រាប់កៅស៊ូកម្ពុជានាពេលបច្ចុប្បន្ននេះ។ តម្លៃកៅស៊ូជាមធ្យម ១ ៤៣៣ ដុល្លារក្នុង ១ តោន កាលពីខែមុនកើនឡើង ២០៧ ដុល្លារក្នុង ១ តោនបើធៀបនឹងខែធូឆ្នាំមុន។ លោកថ្លែងថា៖ «ខ្ញុំរំពឹងថាតម្លៃកៅស៊ូនឹងបន្តកើនឡើងបន្តទៀតនៅក្នុងរយៈពេល ២-៣ ខែខាងមុខ»។
លោក ហេង ស្រេង អ្នកចាត់ការទូទៅក្រុមហ៊ុនចម្ការកៅស៊ូបឹងកេតនៅខេត្តកំពង់ចាមដែលដាំដុះលើផ្ទៃដី ៤ ៥០០ ហិកតាបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា តម្រូវការទីផ្សារកៅស៊ូបានកើនឡើងកាលពីខែមុន។
លោកថ្លែងថា៖ «បច្ចុប្បន្នខ្ញុំមើលឃើញថា ទីផ្សារកៅស៊ូកំពុងមានស្ថានភាពល្អប្រសើរ ដោយសារទីផ្សារអន្តរជាតិកំពុងមានតម្រូវការខ្ពស់»។ លោកបន្ថែមថាតម្លៃកៅស៊ូជាមធ្យមចន្លោះពី ១ ៣៥០ ដុល្លារ ទៅ ១ ៥០០ ដុល្លារ នៅពេលនេះ។ លោកបន្តថាកាលពីឆ្នាំមុន ក្រុមហ៊ុនលោកបាននាំចេញកៅស៊ូប្រមាណ ៧ ០០០ តោន ទៅកាន់ទីផ្សារអន្តរជាតិ។ លោកបញ្ជាក់ថា៖ «ខ្ញុំសង្ឃឹមថាតម្លៃកៅស៊ូនឹងនៅថេរនៅឆ្នាំនេះ»។
កម្ពុជាបាននាំចេញកៅស៊ូចំនួន ២៨២ ០៧១ តោន ដែលមានតម្លៃ ៣៧៧ លានដុល្លារ កាលពីឆ្នាំមុនកើនឡើង ៣០ ភាគរយ បើធៀបនឹងឆ្នាំ ២០១៨។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។ ទិន្នន័យនេះបង្ហាញទៀតថា ផ្ទៃដីដាំកៅស៊ូនៅកម្ពុជាសរុប ៤០៦ ១៤២ ហិកតា កាលពីឆ្នាំមុនក្នុងនោះកៅស៊ូជាង ២៤៧ ១១៤ ហិកតា ត្រូវបានប្រមូលផល។
លោក គូរ ផល្លី នាយករងនៃអគ្គនាយកដ្ឋានអភិវឌ្ឍន៍កៅស៊ូបានឲ្យដឹងកាលពីដើមខែនេះថា អគ្គនាយកដ្ឋានកៅស៊ូបានប្រកាសពីការសិក្សាស្រាវជ្រាវរួមមួយលើដំណាំកៅស៊ូលក្ខណៈគ្រួសារក្នុងខេត្តចំនួន ៣ ដើម្បីស្វែងយល់ពីការដាំដុះឆ្លើយតបនឹងការធ្លាក់ចុះតម្លៃកៅស៊ូក្នុងរយៈពេលជាង ៩ ឆ្នាំកន្លងមក។
លោកបន្តថា ការសិក្សាស្រាវជ្រាវនេះផ្តោតលើចម្ការកៅស៊ូលក្ខណៈគ្រួសារក្នុងខេត្តដាំដុះកៅស៊ូសំខាន់ៗគឺស្រុកស្ទឹងត្រង់ ខេត្តកំពង់ចាម ស្រុកស្នួល ខេត្តក្រចេះ និងស្រុកបកែវ ខេត្តរតនគិរី៕LA