The Phnom Penh Post Search

Search form




Logo of Phnom Penh Post newspaper Phnom Penh Post - ការនាំចេញ​គ្រាប់ស្វាយចន្ទី​របស់​កម្ពុជា​នៅ​ឆ្នាំ​ ២០១៩ ​កើនឡើង​ជិត​ ១០០ ​ភាគរយ ខណៈ​គុណភាព​កាន់តែ​ល្អ

ការនាំចេញ​គ្រាប់ស្វាយចន្ទី​របស់​កម្ពុជា​នៅ​ឆ្នាំ​ ២០១៩ ​កើនឡើង​ជិត​ ១០០ ​ភាគរយ ខណៈ​គុណភាព​កាន់តែ​ល្អ

Content image - Phnom Penh Post
ប្រជាពលរដ្ឋ​នៅក្នុង​សហគមន៍​ស្វាយចន្ទី​ខេត្តកំពង់ធំ​លើក​គ្រាប់ស្វាយចន្ទី​ចាក់​ស្រុស​កាលពី​ពេល​កន្លងមក​។ ហុង មិនា

ការនាំចេញ​គ្រាប់ស្វាយចន្ទី​របស់​កម្ពុជា​នៅ​ឆ្នាំ​ ២០១៩ ​កើនឡើង​ជិត​ ១០០ ​ភាគរយ ខណៈ​គុណភាព​កាន់តែ​ល្អ

ភ្នំពេញៈ របាយការណ៍​របស់​ក្រសួង​កសិកម្ម រុក្ខាប្រមាញ់ និង​នេសាទ​បាន​ឲ្យ​ដឹងថា ប្រទេស​ កម្ពុជា​ បាន​នាំចេញ​គ្រាប់ស្វាយចន្ទី​ប្រហែល ២០២ ៣១៨ តោន​កាលពី​ឆ្នាំមុន​ទៅ​ទីផ្សារ​បរទេស​កើនឡើង​ជិត​ ១០០ ​ភាគរយ​ ធៀប​នឹង​ឆ្នាំ​ ២០១៨ ដែលមាន​ចំនួន​ប្រហែល​ ១០១ ៩៧៣ ​តោន​។

លោក ខាន់ សំបាន ប្រធាន​នាយកដ្ឋាន​កសិឧស្សាហកម្ម​ក្រសួងកសិកម្ម រុក្ខាប្រមាញ់ និង​នេសាទ​បាន​ប្រាប់​ភ្នំពេញប៉ុស្ដិ៍​ថា ការនាំចេញ​សរុប​បង្ហាញ​ពី​កំណើន​ដ៏រឹងមាំ ដោយសារ​តែ​ក្រសួង​បាន​កាត់បន្ថយ​ភាពស្មុគស្មាញ​មួយចំនួន​នៃ​បែបបទ​នាំចេញ ហើយ​គ្រាប់ស្វាយចន្ទី​បាន​កែលម្អ​ស្ដង់ដា​។ លោក​បាន​បន្តថា​៖ «​យើង​មើលឃើញថា គ្រាប់ស្វាយចន្ទី​របស់​យើង​មាន​រសជាតិ និង​គុណភាព​ល្អ ដូច្នេះ​យើង​មាន​តម្រូវការ​កាន់តែ​ច្រើន​ពី​ប្រទេសក្រៅ​»​។

លោក​រំពឹងថា តម្លៃ​គ្រាប់ស្វាយចន្ទី​ត្រូវ​បាន​លក់​ប្រហែល ៥ ០០០ ឬ ៦ ០០០ ​រៀល​ ក្នុង​ ១ ​គីឡូក្រាម​ នៅ​ដើមរដូវ​ប្រមូលផល​នៅ​ឆ្នាំនេះ​។ លោក​បន្តថា​៖ «​យើង​បាន​មើលឃើញ​ទិន្នផល​គ្រាប់ស្វាយចន្ទី​កើនឡើង​ដោយសារ​តែ​ការដាំដុះ​កើនឡើង​»​។ របាយការណ៍​បាន​ពី​ក្រសួង​បង្ហាញថា ទិសដៅ​នាំចេញ​គ្រាប់ស្វាយចន្ទី​សំខាន់ៗ​របស់​កម្ពុជា​គឺ​ប្រទេស​វៀតណាម រុស្ស៊ី កូរ៉េខាងត្បូង ចិន ប៉េរូ មីយ៉ាន់ម៉ា ឥណ្ឌា អូស្ដ្រាលី កោះ​តៃវ៉ាន់ សិង្ហបុរី និង​ម៉ាឡេស៊ី​។

Content image - Phnom Penh Post
កសិករ​ក្នុង​សហគមន៍​ស្វាយចន្ទី​នៅ​ខេត្តកំពង់ធំ​បង្ហាញ​គ្រាប់​ចន្ទី​នៅ​សិប្បកម្ម​កែច្នៃ​កន្លងមក ។ ហុង មិនា

ផ្ទៃដី​សរុប​នៃ​ការដាំដុះ​ស្វាយចន្ទី គឺ ១៤៩ ៦៦០ ​ហិកតា ទូទាំងប្រទេស​។ ជិត​ ៦០ ​ភាគរយ ​ត្រូវ​បាន​ប្រមូលផល​ដែល​អាច​ផ្ដល់​ទិន្នផល​ ១១៦ ៣៤៣ ​តោន កាលពី​ឆ្នាំមុន​។ នេះ​បើ​យោងតាម​តួលេខ​របស់​ក្រសួង​កសិកម្ម រុក្ខាប្រមាញ់ និង​នេសាទ​។

ក្រសួងកសិកម្ម​កម្ពុជា និង​សមាគម​ស្វាយចន្ទី​វៀតណាម (Vinacas) បាន​ចុះហត្ថលេខា​លើ​អនុស្សរណៈ​នៃ​ការយោគយល់​គ្នា (MoU) កាលពី​ឆ្នាំ​ ២០១៨ ដើម្បី​បង្កើន​ការនាំចេញ​គ្រាប់ស្វាយចន្ទី​របស់​កម្ពុជា​ដល់​ ១ ​លាន​តោន​ត្រឹម​ឆ្នាំ​ ២០២៨​។ Vinacas ក៏បានផ្ដល់​ដល់​ក្រសួង​នូវ​ជំនួយ​ឥតសំណង ៦៦ ០០០ ​ដុល្លារ​ ដើម្បី​គាំទ្រ​ដល់​គម្រោង​ដូចគ្នានេះ​។

ប្រទេស​កម្ពុជា​អាច​ផលិត​គ្រាប់ស្វាយចន្ទី​បាន​ប្រមាណ​ ១ ​តោន ​ក្នុង​ផ្ទៃដី​ដាំដុះ​ ១ ​ហិកតា ខណៈ​វៀតណាម​អាច​ផលិត​បាន​ជាង​ ២ ​តោន​។

HEKS/EPER ជា​អង្គការ​មិនមែន​រដ្ឋាភិបាល​ដែល​គាំទ្រ​ដោយ​ប្រទេស​ ស្វ៊ីស​ បាន​ប្រកាស​កាលពី​ឆ្នាំ​ ២០១៨ ​ថា ខ្លួន​បាន​ដំណើរការ​គម្រោង​រយៈពេល​ ៥ ​ឆ្នាំ ជាមួយ​នឹង​មូលនិធិ​ ៧,៨ ​លាន​ដុល្លារ សម្រាប់​គ្រាប់ស្វាយ​ចន្ទី​នៅក្នុង​ប្រទេស​កម្ពុជា ដោយ​មាន​គោលដៅ​កែលម្អ​ជីវភាព​រស់នៅ​របស់​គ្រួសារ​ជនបទ​។

គម្រោង​ដែល​នឹងត្រូវ​បាន​អនុវត្ត​នៅ​ចន្លោះ​ឆ្នាំ​ ២០១៨ ដល់​ឆ្នាំ​ ២០២២ ត្រូវបាន​រំពឹងថា​នឹង​បង្កើន​សន្ដិសុខ​ស្បៀងអាហារ ប្រាក់ចំណូល និង​ការគ្រប់គ្រង​ដី​សម្រាប់​សហគមន៍​ក្រីក្រ​។ គម្រោង​នេះ​នឹង​ត្រូវបាន​អនុវត្ត​ក្នុង​ខេត្ត​ ៧ គឺ​ពោធិ៍សាត់ កំពង់ឆ្នាំង ព្រៃវែង ត្បូងឃ្មុំ ក្រចេះ មណ្ឌលគិរី និង​ស្ទឹងត្រែង​៕ LA

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។