ភ្នំពេញៈ ការនាំចេញដំឡូងមីរបស់កម្ពុជាក្នុងឆ្នាំ ២០១៩ មានជាង ៣,២៩ លានតោន កើន ២៧ ភាគរយ បើធៀបនឹងឆ្នាំ ២០១៨ ដែលមាន ២,៥៩ លានតោន។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលើកឡើងលើទំព័រហ្វេសប៊ុកផ្លូវការរបស់លោកថា ការនាំចេញផលិតផលកសិកម្មគ្រប់មុខសរុបមាន ៦,៩៣ លានតោន ក្នុងឆ្នាំ ២០១៩ ដោយ បានប៉ាន់ប្រមាណថា មានតម្លៃប្រហែល ១,៩ ពានលានដុល្លារ។
លោក ហេង សិទ្ធិ មន្ត្រីមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបងបានប្រាប់ភ្នំពេញប៉ុស្តិ៍ថា ក្នុងឆ្នាំ ២០១៩ កសិករបានដាំដំឡូងមីក្នុងខេត្តនេះលើផ្ទៃដី ១១២ ៥៤៣ ហិកតា ដោយទទួលបានទិន្នផលជាង ២,៨ លានតោន។ លោកថ្លែងថា៖ «សព្វថ្ងៃកសិករកំពុងប្រមូលផលដំឡូងបានក្នុងរង្វង់ ៤០ ភាគរយ នៃផលដំណាំដំឡូងមីសរុប។ ដំឡូងមីស្រស់មានតម្លៃជាមធ្យម ២៧០ រៀលក្នុង ១ គីឡូក្រាមនៅដើមឆ្នាំនេះ»។
តាមរបាយការណ៍អង្គការ UNDP ការអភិវឌ្ឍក្នុងវិស័យដំឡូងមីកម្ពុជាត្រូវការកញ្ចប់ថវិកា វិនិយោគសាធារណៈចំនួន ២៩៦ លានដុល្លារ ខណៈការអភិវឌ្ឍក្នុងវិស័យនេះភាគច្រើនមិនទាន់យកចិត្តទុកដាក់ខ្ពស់លើការកែច្នៃក្នុងប្រទេស។ របាយការណ៍ក្រសួងកសិកម្មបង្ហាញថា ការនាំចេញភាគច្រើនទៅថៃ វៀតណាម និងចិន។
តាមទិន្នន័យក្រសួងពាណិជ្ជកម្មការនាំចេញដំឡូងមីរបស់កម្ពុជាមានតម្លៃ ១៧,៨ លានដុល្លារ ក្នុងឆ្នាំ ២០១៧ ខណៈការនាំចេញនៅឆ្នាំ ២០១៨ បានធ្លាក់ចុះមកត្រឹម ១២,៦ លានដុល្លារ។ ទិន្នន័យក្រសួងកសិកម្មបង្ហាញថាកាលពីឆ្នាំ ២០១៨ បរិមាណផលដំឡូងមីនៅកម្ពុជាមានចំនួន ១៣ ៧៥០ ០៧៦ តោន ធ្លាក់ចុះបន្តិចពី ១៣ ៨១៧ ២៦២ តោនកាលពីឆ្នាំ ២០១៧៕ LA