.jpg)
កម្មកររៀបចំជញ្ជូនកញ្ចប់ទំនិញចូលក្នុងកុងតឺន័រសម្រាប់ការនាំចេញ។ រូបថត AFP
ក្រុងបាងកកៈ ការនាំចេញរបស់ប្រទេសថៃបានបន្តកើនឡើងនៅខែមីនា បើទោះបីជាសម្រេចបានកំណើនកាន់តែទាបក្តី ដោយបានជួយឲ្យការនាំចេញនៅត្រីមាស-ទី ១ កើនឡើង ១១,៣ ភាគរយ ដែលជាកំណើនខ្ពស់បំផុតក្នុងរយៈពេល ៧ ឆ្នាំ។
ក្រសួងពាណិជ្ជកម្មថៃបានរាយការណ៍កាលពីថ្ងៃចន្ទថា ការនាំចេញដែលត្រូវបានទូទាត់នៅនាយកដ្ឋានគយរបស់ប្រទេសថៃបានកើនឡើងក្នុងរយៈពេល ១៣ ខែជាប់គ្នា គិតត្រឹមខែមីនាដោយបានកើនឡើង ៧,០៦ ភាគរយធៀបនឹងរយៈពេលដូចគ្នាកាលពីឆ្នាំមុន បន្ទាប់ពីបានកើនឡើង ១០,៣ ភាគរយកាលពីខែកុម្ភៈ។
ការនាំចេញកាលពីខែមីនាបាននាំមកនូវថវិកាចំនួន ២២,៤ ពាន់លានដុល្លារ (៧០៦ ពាន់លានបាត) មកប្រទេសថៃវិញ ដោយបាននាំមុខដោយការនាំចេញកាន់តែខ្ពស់សម្រាប់រថយន្ត និងគ្រឿងបន្លាស់រថយន្ត កុំព្យូទ័រ និងគ្រឿងបន្លាស់ ផលិតផលកៅស៊ូ គ្រាប់ប្លាស្ទិក ព្រមទាំងម៉ាស៊ីនត្រជាក់ និងគ្រឿងបន្លាស់។
ការនាំចូលនៅខែមីនាបានកើនឡើង ៩,៤៧ ភាគរយធៀបនឹងរយៈដូចគ្នាកាលពីឆ្នាំមុនដល់ ២១,១ ពាន់លានដុល្លារ បន្ទាប់ពីបានកើនឡើង ១៦ ភាគរយនៅខែកុម្ភៈ។ កំណើននេះបានធ្វើឲ្យមានអតិរេកពាណិជ្ជកម្មចំនួន ១,២៧ ពាន់លានដុល្លារនៅខែមីនា។
លោក Pimchanok Vonkorpon អគ្គនាយកការិយាល័យគោលនយោបាយ និងយុទ្ធសាស្ត្រពាណិជ្ជកម្មបានឲ្យដឹងថា៖ «ការនាំចេញបានកើនឡើងចំពោះទីផ្សារទាំងអស់លើកលែងតែទីផ្សារប្រទេសចិន ដែលបានធ្លាក់ចុះ ៨,៧ ភាគរយធៀបនឹងរយៈពេលដូចគ្នាកាលពីឆ្នាំមុនដោយសារមូលដ្ឋានកំណើនខ្ពស់កាលពីឆ្នាំមុន»។
លោកបានបន្តឲ្យដឹងថាការនាំចេញខ្ពស់បំផុតនៅខែមីនាគឺទៅកាន់ប្រទេសឥណ្ឌាដោយបានកើនឡើង ២១,៧ ភាគរយតំបន់អាស៊ានកើនឡើង ១៧,៨ ភាគរយ និងតំបន់អាស៊ីខាងត្បូងកើនឡើង ១៦,៩ ភាគរយ។ ទន្ទឹមនឹងនោះដែរប្រទេសថៃបានមើលឃើញកំណើននាំចេញខ្ពស់ទៅកាន់សហរដ្ឋអាមេរិក ដោយបានកើនឡើង ១១,១ ភាគរយ តំបន់មជ្ឈិមបូព៌ាបានកើនឡើង ១០,៦ ភាគរយសហភាពអឺរ៉ុបកើនឡើង ៨,៧ ភាគរយ និងការនាំចេញទៅប្រទេសអូស្ត្រាលីកើនឡើង ៦,២ ភាគរយ។
ក្នុងរយៈពេល ៣ ខែដំបូងក្នុងឆ្នាំនេះការនាំចេញបានកើនឡើង ១១,៣ ភាគរយធៀបនឹងរយៈពេលដូចគ្នាកាលពីឆ្នាំមុនដល់ ៦២,៨២ ពាន់លានដុល្លារ ដោយការនាំចូលបានកើនឡើង ១៦,២ ភាគរយធៀបនឹងរយៈពេលដូចគ្នាកាលពីឆ្នាំមុនដល់ ៦០,៩ ពាន់លានដុល្លារ។ ប្រទេសថៃបានរីករាយនឹងអតិរេកពាណិជ្ជកម្ម ១,៩៥ ពាន់លានដុល្លារក្នុងត្រីមាសទី ១។
ទោះជាប្រាក់បាតមានតម្លៃខ្ពស់ក្តីក្រសួងពាណិជ្ជកម្មកំណត់ទិសដៅកំណើននាំចេញ ៨ ភាគរយក្នុងឆ្នាំនេះ បន្ទាប់ពីកើន ៩,៩ ភាគរយនៅឆ្នាំមុន៕ BP
