.jpg)
សកម្មភាពក្រុមកម្មករកំពុងសម្អាតសម្បុកសត្វត្រចៀកកាំ។ រូបថត ហេង ជីវ័ន
ភ្នំពេញៈ ផែនការនាំចេញផលិតផលទឹកមាត់ត្រចៀកកាំពីកម្ពុជាទៅប្រទេសចិនដែលរំពឹងថានឹងអាចកើតឡើងផ្លូវការនៅចុងឆ្នាំ ២០២០ នេះអាចនឹងត្រូវពន្យារពេល ខណៈដែលនីតិវិធី និងការបំពេញព័ត៌មានដែលភាគីចិនបញ្ជូនមកនៅមានភាពស្មុគស្មាញជាច្រើន។ នេះបើតាមមន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ផែនការនាំចេញផលិតផលទឹកមាត់ត្រចៀកកាំទៅកាន់ទីផ្សារប្រទេសចិនជាផ្លូវការនៅចុងឆ្នាំ ២០២០ នេះប្រហែលជាមិនអាចធ្វើទាន់ពេលវេលាទេ ព្រោះឯកសារដែលអាជ្ញាធរចិនផ្ញើមកឲ្យកម្ពុជាបំពេញ គឺមានភាពស្មុគស្មាញដែលទាមទារឲ្យមានការសិក្សាបន្ថែមទៀត។
លោកបន្តថា ម្យ៉ាងទៀតព័ត៌មានមួយចំនួនដែលក្រសួងបញ្ចូលទៅឲ្យផ្នែកឯកជនជួយបំពេញក៏មិនទាន់មានលក្ខណៈគ្រប់ជ្រុងជ្រោយតាមការចង់បាននោះដែរ។ លោកថ្លែងថា៖ «មកដល់ពេលនេះយើងមិនទាន់ដឹងថាបែបណាទេ ព្រោះការបំពេញសំណួរនៅមិនទាន់ចប់»។
ទោះយ៉ាងណាលោក ងិន ឆាយ បញ្ជាក់ថាក្រុមការងារជំនាញរបស់កម្ពុជាកំពុងខិតខំយ៉ាងខ្លាំងដើម្បីជំរុញការងារនេះឲ្យបានលឿន ព្រោះចិនគឺជាទីផ្សារទឹកមាត់ត្រចៀកាំធំជាងគេលើពិភពលោក។
មកដល់ពេលនេះកម្ពុជាមានផលិតផលកសិកម្ម ៤ មុខគត់ដែលត្រូវបានអនុញ្ញាតជាផ្លូវការឲ្យនាំទៅប្រទេសចិនរួមមាន ពោត ដំឡូងមី អង្ករ និងចេក ខណៈកំពុងចរចានាំចេញផលិតផលផ្សេងៗទៀតមានដូចជា ទឹកមាត់ត្រចៀកកាំ ស្វាយ ម្រេច ស្រកានាគ តាង៉ែន និងដូងក្រអូប។
លោក ណាង សុធី ប្រធានសហព័ន្ធសម្បុកត្រចៀកកាំកម្ពុជាបានប្រាប់ថា បើតាមព័ត៌មានដែលលោកដឹងគឺការនាំចេញទឹកមាត់ត្រចៀកាំជាផ្លូវការទៅចិននឹងមិនកើតមាននៅក្នុងឆ្នាំនេះទេ ព្រោះលក្ខខណ្ឌដែលអាជ្ញាធរចិនកំណត់មកគឺមានភាពតឹងរ៉ឹង និងស្មុគស្មាញច្រើន។ លោកបានបន្តថា បើទោះជាកម្ពុជាបំពេញឯកសាររួចរាល់ក៏កម្ពុជាត្រូវមានកិច្ចការ ជាច្រើនទៀតត្រូវធ្វើដែរ។
លោកនិយាយថា៖ «ខ្ញុំមិនរំពឹងថា ការនាំចេញទឹកមាត់ត្រចៀកកាំជាផ្លូវការទៅប្រទេសចិនអាចកើតឡើងនៅចុងឆ្នាំទេ»។
លោកបន្តថា ក្នុងនាមសហព័ន្ធ លោកពិតជាចង់ឃើញផលិតផលទឹកមាត់ត្រចៀកកាំកម្ពុជាត្រូវបាននាំចេញជាផ្លូវការទៅកាន់ប្រទេសចិនណាស់ បើទោះបីជាបច្ចុប្បន្នមានការនាំចេញក្រៅផ្លូវការខ្លះទៅកាន់ទីនោះហើយក៏ដោយ។ លោកថ្លែងថា៖ «នៅពេលមានទីផ្សារប្រទេសចិនជាផ្លូវការ វានឹងជួយធ្វើឲ្យអ្នកចិញ្ចឹមកាន់តែមានទំនុកចិត្ត ហើយការសម្រិតសម្រាំងគុណភាព និងតម្លៃក៏អាចមានស្ថិរភាពល្អដែរ»។
ទាក់ទងនឹងទីផ្សារទឹកមាត់ត្រចៀកកាំនាពេលនេះលោក សុធី អះអាងថា ការរីករាលដាលនៃជំងឺកូវីដ ១៩ បានធ្វើឲ្យទីផ្សារទឹកមាត់ត្រចៀកកាំកម្ពុជាទទួលរងផលប៉ះពាល់យ៉ាងដំណំ។
លោកលើកឡើងថា បច្ចុប្បន្នសម្បុកត្រចៀកកាំមិនទាន់សម្អាតមានតម្លៃជាមធ្យម ៦៥០ ដុល្លារក្នុង ១ គីឡូក្រាម រីឯសម្បុកដែលសម្អាតរួចមានតម្លៃចន្លោះពី ១ ៥០០ ដុល្លារ ដល់ ៣ ០០០ ដុល្លារ អាស្រ័យទៅលើគុណភាព។ លោកនិយាយថា៖ «កូវីដបានធ្វើឲ្យការលក់ធ្លាក់ចុះជិត ៥០ ភាគរយ ចំណែកតម្លៃធ្លាក់ចុះក្នុងរង្វង់ ១៥ ភាគរយធៀបនឹងមុនពេលការផ្ទុះឡើងរបស់កូវីដ ១៩។
គុណភាពសម្បុកត្រចៀកកាំកម្ពុជាត្រូវបានគេទទួលស្គាល់ជាអន្តរជាតិថា មានគុណភាពល្អ ព្រោះកម្ពុជាមានតំបន់ធម្មជាតិច្រើនដោយមិនសូវមានឧស្សាហកម្មធំៗដែលបញ្ចេញផ្សែងនាំឲ្យសម្បុកត្រចៀកកាំមិនល្អ។
លោក សំ សិរីរតន៍ រដ្ឋលេខាធិការក្រសួងពាណិជ្ជកម្មកន្លងមកបាននិយាយថា ការទទួលបានកិច្ចព្រមព្រៀងនាំចេញទឹកមាត់ត្រចៀកកាំពីកម្ពុជាទៅកាន់ប្រទេសចិននឹងផ្តល់អត្ថប្រយោជន៍យ៉ាងច្រើនសម្រាប់កម្ពុជា ព្រោះចិនគឺជាប្រទេសដែលមានតម្រូវការទឹកមាត់ត្រចៀកកាំច្រើនជាងគេលើពិភពលោក។ លោកថា៖ «ចិនជាទីផ្សារធំ និងមិនចេះរីងស្ងួតសម្រាប់ទីផ្សារទឹកមាត់ត្រចៀកកាំ»។
យោងតាមការចុះផ្សាយរបស់ភ្នំពេញ- ប៉ុស្តិ៍កាលពីឆ្នាំ ២០១៦ បានឲ្យដឹងថា តម្លៃពាណិជ្ជកម្មសម្បុកត្រចៀកកាំនៅទូទាំងពិភពលោកត្រូវបានប៉ាន់ប្រមាណថា មានចំនួន ៥ ពាន់លានដុល្លារក្នុង ១ ឆ្នាំ។ ចិនគឺជាទីផ្សារធំជាងគេ ខណៈឥណ្ឌូនេស៊ី និងម៉ាឡេស៊ីគឺជាប្រទេសផ្គត់ផ្គង់ឈានមុខគេក្នុងពិភពលោក។
បើតាមប្រធានសហព័ន្ធសម្បុកត្រចៀកកាំកម្ពុជាត្រចៀកកាំកម្ពុជាក្នុង ១ ឆ្នាំមានតម្លៃពី ៥០ ទៅ ១០០ លានដុល្លារ៕ LA
