.jpg)
សកម្មភាពក្រុមកម្មការិនីនៅក្នុងរោងចក្រកាត់ដេរមួយក្នុងរាជធានីភ្នំពេញ។ ភ្នំពេញប៉ុស្តិ៍
ភ្នំពេញៈ ការនាំចេញរបស់កម្ពុជាទៅអាមេរិកបានកើនជាង ៤២ ភាគរយ ក្នុងរយៈពេល ៣ ខែដំបូងឆ្នាំ ២០២០ នេះ ទោះបីអ្នកផលិតមួយចំនួននៅកម្ពុជាកំពុងរងផលប៉ះពាល់ពីការផ្អាកការបញ្ជាទិញពីអាមេរិកក្នុងអំឡុងពេលមានរីករាលដាលជំងឺកូវីដ ១៩ ក៏ដោយ។
របាយការណ៍ពីការិយាល័យជំរឿនអាមេរិកបានឲ្យដឹងថា ការនាំចេញរបស់កម្ពុជាសម្រេចបាន ១ ៥៩៤,៤ លានដុល្លារ ក្នុងត្រីមាសទី ១ ឆ្នាំនេះកើនឡើង ៤២,២៩ ភាគរយ ធៀបនឹងរយៈពេលដូចគ្នាកាលពីឆ្នាំមុនដែលមានចំនួន ១ ១២០,៥ លានដុល្លារ។
ទិន្នន័យនេះឲ្យដឹងទៀតថា ការនាំចូលរបស់កម្ពុជាមកវិញសម្រេចបាន ៨៥,១ លានដុល្លារ ធ្លាក់ចុះ ៣០ ភាគរយ ធៀបនឹងរយៈពេលដូចគ្នាកាលពីឆ្នាំមុនមានចំនួន ១២២,១ លានដុល្លារ។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃពុធថា ការនាំចេញរបស់កម្ពុជាទៅអាមេរិកកើនឡើងគឺកំពុងឆ្លុះបញ្ចាំងពីកិច្ចសហប្រតិបត្តិការពាណិជ្ជកម្មល្អរវាងរដ្ឋាភិបាលនៃប្រទេសទាំង ២។
លោកបន្តថា ទោះយ៉ាងណាប្រសិនបើការរីករាលដាលជំងឺកូវីដ ១៩ នៅបន្តអូសបន្លាយយូរនៅអាមេរិកនឹងធ្វើឲ្យប៉ះពាល់ដល់ការនាំចេញរបស់កម្ពុជា។
លោកថ្លែងថា៖ «ការនាំចេញរបស់យើងកើនឡើងនៅពេលនេះអាចមកពីការបញ្ជាទិញទំនិញរបស់អាមេរិកបានធ្វើឡើងមុនពេលមានការផ្ទុះជំងឺកូវីដ ១៩ ដូច្នេះបានជានាំឲ្យទិន្នន័យនាំចេញមានកំណើនល្អ»។
សមាគមរោងចក្រកាត់ដេរនៅកម្ពុជា (GMAC) បានអំពាវនាវជាថ្មីដល់អ្នកបញ្ជាទិញទាំងអស់ឲ្យគោរពតាមលក្ខខណ្ឌទូទាត់ប្រាក់សម្រាប់ទិញទំនិញ ដែលបានទទួលរួចហើយ ឬកំពុងដឹកទៅឲ្យអ្នកបញ្ជាទិញ។ នេះបើតាមលិខិតអំពាវនាវចេញផ្សាយកាលពីថ្ងៃចន្ទ។
ការអំពាវនាវនេះធ្វើឡើងបន្ទាប់ពីអ្នកបញ្ជាទិញធំៗនៅអាមេរិក និងអឺរ៉ុប បានសម្រេចផ្អាកការបញ្ជាទិញទំនិញពីកម្ពុជា ដោយសារបញ្ហាជំងឺកូវីដ ១៩ ដែលនាំឲ្យរោងចក្រចំនួន ១៨០ បានព្យួរប្រតិបត្តិការ ហើយ ៦០ រោងចក្រទៀតនឹងឈានទៅដល់ការព្យួរការងារផងដែរ ដែលបានប៉ះពាល់ដល់កម្មករជាង ១៥ ម៉ឺននាក់។ នេះបើតាមលិខិតរបស់ GMAC។
GMAC បន្តថា៖ «រោងចក្រនៅកម្ពុជាកំពុងរងគ្រោះរួចហើយពីការលុបចោលការបញ្ជាទិញជាច្រើន និងការគ្មានការបញ្ជាទិញថ្មីៗ ហើយមិនអាចទ្រាំទ្រនឹងការមិនទូទាត់ប្រាក់នោះទេ»។
ចាប់ពីខែកក្កដា ឆ្នាំ ២០១៦ រដ្ឋាភិបាលអាមេរិកបានប្រកាសផ្តល់ GSP លើទំនិញធ្វើដំណើរសម្រាប់កម្ពុជាដោយរួចពន្ធរួមមានវ៉ាលិស កាបូប កាបូបស្ពាយ និងកាបូបដាក់ប្រាក់។
ការនាំចេញរបស់កម្ពុជាទៅអាមេរិកបានកើនឡើងយ៉ាងខ្ពស់កាលពីឆ្នាំ ២០១៩ ដោយមានតម្លៃរហូតដល់ ៥,៣ ពាន់លានដុល្លារ កើនឡើង ៤០ ភាគរយ ធៀបនឹងឆ្នាំ ២០១៨ ខណៈការនាំចូលសរុបពីអាមេរិកបានតម្លៃជាង ៥១៣ លានដុល្លារកើនឡើង ១៥ ភាគរយ បើធៀបនឹងឆ្នាំ ២០១៨។
កម្ពុជាគឺជាដៃគូពាណិជ្ជកម្មទំនិញឈានមុខគេទី ៦៦ របស់អាមេរិកដោយពាណិជ្ជកម្មទ្វេភាគីសរុប ៤,៣ ពាន់លានដុល្លារ កាលពីឆ្នាំ ២០១៨។ ការនាំចូលសរុបរបស់អាមេរិកនៃផលិតផលកសិកម្មពីកម្ពុជាមានចំនួនសរុប ២៤ លានដុល្លារកាលពីឆ្នាំ ២០១៨៕
