ភ្នំពេញៈ ការនាំចេញទំនិញរបស់កម្ពុជាទៅកាន់ទីផ្សារអន្តរជាតិនៅក្នុងឆមាសទី១ ឆ្នាំ ២០១៩ មានតម្លៃជិត ៧ ពាន់លានដុល្លារ ខណៈដែលការនាំចូលវិញមានតម្លៃរហូតទៅដល់ជាង ១០ ពាន់លានដុល្លារ។ នេះបើយោងតាមរបាយការណ៍របស់ធនាគារជាតិនៃកម្ពុជា (NBC)។
របាយការណ៍ប្រចាំឆមាសទី១ របស់ធនាគារជាតិនៃកម្ពុជា បានឲ្យដឹងថា ការធ្វើពាណិជ្ជកម្មរបស់កម្ពុជាជាមួយបរទេសបានដំណើរការទៅមុខល្អប្រសើរ ដោយការនាំចេញមានតម្លៃសរុប ៦,៨ ពាន់លានដុល្លារ ក្នុងនោះចំណែកទីផ្សារអាមេរិក មានចំនួន ២៨ ភាគរយ តំបន់អឺរ៉ុប ២៦,៦ ភាគរយ ចក្រភពអង់គ្លេស ៦,៦ ភាគរយ និងជប៉ុន ៧,៧ ភាគរយ។ ចំណែកការនាំចូលមានតម្លៃសរុបរហូតដល់ ១០,៥ ពាន់លានដុល្លារ នាំមុខដោយប្រទេស ចិន ដែលមាន ៤៦ ភាគរយ ថៃ១៥,៦ ភាគរយ វៀតណាម ១៣,២ ភាគរយ និងជប៉ុន ៤,៥ ភាគរយ។
ថ្លែងក្នុងសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ ២០១៩ កាលពីថ្ងៃសៅរ៍ លោកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជា បានឲ្យដឹងថា បរិយាកាសអំណោយផលពីសេដ្ឋកិច្ចពិភពលោក បានធ្វើឲ្យសេដ្ឋកិច្ចកម្ពុជាបន្តមានភាពវិជ្ជមានជាបន្តបន្ទាប់។
ទោះយ៉ាងណាជញ្ជីងពាណិជ្ជកម្មរបស់កម្ពុជានៅមិនទាន់មានភាពល្អប្រសើរទេ ដោយសារការនាំចេញនៅតិចជាងនាំចូលឆ្ងាយនៅឡើយ។ លោកស្រីថ្លែងថា៖ «សេណារីយ៉ូដែលល្អ គឺការនាំចេញ ត្រូវច្រើនជាងការនាំចូល ប៉ុន្តែក្នុងករណីបច្ចុប្បន្នកំណើន [ការនាំចូល] យើងខ្ពស់ គឺដោយសារតម្រូវការក្នុងស្រុកច្រើន ដូច្នេះការនាំចូលនឹងកើនឡើងច្រើនជាង [នាំចេញ]»។
លោកស្រីលើកឡើងថា កម្ពុជាត្រូវតែខិតខំបង្កើនការនាំចេញរបស់ខ្លួនឲ្យបានកាន់តែច្រើនបន្ថែមទៀត ហើយត្រូវធ្វើពិពិធកម្មនៃការនាំចេញ។
បច្ចុប្បន្នផលិតផលកម្ពុជាដែលនាំចេញទៅទីផ្សារអន្តរជាតិមានដូចជា សម្លៀកបំពាក់ ស្បែកជើង កាបូប កង់ គ្រឿងបរិក្ខារអគ្គិសនី និងអង្ករជាដើម។ នេះបើតាមលោកស្រី ជា សិរី។
របាយការណ៍របស់ NBC ក៏បានបង្ហាញថា ទុនបម្រុងអន្តរជាតិរបស់កម្ពុជាក៏បានបន្តកើនឡើងជាបន្តបន្ទាប់ ដោយគិតត្រឹមឆមាសទី១ ឆ្នាំ ២០១៩ មានរហូតដល់ទៅ ១១,១ ពាន់លានដុល្លារ ដែលអាចធានាឲ្យការនាំចូលទំនិញ និងសេវាកម្មសម្រាប់គ្រាអាសន្នបានរយៈពេល ៤,៩ ខែ។ កម្រិតខ្ពស់នៃទុនបម្រុងអន្តរជាតិ បានពង្រឹងជំនឿទុកចិត្តរបស់វិនិយោគិនមកលើភាពធន់នៃសេដ្ឋកិច្ចកម្ពុជា។
លោក ជា ចាន់តូ អគ្គទេសាភិបាលធនាគារជាតិនៃកម្ពុជា បានឲ្យដឹងថា ខណៈសេដ្ឋកិច្ចពិភពលោកកំពុងប្រឈមទៅនឹងបញ្ហាជាច្រើនដូចជា ការបន្ថយល្បឿននៃការវិនិយោគដោយសារការប្រឈមដាក់គ្នារវាងសហរដ្ឋអាមេរិក និងចិន ការចាកចេញរបស់ប្រទេស អង់គ្លេស ពីសហភាពអឺរ៉ុប និងកត្តាបញ្ហានៅតាមតំបន់មួយចំនួន ក៏បញ្ហាទាំងអស់នេះមិនទាន់មានផលប៉ះពាល់ដល់កំណើនសេដ្ឋកិច្ចកម្ពុជាដែរ។
លោកថ្លែងថា៖ «ក្នុងនាមជាអាជ្ញាធររូបិយវត្ថុជាតិ ធនាគារជាតិនៃកម្ពុជា បានរួមចំណែកនៅក្នុងការរក្សាអត្រាអតិផរណាឲ្យកម្រិតទាប អត្រាប្តូរ-ប្រាក់មានស្ថិរភាពល្អប្រសើរ និងបានគរពូនទុនបម្រុងអន្តរជាតិឲ្យកើនឡើងខ្ពស់ ដើម្បីចូលរួមពង្រឹងស្ថិរភាពម៉ាក្រូសេដ្ឋកិច្ច ហិរញ្ញវត្ថុ និងគាំទ្រការរីកចម្រើនសេដ្ឋកិច្ចរបស់កម្ពុជា»៕LA