ភ្នំពេញៈ កម្ពុជានាំចេញទំនិញទៅទីផ្សារអាមេរិកមានតម្លៃជាង ៦ ពាន់លានដុល្លារ ក្នុងរយៈពេល ១១ ខែ ឆ្នាំ ២០២០ កើនជាង ២២ ភាគរយធៀបនឹងរយៈពេលដូចគ្នាឆ្នាំ ២០១៩ ខណៈទំហំពាណិជ្ជកម្មទ្វេភាគីមានតម្លៃជាង ៦,៣ ពាន់លានដុល្លារ។ នេះបើយោងតាមទិន្នន័យពីការិយាល័យពាណិជ្ជកម្មអាមេរិក។
ទិន្នន័យដែលចេញផ្សាយកាលពីចុងសប្តាហ៍មុនបង្ហាញថា រយៈពេល ១១ ខែ ឆ្នាំ ២០២០ ការធ្វើពាណិជ្ជកម្មទ្វេភាគីកម្ពុជា អាមេរិកមានតម្លៃសរុប ៦ ៣៦៩ លានដុល្លារ កើន ១៧,០៥ ភាគរយពីចំនួន ៥ ៤៤១,២ លានដុល្លារ នារយៈពេលដូចគ្នាឆ្នាំ ២០១៩។ ក្នុងនោះការនាំចេញរបស់កម្ពុជាមានតម្លៃ ៦ ០៥៦,៩ លានដុល្លារ ដែលកើន ២២,២០ ភាគរយធៀបនឹង ៤ ៩៥៦,៥ លានដុល្លារ ខណៈការនាំចូលពីអាមេរិកមានតម្លៃ ៣១២,១ លានដុល្លារធ្លាក់ចុះ ៣៥,៦ ភាគរយពីចំនួន ៤៨៤,៧ លានដុល្លារ។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) លោក ហុង វណ្ណៈ កាលពីថ្ងៃទី ១៧ ខែមករា បានប្រាប់ ភ្នំពេញ ប៉ុស្តិ៍ ថា ទោះបីវិបត្តិនៃការរីករាលដាលជំងឺកូវីដ១៩ ធ្វើឱ្យការធ្វើពាណិជ្ជកម្មជាអន្តរជាតិត្រូវធ្លាក់ចុះភាគច្រើន ប៉ុន្តែទំហំពាណិជ្ជកម្មកម្ពុជា អាមេរិក ពិសេសការនាំចេញទំនិញពីកម្ពុជាទៅអាមេរិកមិនបានធ្លាក់ចុះទេ។ ភាពរឹងមាំនេះគឺមកពីកត្តាសំខាន់ៗដូចជា ភាពល្អប្រសើរនៃទំនាក់ទំនងការទូត ការទទួលបានប្រព័ន្ធអនុគ្រោះពន្ធ GSP ពីអាមេរិក និងទំនាក់ទំនងល្អប្រសើររវាងក្រុមហ៊ុនផលិតនៅកម្ពុជាជាមួយក្រុមហ៊ុនបញ្ជាទិញនៅអាមេរិក។
លោកថ្លែងថា៖ «នេះមិនមែនជាការចៃដន្យទេដែលការនាំចេញពីកម្ពុជាទៅអាមេរិកកើនឡើងជាបន្តបន្ទាប់។ កំណើននេះមានជាប់ទាក់ទងខ្លាំងទៅលើការផ្តល់ប្រព័ន្ធ GSP ដែលបានលើកលែងប្រាក់បង់ពន្ធសម្រាប់ការនាំចូលផលិតផលធ្វើដំណើរផលិតនៅកម្ពុជា»។
ទោះយ៉ាងណាដោយសារសុពលភាព GSP ត្រូវបានបញ្ចប់កាលពីចុងឆ្នាំ ២០២០ និងមិនទាន់មានការប្រកាសបន្តឡើងវិញ លោកនិយាយថា៖ «សម្រាប់ការធ្វើពាណិជ្ជកម្មទ្វេភាគីក្នុងឆ្នាំ ២០២១ នេះ គេត្រូវរង់ចាំមើលការសម្រេចរបស់អាមេរិកក្នុងការបន្តសុពលភាពរបស់ GSP ជាមុនសិន»។
សមាគមរោងចក្រកាត់ដេរនៅកម្ពុជា (GMAC) កាលពីសប្តាហ៍ទី ១ ខែមករា ឱ្យដឹងថា កម្មវិធីអនុគ្រោះពន្ធទូទៅ (GSP) របស់អាមេរិកបានផុតសុពលភាពកាលពីថ្ងៃទី ៣១ ខែធ្នូ ឆ្នាំ ២០២០ ដោយសារតែការយឺតយ៉ាវក្នុងការអនុម័តច្បាប់ដើម្បីផ្ដល់សុពលភាពដល់កម្មវិធីនេះឡើងវិញដោយសភាអាមេរិក។
សេចក្ដីជូនដំណឹងបានសរសេរថា៖ «ក្នុងអំឡុងពេលផុតរលត់ចុងក្រោយនេះ ទំនិញដែលនាំចូលទៅអាមេរិក បន្ទាប់ពីថ្ងៃទី ៣១ ខែធ្នូ ឆ្នាំ ២០២០ នឹងជាប់អត្រាពន្ធនៃប្រទេសដែលទទួលបានការអនុគ្រោះបំផុត (MFN) ប៉ុន្តែការទាមទារឱ្យមានប្រព្រឹត្តិកម្មអនុគ្រោះពន្ធទូទៅ (GSP) គួរតែបន្តធ្វើឡើង ពីព្រោះការអនុវត្តកន្លងមករបស់សភាអាមេរិក ដែលបានបន្តកម្មវិធីនេះគឺមានលក្ខណៈប្រតិសកម្ម ចាប់ពីកាលបរិច្ឆេទផុតរលត់ពិតប្រាកដ ដូចនេះអ្នកនាំចូលនឹងទទួលបានប្រាក់ពន្ធដែលបានបង់ត្រឡប់ទៅវិញ (មិនមានការប្រាក់) សម្រាប់ពន្ធដែលបានបង់ក្នុងអំឡុងពេលការផុតរលត់»។
រដ្ឋាភិបាលអាមេរិកបានផ្ដល់អត្ថប្រយោជន៍រួចពន្ធដល់កម្ពុជាសម្រាប់ការនាំចេញផលិតផលធ្វើដំណើរដូចជាវ៉ាលិស កាបូបស្ពាយ កាបូបយួរដៃ និងកាបូបលុយស្ថិតក្រោម GSP ចាប់ពីខែកក្កដា ឆ្នាំ ២០១៦ មក។
ទន្ទឹមនឹងកំណើនការនាំចេញរបស់កម្ពុជាទៅអាមេរិកនេះលោក វណ្ណៈ ក៏បានជំរុញឱ្យកម្ពុជាត្រូវខិតខំក្នុងការធ្វើពិពិធកម្មផលិតផលថ្មីៗដែលអាចនាំទៅអាមេរិកផងដែរ។ លោកថ្លែងថា៖ «កម្ពុជាត្រូវតែពិនិត្យលទ្ធភាពរបស់ខ្លួនបន្ថែមទៀតទៅលើវិស័យផ្សេងៗពិសេសវិស័យកសិកម្ម ដែលមានតម្រូវការខ្ពស់នៅអាមេរិក»៕ LA