.jpg)
ទិដ្ឋភាពនៃការលើកកុងតឺន័រដាក់លើរថយន្តនៅក្នុងកំពង់ផែស្វយ័តក្រុងព្រះសីហនុកាលពីពេលថ្មីៗនេះ។ រូបថត ហ៊ឹន ពិសី
ភ្នំពេញៈ ការនាំចេញទំនិញពីតំបន់សេដ្ឋកិច្ចពិសេស (SEZ) នៅកម្ពុជាទៅកាន់ទីផ្សារអន្តរជាតិកាលពីឆ្នាំ ២០១៩ បានកើនឡើងប្រមាណ ២៧ ភាគរយ បើធៀបទៅនឹងរយៈពេលដូចគ្នាកាលពីឆ្នាំ ២០១៨។ នេះបើយោងតាមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
ក្នុងដំណើរទស្សនកិច្ចនៅតំបន់សេដ្ឋកិច្ចពិសេសភ្នំពេញ (PPSEZ) កាលពីថ្ងៃទី ២៣ ខែមករា លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បាននិយាយថា កំណើននៃការនាំចេញផលិតផលពីបណ្តាក្រុមហ៊ុនក្នុងតំបន់សេដ្ឋកិច្ចពិសេសនៅកម្ពុជាកាលពីឆ្នាំមុនមានតម្លៃសរុបរហូតដល់ ២ ៦៨៨ លានដុល្លារ កើនឡើងប្រមាណជាង ២៧ ភាគរយ បើធៀបនឹងឆ្នាំ ២០១៨។
លោកបានបន្តថា គិតត្រឹមឆ្នាំ ២០១៩ តំបន់សេដ្ឋកិច្ចពិសេសនៅកម្ពុជាមានសរុបចំនួន ៥៤ ដោយមានក្រុមហ៊ុនវិនិយោគ ៤៦៥ និងមានកម្មករប្រមាណជាង ១០ ម៉ឺននាក់កំពុងបម្រើការងារ។
លោក លី គីមហុង ប្រធានសាខាតំបន់សេដ្ឋកិច្ចពិសេស Oneang ស្ថិតក្នុងក្រុងប៉ោយប៉ែត ខេត្តបន្ទាយមានជ័យ (ព្រំដែនកម្ពុជា-ថៃ) បានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា ទោះបីលោកមិនទាន់មានតួលេខច្បាស់ពីបរិមាណនៃការនាំចេញទំនិញផលិតក្នុងតំបន់សេដ្ឋកិច្ចពិសេស Oneang ក៏ដោយ ប៉ុន្តែលោកដឹងថា ការនាំចេញកាលពីឆ្នាំមុនបានកើនឡើងច្រើន។
លោកថ្លែងថា៖ «ជាមួយនឹងរោងចក្រធំៗចំនួន ៤ ដែលកំពុងដំណើរក្នុងតំបន់សេដ្ឋកិច្ចពិសេស Oneang ខ្ញុំឃើញថា បរិមាណនៃការផលិត និងនាំចេញកំពុងមានកំណើនជាបន្តបន្ទាប់»។
លោកបន្តថា មានមូលហេតុជាច្រើនកំពុងជំរុញឲ្យមានការវិនិយោគនៅក្នុងតំបន់សេដ្ឋកិច្ចពិសេសនៅកម្ពុជាដែលមានដូចជា ច្បាប់វិនិយោគមានភាពល្អប្រសើរកម្លាំងពលកម្មជំនាញមានភាពសម្បូរបែប និងមានតម្លៃសមរម្យ ប្រជាជនប្រទេសជិតខាង (ថៃ) កំពុងមាននិន្នាការផ្លាប់ប្តូរទៅធ្វើការងារផ្សេងៗក្រៅពីរោងចក្រជាដើម។
បច្ចុប្បន្ននេះតំបន់សេដ្ឋកិច្ចពិសេស Oneang មានរោងចក្រចំនួន ៤ កំពុងដំណើរការក្នុងនោះ ២ ជារបស់វិនិយោគិនមកពីថៃ ១ មកពីចិន និង ១ មកពី ប្រទេសជប៉ុនដោយមានកម្មករប្រមាណ ៧ ០០០ នាក់ ខណៈ ២ ផ្សេងទៀតកំពុងស្ថិតក្នុងដំណាក់កាលសាងសង់។
លោក គីមហុង បានអះអាងថា ភាពល្អប្រសើរនៃស្ថានភាពនយោបាយ កំណើនសេដ្ឋកិច្ច និងច្បាប់វិនិយោគមានភាពទាក់ទាញនឹងធ្វើឲ្យចំនួននៃការចូលមកវិនិយោគថ្មីៗ និងការនាំចេញពីតំបន់សេដ្ឋកិច្ចពិសេសនៅកម្ពុជាក្នុងឆ្នាំ ២០២០ បន្តកើនឡើង។ លោកបានថ្លែងថា៖ «ខ្ញុំមានជំនឿថា ការនាំចេញផលិតផលគ្រប់ប្រភេទពីតំបន់សេដ្ឋកិច្ចនឹងមានកំណើនច្រើនបន្តទៀតក្នុងឆ្នាំនេះ»។
បច្ចុប្បន្នទំនិញដែលផលិតក្នុងតំបន់សេដ្ឋកិច្ចពិសេសនៅកម្ពុជាត្រូវបាននាំចេញទៅកាន់ប្រទេសជាច្រើនក្នុងពិភពលោក មានដូចជា ថៃ ជប៉ុន វៀតណាម ចិន ម៉ាឡេស៊ី អាមេរិក អឺរ៉ុប និងប្រទេសអូស្ត្រាលី ជាដើម។ ចំណែកផលិតផលទាំងនោះមានដូចជា សម្លៀកបំពាក់ គ្រឿងផ្គុំរថយន្ត អេឡិចត្រូនិក អគ្គិសនី និងប្រអប់ដាក់គ្រឿងអលង្ការ ជាដើម។ នេះបើតាមលោក គីមហុង។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាមិនទទួលទូរស័ព្ទកាលពីថ្ងៃម្សិលមិញ ប៉ុន្តែកាលពីពេលថ្មីៗនេះលោកបានប្រាប់ភ្នំពេញប៉ុស្តិ៍ថា ភាពល្អប្រសើរនៃទំនាក់ទំនងអន្តរជាតិរបស់កម្ពុជាជាមួយនឹងបណ្តាប្រទេសជាច្រើនក្នុងពិភពលោកនឹងធ្វើឲ្យការនាំចេញទំនិញរបស់កម្ពុជាទៅកាន់ទីផ្សារអន្តរជាតិបន្តកើនខ្ពស់ក្នុងរយៈពេលយូរបន្ថែមទៀត។ ទោះយ៉ាងណា លោកប្រាប់ថាកម្ពុជាក៏ត្រូវតែចាំបាច់ធ្វើការអភិវឌ្ឍគុណភាពផលិតផល និងធនធានមនុស្សរបស់ខ្លួនឲ្យកាន់តែខ្លាំងផងដែរ។
លោកថ្លែងថា៖ «ដើម្បីរក្សានិរន្តរភាព និងបង្កើនការនាំចេញផលិតផលរបស់ខ្លួន កម្ពុជាចាំបាច់ត្រូវតែធ្វើពិពិធកម្មទីផ្សារ និងពង្រឹងសមត្ថភាពផលិត និងគុណភាពផលិតផលឲ្យកាន់តែប្រសើរស្របតាមការចង់បានរបស់ប្រទេសដែលត្រូវនាំចេញ»។
របាយការណ៍របស់ធនាគារជាតិនៃកម្ពុជាបានឲ្យដឹងថា ក្នុងរយៈពេល ៩ ខែដំបូង ឆ្នាំ ២០១៩ ការនាំទំនិញគ្រប់ប្រភេទដែលផលិតនៅកម្ពុជាទៅកាន់បរទេសមានតម្លៃសរុប ១០,៩ ពាន់លានដុល្លារ ដែលនាំមុខដោយអាមេរិក ដែលមានចំណែកទីផ្សារ ២៩ ភាគរយ ខណៈជប៉ុនស្ថិតនៅលេខ ២ ជាមួយនឹងចំណែកទីផ្សារ ៨ ភាគរយ៕
