ភ្នំពេញៈ ការនាំចេញសរុបនៃផលិតផលកសិកម្មកម្ពុជាបានកើនឡើងដល់ ៥,១៣ លានតោនកាលពីឆ្នាំ ២០១៧ ដែលកើនឡើងពី ៤,៧ លានតោនកាលពីឆ្នាំ ២០១៦ ដែលជាសញ្ញាមួយបង្ហាញថា វិស័យនេះកំពុងស្ថិតលើផ្លូវត្រឹមត្រូវ។ នេះបើយោងតាមលោករដ្ឋមន្ដ្រីក្រសួងកសិកម្ម វេង សាខុន។
ថ្លែងកាលពីថ្ងៃចន្ទនៅក្នុងការបូកសរុបរបាយការណ៍ប្រចាំឆ្នាំ ២០១៧ របស់ក្រសួងនេះលោក វេង សាខុន ឲ្យដឹងថា ខណៈការបង្កបង្កើនផលនៅក្នុងប្រទេសកម្ពុជាបានមើលឃើញកំណើនគួរឲ្យកត់សម្គាល់ក្នុងរយៈពេល ២-៣ ឆ្នាំកន្លងមកមានការងារត្រូវធ្វើជាច្រើនទៀត ដើម្បីបង្កើនការនាំចេញធានាដំណាំកសិកម្មត្រូវបានកែច្នៃនៅក្នុងប្រទេសនេះ និងបង្កើនការគោរពស្ដង់ដារសុខភាព និងសុវត្ថិភាព។
លោករដ្ឋមន្ដ្រីថ្លែងថា៖ «វិស័យរបស់យើងនៅតែប្រឈមបញ្ហាជាច្រើន ហើយយើងត្រូវការពិភាក្សា និងស្វែងរកដំណោះស្រាយដើម្បីផ្គូផ្គងជាមួយគោលនយោបាយរដ្ឋាភិបាលស្ដីពីការអភិវឌ្ឍវិស័យកសិកម្ម»។ លោកបន្តថា៖ «តើយើងធ្វើអន្តរាគមន៍ដូចម្ដេច ក្នុងការបង្កើនផលិតភាព គុណភាព និងសុវត្ថិភាព ដើម្បីឆ្លើយតបតម្រូវការទីផ្សារ?»។
ការនាំចេញអង្ករបានកើនឡើង ១៧,៣ ភាគរយដល់ ៦៣៥ ៦៩៧ តោនកាលពីឆ្នាំ ២០១៧ ខណៈកៅស៊ូបានកើនឡើង ៣០,១៤ ភាគរយដល់ ១៨៨ ៨៣២ តោន។ នេះបើយោងតាមរបាយការណ៍នេះ។
ការរីករាលដាលការរត់ពន្ធនៅតែមានចំនួនច្រើននៃពាណិជ្ជកម្មកសិកម្មរបស់ប្រទេសនេះ។ ការនាំចេញអង្កររបស់កម្ពុជាជាង ៤០ ភាគរយធ្វើតាមបណ្ដាញក្រៅប្រព័ន្ធ។ នេះបើតាមការប៉ាន់ប្រមាណរបស់អង្គការសហប្រជាជាតិថ្មីៗនេះ ខណៈក្រុមហ៊ុនចម្ការកៅស៊ូ និងក្រុមហ៊ុនកែច្នៃកៅស៊ូបានត្អូញត្អែរថា កសិករមានទុនតូចទទួលបានតម្លៃកាន់តែខ្ពស់ ដោយការលក់ឲ្យឈ្នួញវៀតណាម ដែលមិនបានគោរពតាមច្បាប់ពន្ធរបស់ប្រទេសកម្ពុជា ធ្វើឲ្យក្រុមហ៊ុនស្រុកដែលបង់ពន្ធពិបាករស់។
លោក វេង សាខុន មិនបានលើកឡើងពីការរត់ពន្ធផលិតផលកសិកម្មនៅក្នុងសុន្ទរកថារបស់លោកនោះទេ។
ការនាំចេញគ្រាប់ស្វាយចន្ទីបានកើនឡើង ២០ ភាគរយកាលពីឆ្នាំ ២០១៧ ដល់ ៨៧ ៨៥៣ តោន។ នេះបើយោងតាមស្ថិតិដែលបានផ្ដល់ដោយក្រសួង ទោះបីជាព័ត៌មានអំពីវិស័យស្វាយចន្ទីមិនត្រូវបានដាក់បញ្ចូលក្នុងរបាយការណ៍នេះក៏ដោយ។
រដ្ឋាភិបាលបានប្រកាសផែនការមួយកាលពីខែមករាដើម្បីនាំចេញស្វាយចន្ទី ឲ្យបាន ១ លានតោនត្រឹមឆ្នាំ ២០២៨ ដោយមានជំនួយពីរដ្ឋាភិបាលវៀតណាម ប៉ុន្តែមិនមានផែនការត្រូវបានបង្ហាញទេថាតើទិសដៅកំណត់នេះនឹងត្រូវសម្រេចបានយ៉ាងណានោះទេ៕LA