ភ្នំពេញ: កម្ពុជាបាននាំចេញផលិតផលដែលមានស្ករគ្រប់ប្រភេទជាវត្ថុធាតុដើមសំខាន់មានតម្លៃជិត ១៩ លានដុល្លារ ធ្លាក់ចុះ ៤៤ ភាគរយក្នុងឆមាសទី ១ ឆ្នាំ ២០២០ នេះ បើធៀបនឹងឆមាសទី ១ ឆ្នាំមុន។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
ទិន្នន័យនេះបង្ហាញថា ប្រទេសកម្ពុជាបាននាំចេញផលិតផលពីស្ករមានតម្លៃជាង ១៨,៩៥ លានដុល្លារ ចាប់ពីខែមករា ដល់ ខែមិថុនា ធ្លាក់ចុះ ៤៣,៨៩ ភាគរយ ធៀបនឹងរយៈពេលដូចគ្នាកាលពីឆ្នាំមុនដែលមានតម្លៃ ៣៣,៧៩ លានដុល្លារ។ ទិន្នន័យមិនបានបញ្ជាក់ពីប្រភេទទំនិញនៃផលិតផលពីស្ករជាក់លាក់នោះទេ។
ទោះយ៉ាងណាស្ថិតក្រោមបន្ទាត់ពន្ធគយនៃផលិតផលពីស្កររបស់ប្រទេសកម្ពុជាដែលបាននាំចេញរួមមានស្ករអំពៅ (ឬស្ករបែតឺរ៉ាវ) និងសាក់ការូសសុទ្ធក្នុងស្ថានភាពរឹង ស្ករឆៅគ្មានបន្ថែមរសជាតិ ឬពណ៌ និងស្ករអំពៅផ្សេងៗទៀត រួមមានឡាក់តូស ម៉ាល់តូស គ្លុយកូស ស្ករគ្រាប់ (រួមទាំងសូកូឡាពណ៌ស) គ្មានកាកាវជាដើម។ នេះបើតាមលោក ស៊ាង ថៃ អ្នកនាំពាក្យក្រសួងពាណិជ្ជកម្ម។
លោក សំ សារឿន ប្រធានសមាគមលើកកម្ពស់ស្ករត្នោតកំពង់ស្ពឺ (KSPSPA) ប្រាប់ភ្នំពេញប៉ុស្តិ៍កាលពីថ្ងៃចន្ទថា ស្ករតោ្នតកំពង់ស្ពឺដែលជាផលិតផលសម្គាល់ភូមិសាស្ត្រ (GI) ពុំទទួលរងផលប៉ះពាល់ពីការធ្លាក់ចុះនេះទេ ដោយបរិមាណលក់ទៅកាន់ទីផ្សារគឺប្រហាក់ប្រហែលរដូវកាលនៃឆ្នាំមុន។ ម្យ៉ាងទៀតក្នុងរដូវកាលបន្ទាប់នេះ តម្រូវការស្ករតោ្នតបែរជាកើនឡើងលើសសមត្ថភាពផ្គត់ផ្គង់ពីសមាគម។
លោកថ្លែងថា៖ «រដូវប្រមូលផលឆ្នាំនេះ អ្នកផលិតយើងផ្គត់ផ្គង់មិនអាចផ្គត់ផ្គង់គ្រប់ចំនួនតាមតម្រូវការទីផ្សារដែលមានប្រមាណ ២០០ តោន ទាំងក្នុងស្រុក និងក្រៅស្រុក»។
លោកបន្តថា ដើម្បីផ្គត់ផ្គង់តាមតម្រូវការទីផ្សារនាំចេញ សមាគមនឹងបង្កើនសមាជិកអ្នកផលិតនាពេលបច្ចុប្បន្នពី ១០០ នាក់ ឲ្យដល់ ១៥០ នាក់ ដែលរដូវប្រមូលនឹងចាប់ផ្តើមពីខែធ្នូឆ្នាំនេះដល់ខែមិថុនាឆ្នាំក្រោយ។
លោកបញ្ជាក់ថា៖ «សមាគមក៏កំពុងជំរុញការផ្សព្វផ្សាយដល់អ្នកប្រើប្រាស់ក្នុងស្រុកពីស្លាកសញ្ញាសម្គាល់ផលិតផលស្ករត្នោតកំពង់ស្ពឺដើម្បីទប់ស្កាត់ការក្លែងបន្លំស្ករត្នោត»។
លោកបានឲ្យដឹងថា ស្ករត្នោតដែលក្រុមហ៊ុនបានបញ្ជាទិញពីអ្នកផលិតក្នុងរដូវកាលបន្ទាប់នេះគឺមានតម្លៃ ៦ ០០០ រៀល ក្នុង ១ គីឡូក្រាម ដែលប្រហាក់ប្រហែលនឹងតម្លៃឆ្នាំមុន។
បើយោងតាមលោក សារឿន សព្វថ្ងៃ ក្រុមហ៊ុនចំនួន ១០ ដែលបាននាំចេញផលិតផលស្ករត្នោតទៅ ២៥ ប្រទេស ដោយមានទីផ្សារនៅតំបន់អឺរ៉ុបជាទីផ្សារធំក្នុងពេលកន្លងមក។ ក្រៅពីនេះ មានទីផ្សារប្រទេសចិន កូរ៉េខាងត្បូង និងជប៉ុនជាដើម។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានឲ្យដឹងក្នុងអំឡុងពេលទស្សនកិច្ចចង្វាក់ផលិតកម្មនៅរោងចក្រផលិតស្ករសក្រុមហ៊ុន ភ្នំពេញ ស៊ូហ្គ័រ កាលពីខែធ្នូ ឆ្នាំមុនថា រោងចក្រនេះមានសមត្ថភាពផលិតស្ករស ១ ពាន់តោន និងស្ករឆៅ ១ ពាន់តោន ក្នុង ១ ថ្ងៃ។ សព្វថ្ងៃទីផ្សារស្ករសធំជាងគេរបស់ក្រុមហ៊ុននេះគឺប្រទេសវៀតណាម និងការផ្គត់ផ្គង់ទីផ្សារក្នុងស្រុក។
លោកថ្លែងថា៖ «នាពេលអនាគត ក្រុមហ៊ុននេះគ្រោងនឹងនាំចេញទៅកាន់ទីផ្សារក្រៅតំបន់បន្ថែមទៀត»។
ក្រុមហ៊ុន ភ្នំពេញ ស៊ូហ្គ័រជាក្រុមហ៊ុនផលិតស្ករសទី ២ បន្ទាប់ពីក្រុមហ៊ុនកោះកុងស៊ូហ្គ័រនៅខេត្តកោះកុង ដោយក្រុមហ៊ុនទាំង ២ ផ្តួចផ្តើមវិនិយោគដោយលោក លី យ៉ុងផាត់៕ LA