.jpg)
កម្មការិនីរោងចក្រកាត់ដេរកំពុងដេរសម្លៀកបំពាក់ក្នុងរោងចក្រនៅរាជធានីភ្នំពេញ។ រូបថត ភ្នំពេញប៉ុស្តិ៍
ភ្នំពេញៈ ទិន្នន័យរដ្ឋាភិបាលបានបង្ហាញថា កម្ពុជាបាននាំចេញសម្លៀកបំពាក់ វាយនភណ្ឌ និងស្បែកជើង (GTF) មានតម្លៃជាង ៣,១៣ ពាន់លានដុល្លារនៅរយៈពេល ៤ ខែដំបូងឆ្នាំនេះកើន ១,៦៧ ភាគរយធៀបនឹងរយៈពេលដូចគ្នាកាលពីឆ្នាំមុន ចំពេលកូវីដ ១៩ កំពុងរំខានដល់ចង្វាក់ផ្គត់ផ្គង់របស់ខ្លួន។
ទិន្នន័យដែលចេញផ្សាយដោយអគ្គនាយកដ្ឋានគយ និងរដ្ឋាករបានបង្ហាញថា ប្រទេសកម្ពុជានាំចេញសម្លៀកបំពាក់មានតម្លៃជាង ២,៣២ ពាន់លានដុល្លារនៅក្នុងអំឡុងពេលនេះធ្លាក់ចុះ ៣,៤០ ភាគរយ បើធៀបនឹងរយៈពេលដូចគ្នាកាលពីឆ្នាំមុន ខណៈគ្រាន់តែការនាំចេញស្បែកជើងមានតម្លៃជាង ៤១២ លានដុល្លារ កើនឡើង ១៨,០៦ ភាគរយ និងទំនិញធ្វើដំណើរមានតម្លៃជាង ៣៨៨ លានដុល្លារ កើនឡើង ២២,០៦ ភាគរយ ក្នុងអំឡុងពេលនេះ។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា (GMAC) បានប្រាប់ភ្នំពេញប៉ុស្ដិ៍ថា ការកើនឡើងនេះត្រូវជំរុញដោយការបញ្ជាទិញរបស់អ្នកទិញមុនពេលការរីករាលដាលកូវីដ ១៩។ ទោះយ៉ាងណាវានឹងធ្លាក់ចុះក្នុងរយៈពេលជាច្រើនខែខាងមុខនេះ ដោយសារតែការព្យួរការបញ្ជាទិញរបស់អ្នកទិញសំខាន់ៗនៅអាមេរិក និងអឺរ៉ុបសម្រាប់ផលិតផលមួយចំនួន ដោយសារការរីករាលដាលជំងឺកូវីដ ១៩ នៅទូទាំងពិភពលោក។
លោក ស៊ូអៀង បាននិយាយថា៖ «នឹងមានការធ្លាក់ចុះក្នុងការនាំចេញសម្លៀកបំពាក់ក្នុងរយៈពេលច្រើនខែខាងមុខ។ ខ្ញុំជឿជាក់ថា ផលិតផលនាំចេញដែលមានស្រាប់ផ្សេងទៀត ដូចជា ស្បែកជើងនឹងធ្លាក់ចុះ ចំណែកសម្ភារធ្វើដំណើរអាចមានស្ថិរភាព ឬធ្លាក់ចុះបន្តិច។ មិនមានការបញ្ជាទិញសម្រាប់ផលិតផលកាត់ដេរត្រូវបានបញ្ជាក់នោះទេរហូតមកទល់ពេលនេះ អាចមានតែសម្រាប់ផលិតផលការពារវេជ្ជសាស្ដ្រ និងថែរក្សាសុខភាពមួយចំនួនប៉ុណ្ណោះ»។
ជំងឺកូវីដ ១៩ បានបណ្ដាលឲ្យមានការរំខានការរស់នៅរបស់មនុស្សក្នុងពិភពលោក ព្រមទាំងរំខានដល់ការធ្វើអាជីវកម្ម និងចង្វាក់ផ្គត់ផ្គង់លើពិភពលោកផងដែរ។
កាលពីខែមេសា រដ្ឋមន្ដ្រីក្រសួងពាណិជ្ជកម្មលោក ប៉ាន សូរស័ក្តិ បានអំពាវនាវឲ្យអ្នកទិញសម្លៀកបំពាក់ ស្បែកជើង និងទំនិញធ្វើដំណើរមានប្រភពពីប្រទេស កម្ពុជា ត្រូវរក្សាការប្ដេជ្ញាចិត្តដោយទទួលយកផលិតផលដែលត្រូវបានផលិតរួចហើយ ស្របតាមកិច្ចសន្យា។
លោករដ្ឋមន្ត្រីបានអះអាងថា៖ «ខ្ញុំសូមអំពាវនាវដល់ដៃគូរបស់យើង អ្នកទិញសម្លៀកបំពាក់ ស្បែកជើង និងទំនិញធ្វើដំណើរដែលមានប្រភពពីប្រទេសកម្ពុជាត្រូវរក្សាការប្ដេជ្ញាចិត្ត ចំពោះប្រទេសកម្ពុជា និងជាពិសេសដល់កម្មកររបស់យើង។ យើងសូមអ្នកគោរពតាមកិច្ចព្រមព្រៀងរបស់អ្នក និងកុំលុបចោលការបញ្ជាទិញដែលបានដាក់រួចហើយ និងទំនិញដែលបានផលិតរួចហើយ ឬកំពុងផលិតនៅពេលបច្ចុប្បន្ន»។
សមាគមរោងចក្រកាត់ដេរនៅកម្ពុជា (GMAC)បានអំពាវនាវដល់រដ្ឋាភិបាលឲ្យសម្លឹងមើលក្នុងរយៈពេលមធ្យមក្នុងការរក្សា និងការពារការផលិតសម្លៀកបំពាក់ ស្បែកជើង និងទំនិញធ្វើដំណើរ និងរចនាសម្ព័ន្ធប្រតិបត្តិការដើម្បីប្រទេសកម្ពុជាអាចត្រៀមខ្លួនសម្រាប់អាជីវកម្ម នៅពេលការរីករាលដាលនេះត្រូវបានដោះស្រាយ។
លោកបន្ថែមថា កម្ពុជាត្រូវតែរក្សាឲ្យបាននូវភាពប្រកួតប្រជែងធៀបនឹងប្រទេសក្នុងតំបន់ដូចជា វៀតណាម បង់ក្លាដែស និងមីយ៉ាន់ម៉ា។
លោកអះអាងថា ការចំណាយប្រតិបត្តិការ និងការចំណាយលើប្រាក់ឈ្នួល និងការចំណាយលើការផ្គត់ផ្គង់វត្ថុធាតុដើម សុទ្ធតែជាកត្តាដែលគេត្រូវដោះស្រាយដើម្បីរក្សាស្ថិរភាពវិស័យនេះបម្រើសេដ្ឋកិច្ចជាតិ។
លោកលើកឡើងថា៖ «នោះជាមូលហេតុដែល GMAC ស្នើឲ្យមានការកាត់បន្ថយប្រាក់ឈ្នួលអប្បបរមាត្រឹម ៣០ ភាគរយ ក្នុងរយៈពេល ២ ឆ្នាំ ឬព្យួរគោលនយោបាយប្រាក់ឈ្នួលអប្បបរមារយៈពេល ២ ឆ្នាំ ដើម្បីអាចឲ្យរោងចក្រប្រកួតប្រជែង និងរក្សាការងារ ឬបង្កើតការងារ ការងារត្រូវចំណាយលើប្រាក់ខែតាមទីផ្សារសេរី»។
លោកកត់សម្គាល់ថា ការកាត់បន្ថយការចំណាយ និងការព្យួរកាតព្វកិច្ចបង់បេឡាជាតិរបបសន្ដិសុខសង្គមរហូតដល់ចុងឆ្នាំ ២០២១ និងការលើកទឹកចិត្តពន្ធជាមួយនឹងការលើកលែងពន្ធលើប្រាក់ចំណេញ ១ ភាគរយ ដោយស្វ័យប្រវត្ដិដោយមិនចាំបាច់មានលក្ខខណ្ឌណាមួយសម្រាប់ឧស្សាហកម្មនាំចេញនឹងជួយឲ្យកម្ពុជាមានឧត្តមភាពក្នុងការប្រកួតប្រជែងលើទីផ្សារអន្តរជាតិ។
GMAC លើកឡើងថា រោងចក្រជាង ១៨០ នៅក្នុងប្រទេស កម្ពុជា បានព្យួរប្រតិបត្តិការ ខណៈដែល ៦០ រោងចក្រផ្សេងទៀតកំពុងស្ថិតក្នុងហានិភ័យនៃការបិទទ្វារ។ ស្ថានការណ៍នេះប៉ះពាល់ដល់កម្មកររោងចក្រ ២០ ម៉ឺននាក់ ដោយផ្ទាល់ និង ២ លាននាក់ផ្សេងទៀតដោយប្រយោល។
ក្តីព្រួយបារម្ភនេះហាក់ផ្ទុយពីការអះអាងរបស់លោក ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ ដែលបានថ្លែងក្នុងពេលសន្និសីទសារព័ត៌មានកាលពីចុងខែមេសាថា កម្ពុជាទទួលបានចំនួនរោងចក្របើកដំណើរការក្នុងត្រីមាសទី ១ ឆ្នាំ ២០២០ មានចំនួន ៧៧ ក្នុងនោះ ៧៥ ជារោងចក្រថ្មី និង ២ រោងចក្រទៀតជាការបើកដំណើរការឡើងវិញ ដោយរោងចក្រទាំងនេះអាចបង្កើតការងារថ្មីបាន ២៧ ៩០៩ នាក់៕ LA
