ភ្នំពេញៈ ក្រុមហ៊ុនរីចហ្វាមអេស៊ា នឹងចាប់ផ្តើមនាំចេញស្វាយកែវរមៀតពីកម្ពុជាទៅកាន់ទីផ្សារចិនជាផ្លូវការនៅដើមឆ្នាំក្រោយ ក្រោយពីការនាំចេញសាកល្បងជាច្រើនលើក បន្ទាប់ពីរដ្ឋាភិបាលកម្ពុជា និងចិនបានចុះហត្ថលេខាលើកិច្ចព្រមព្រៀងនៃការនាំស្វាយកែវរមៀតស្រស់ក្នុងកូតា ៥០ ម៉ឺនតោន ក្នុង ១ ឆ្នាំ កាលពីខែមិថុនាកន្លងមក។
លោក ហ៊ុន ឡាក់ អគ្គនាយកក្រុមហ៊ុន រីចហ្វាម អេស៊ា ឯ.ក (Richfarm Asia Co., Ltd) ដែលវិនិយោគលើដំណាំស្វាយកែវរមៀតរាប់ម៉ឺនដើមបានឱ្យដឹងថា ការចុះហត្ថលេខាលើខ្លឹមសារពិធីសារស្តីអំពី «លក្ខខណ្ឌតម្រូវភូតគាមអនាម័យសម្រាប់ការនាំចេញផ្លែស្វាយកែវរមៀតស្រស់ពីកម្ពុជាទៅកាន់សាធារណរដ្ឋប្រជាមានិតចិន» កាលពីថ្ងៃទី ៩ ខែមិថុនា ឆ្នាំនេះ គឺជាការបើកផ្លូវឱ្យវិស័យឯកជនអាចនាំចេញផ្លែស្វាយកែវរមៀតស្រស់ដោយផ្ទាល់ទៅកាន់ទីផ្សារដ៏ធំនេះនៅតំបន់អាស៊ី។
លោកអះអាងថា ក្រុមហ៊ុន រីចហ្វាម អេស៊ា គ្រោងនឹងនាំចេញផ្លែស្វាយកែវរមៀតស្រស់ទៅកាន់ប្រទេសចិននៅខែកុម្ភៈ ឆ្នាំ ២០២១ ខាងមុខនេះ។
លោកបញ្ជាក់៖ «ខ្ញុំគិតថា នៅដើមឆ្នាំ ២០២១ យើងនឹងអាចនាំចេញស្វាយកែវរមៀតទៅទីផ្សារប្រទេសចិនបានហើយ ខណៈសព្វថ្ងៃ យើងកំពុងខ្ចប់ផ្លែស្វាយទើបនឹងចេញក្តឹបដែលយើងអាចប្រមូលផលស្វាយក្នុងរយៈពេល ៥០ ថ្ងៃទៀត។ យើងបាននាំចេញរួចហើយនូវតំណាប់ស្វាយទៅទីផ្សារអន្តរជាតិ ហើយយើងនឹងចាប់ផ្តើមនាំចេញផ្លែស្វាយស្រស់នៅខែកុម្ភៈ ឆ្នាំក្រោយនេះ»។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទប្រាប់ភ្នំពេញ ប៉ុស្តិ៍កាលពីថ្ងៃអង្គារថា ក្រុមហ៊ុនចំនួន ៤ ដែលនឹងបញ្ចប់ការសាងសង់រោងចក្រប្រព្រឹត្តិកម្មសម្លាប់សមាសភាពចង្រៃដោយប្រើទឹកក្តៅ (HWT) និងចំហាយទឹកក្តៅ (VHT) ឱ្យរួចរាល់ក្នុងខែធ្នូនេះ។
លោករដ្ឋមន្ត្រីបានឱ្យដឹងថា ក្រុមហ៊ុននីមួយៗបានសន្យាថា នឹងចាប់ផ្តើមនាំចេញស្វាយស្រស់ក្នុងបរិមាណចន្លោះពី ៥០០ ទៅ ១ ០០០ តោន បន្ទាប់ពីរោងចក្រប្រព្រឹត្តិកម្មសម្លាប់សមាសភាពចង្រៃរបស់ពួកគេធ្វើរួចរាល់នៅចុងខែធ្នូនេះ។
លោកបន្តថា៖ «ខ្ញុំគិតថា បើទោះជាយើងដំឡើងឧបករណ៍សម្លាប់សមាសភាពចង្រៃមិនទាន់ពេលដោយសារជំងឺកូវីដ ១៩ យើងក៏អាចនាំចេញស្វាយស្រស់ទៅចិនបានដែរ គឺតាមរយៈប្រទេសវៀតណាម តែយើងចង់នាំទៅដោយផ្ទាល់ជាង»។
លោក អ៊ុំ សាវឿន ប្រធានសមាគមកសិកម្មស្វាយកែវរមៀតគិរីរម្យដែលមានសមាជិកដាំស្វាយជាង ២ ០០០ ហិកតា នៅខេត្តកំពង់ស្ពឺ បានឱ្យដឹងថា ស្វាយកែវរមៀតទើបនឹងចេញផ្កាជាថ្មី បន្ទាប់ពីបញ្ចប់រដូវប្រមូលចុងរដូវចប់កាលពីខែមុន ដោយលោករំពឹងថាទិន្នផលស្វាយនៅរដូវក្រោយនេះមានផលខ្ពស់ដោយសមាគមនេះមានសមត្ថភាពផ្គត់ផ្គង់ស្វាយស្រស់ចន្លោះពី ៧០ ទៅ ៨០ ម៉ឺនតោនក្នុង ១ រដូវ។
លោកថ្លែងថា៖ «យើងសង្ឃឹមថា ស្វាយកែវរមៀតនឹងមានតម្លៃល្អសមរម្យ បន្ទាប់ពីប្រទេសចិន បើកទីផ្សារឱ្យកម្ពុជា»។
ទោះយ៉ាងណាលោក វេង សាខុន ព្រួយបារម្ភថា តម្លៃដើមផលិតខ្ពស់របស់កម្ពុជានឹងធ្វើឱ្យក្រុមហ៊ុននាំចេញពិបាកប្រកួតប្រជែងក្នុងទីផ្សារប្រទេសចិន។ ជាមធ្យម តម្លៃជួលលាងសម្អាតផ្លែស្វាយនៅកម្ពុជាសម្រាប់នាំចេញចន្លោះពី ០,៨០ ដុល្លារ ទៅ ១ ដុល្លារ ក្នុង ១ គីឡូក្រាម ខណៈតម្លៃស្វាយស្រស់នៅប្រទេសចិនជាង ២ ដុល្លារ ក្នុង ១ គីឡូក្រាម និងពី ៣ ទៅ ៤ ដុល្លារ សម្រាប់ទីផ្សារនៅប្រទេសកូរ៉េខាងត្បូង។
រហូតមកដល់ពេលនេះកម្ពុជាមានផ្ទៃដីដាំស្វាយប្រមាណ ១២៤ ៣១៩ ហិកតា ដោយផ្តល់ផលជាមធ្យម ១៥,៥ តោន ក្នុង ១ ហិកតា សម្រាប់ ១ រដូវកាល ខណៈ ១ ឆ្នាំអាចប្រមូលផលបាន ២ ដង៕ LA