.jpg)
កម្ពុជារំពឹងថានឹងធ្វើការនាំចេញផ្លែមៀនប៉ៃលិន (តាង៉ែន) ទៅកាន់ទីផ្សារបរទេស ពិសេសការនាំចេញផ្ទាល់ទៅប្រទេសចិន បន្ទាប់ពីការសាបរលត់នៃជំងឺកូវីដ ១៩។ រូបថត ភ្នំពេញ ប៉ុស្តិ៍
ភ្នំពេញៈ កម្ពុជារំពឹងថានឹងធ្វើការនាំចេញផ្លែមៀនប៉ៃលិន (តាង៉ែន) ទៅកាន់ទីផ្សារបរទេស ពិសេសការនាំចេញផ្ទាល់ទៅប្រទេសចិន បន្ទាប់ពីការសាបរលត់នៃជំងឺកូវីដ ១៩ ដោយសាររោងចក្រសម្ងួតមួយកន្លែងដោយវិនិយោគិនចិនក្នុងខេត្តប៉ៃលិនបើកដំណើរការជាផ្លូវការ។ នេះបើតាមថ្នាក់ដឹកនាំខេត្តប៉ៃលិន។
លោក ធូ ភា អភិបាលរងខេត្តប៉ៃលិនបានប្រាប់ភ្នំពេញប៉ុស្តិ៍កាលពីថ្ងៃចន្ទថា ការនាំចេញផ្លែមៀនប៉ៃលិនទៅកាន់ទីផ្សារអន្តរជាតិ ពិសេសប្រទេសចិន នឹងកើនឡើងនៅពេលជំងឺកូវីដ ១៩ ត្រូវបញ្ចប់ ព្រោះបច្ចុប្បន្នទោះបីក្នុងខេត្តប៉ៃលិន ទើបមានរោងចក្រសម្ងួតមួយសាងសង់រួចរាល់ ប៉ុន្តែវាមិនទាន់ត្រូវបានដាក់ឲ្យដំណើរការជាផ្លូវការទេ។ លោកបន្តថា ភាពយឺតយ៉ាវនេះគឺដោយសារក្រុមហ៊ុនរង់ចាំឲ្យជំងឺកូវីដមានភាពធូរស្រាលសិន។
លោកបន្ថែមថា នៅពេលរោងចក្រដែលមានសមត្ថភាពសម្ងួតផ្លែមៀន បាន ២,៤ តោនក្នុង ១ ម៉ោងដំណើរការ វានឹងជួយធ្វើឲ្យទីផ្សារផ្លែមៀនប៉ៃលិន កាន់តែមានសក្តានុពល ខណៈបច្ចុប្បន្នដោយសារការនាំចេញប្រហែល ៧០ ភាគរយ ត្រូវពឹងទៅលើប្រទេសថៃហេតុនេះតម្លៃដែលកសិករទទួលបាន គឺមិនសូវខ្ពស់ទេ។
លោកថ្លែងថា៖ «ដោយសារមិនមានរោងចក្រសម្ងួត មៀនប៉ៃលិនប្រហែល ៥ ៥០០-៦ ០០០ តោន ក្នុង ១ ឆ្នាំៗត្រូវបាននាំចេញទៅប្រទេសថៃ។ នៅពេលរោងចក្របើកដំណើរការ យើងសង្ឃឹមថា វានឹងធ្វើឲ្យការនាំចេញរបស់យើងដោយផ្ទាល់ទៅកាន់ទីផ្សារអន្តរជាតិ ពិសេសទីផ្សារចិននឹងមានកំណើនកាន់តែច្រើន ហើយតម្លៃក៏ខ្ពស់ជាងពេលបច្ចុប្បន្នដែរ»។
លោកបន្ថែមថា នៅពេលរោងចក្រចាប់ផ្តើមដំណើរការ ការដាំដុះ និងគុណភាពក៏នឹងមានភាពល្អប្រសើរជាងពេលមុនដែរ។ លោកបញ្ជាក់ថា៖ «ជាមួយនឹងកំណើនការដាំដុះរបស់ប្រជាកសិករ ខ្ញុំក៏សង្ឃឹមថានឹងមានវិនិយោគិនថ្មីៗទៀតចូលមកបណ្តាក់ទុនសាងសង់រោងចក្រសម្ងួតបន្ថែមសម្រាប់លើកកម្ពស់គុណភាព និងការនាំចេញរបស់កម្ពុជា»។
បើតាមលោក ធូ ភា បច្ចុប្បន្នមៀនប៉ៃលិនមានតម្លៃក្នុងរង្វង់ ៥ ០០០ រៀលក្នុង ១ គីឡូក្រាម។ តម្លៃនេះបើធៀបនឹងឆ្នាំមុន គឺធ្លាក់ចុះបន្តិច។
លោក សាយ សុផាត ប្រធានមន្ទីរកសិកម្មខេត្តប៉ៃលិនបានប្រាប់ថា បើទោះបីអាកាសធាតុមិនសូវអំណោយផលល្អ ប៉ុន្តែការកើនឡើងនៃផ្ទៃដីដាំដុះបានធ្វើឲ្យទិន្នផលផ្លៃមៀនឆ្នាំនេះកើនឡើងតិចតួចបើធៀបនឹងឆ្នាំមុន។ លោកបន្តថា នៅពេលដែលរោងចក្រសម្ងួតដំណើរការ ការដាំដុះប្រាកដជានឹងកើនឡើងខ្ពស់ ហើយការសម្រិតសម្រាំងពូជ និងគុណភាពក៏កើនឡើងទៅតាមនោះដែរ។
លោកនិយាយថា៖«ទីផ្សារមៀនប៉ៃលិននឹងល្អខ្លាំងពេលមានកន្លែងសម្ងួតក្នុងស្រុកដោយមិនចាំបាច់ពឹងការនាំទៅសម្ងួតនៅប្រទេសថៃ»។
បើតាមលោក សុផាត ផ្លែមៀន ផ្តល់ផលក្នុងចន្លោះពី ១០ ទៅ ១៥ តោនក្នុង ១ ហិកតាដោយអាស្រ័យលើអាកាសធាតុ និងអាយុកាល។
របាយការណ៍ពីរដ្ឋបាលខេត្តប៉ៃលិនបានឲ្យដឹងថា បច្ចុប្បន្នខេត្តប៉ៃលិនមានដំណាំ ០៤ ប្រភេទដែលកំពុងមានសក្តានុពលខ្ពស់ក្នុងការដាំដុះ និងនាំចេញ រួមមាន មៀនប៉ៃលិន (តាង៉ែន) ស្វាយកែវល្មៀត ដំណាំដំឡូងមី និងពោតក្រហម។ បច្ចុប្បន្នផ្ទៃដីដាំមៀនប៉ៃលិន (តាង៉ែន) មានទំហំ ៤ ៣៨៣ ហិកតា។
មកដល់ពេលនេះមានផលិតផលកសិកម្មកម្ពុជាតែ ៤ មុខគត់ដែលត្រូវអនុញ្ញាតជាផ្លូវការឲ្យនាំទៅប្រទេសចិន រួមមាន ពោត ដំឡូងមី អង្ករ និងចេក ខណៈបច្ចុប្បន្នកម្ពុជាកំពុងចរចានាំចេញផលិតផលផ្សេងៗទៀតដូចជា ទឹកមាត់ត្រចៀកកាំ ស្វាយ ម្រេច ស្រកានាគ តាង៉ែន និងដូងក្រអូប។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទមិនអាចទាក់ទងបានទេកាលពីថ្ងៃចន្ទ ប៉ុន្តែលោក ងិន ឆាយ អគ្គនាយកនៃអគ្គនាយកដ្ឋានកសិកម្ម ធ្លាប់បានប្រាប់ភ្នំពេញប៉ុស្តិ៍កាលពីដើមខែឧសភានេះថា ផែនការនាំចេញផលិតផល ទឹកមាត់ត្រចៀក កាំ ស្វាយ ម្រេច ស្រកានាគ តាង៉ែន និងដូងក្រអូបជាផ្លូវការទៅកាន់ប្រទេសចិនដោយផ្ទាល់ប្រហែលជាមិនអាចលេចចេញជារូបរាងទេនៅក្នុងឆ្នាំនេះ៕ LA
