.jpg)
កសិករនៅខេត្តកំពង់ចាមហាលម្រេចអំឡុងពេលប្រមូលផលចន្លោះខែមករាដល់មិថុនា។ ភ្នំពេញប៉ុស្តិ៍
ភ្នំពេញ: កម្ពុជាបាននាំចេញផលិតផលម្រេចចំនួនជាង ៤ ១២១ តោន ក្នុងរយៈពេល ៩ ខែដើមឆ្នាំ ២០២០ នេះ ដោយមានកំណើនជាង ២១ ភាគរយ ធៀបនឹងរយៈពេលដូចគ្នាកាលពីឆ្នាំមុនដែលមានចំនួនជាង ៣ ៤០៤ តោន។ នេះយោងតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោក សាខុន ប្រាប់ភ្នំពេញប៉ុស្តិ៍ថ្ងៃចន្ទថា ការនាំចេញម្រេចសម្គាល់ភូមិសាស្ត្រ GI និងនៅក្រៅតំបន់សម្គាល់ភូមិសាស្ត្ររបស់កម្ពុជាក្នុងអំឡុងពេលនេះទៅកាន់ទីផ្សារប្រទេសជាច្រើនរួមមាន ជប៉ុន បែលហ្ស៊ិក ហូឡង់ បារាំង អាល្លឺម៉ង់ ស្វ៊ីស វៀតណាម អាមេរិក រុស្ស៊ី អង់គ្លេស ឥណ្ឌា បេឡារុស សាធារណរដ្ឋកូរ៉េ សាធារណរដ្ឋឆែក នូវែលសេឡង់ អូស្ត្រាលី ថៃ តៃវ៉ាន់ ស៊ុយអែត សិង្ហបុរី និងអូស្ត្រាលី។
លោកថ្លែងថា៖ «ម្រេចរបស់យើងកំពុងមានទីផ្សារល្អនៅអន្តរជាតិក្នុងរយៈប៉ុន្មានឆ្នាំចុងក្រោយនេះ»។
លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជាដែលបានបង្កើតឡើងកាលពីឆ្នាំ ២០១៨ បានប្រាប់ភ្នំពេញប៉ុស្តិ៍កាលពីថ្ងៃចន្ទថា បើទោះបីជាបរិមាណនៃការនាំចេញម្រេចបន្តកើនឡើងក្នុងអំឡុងពេលនេះ ប៉ុន្តែតម្លៃម្រេចមិនទាន់ងើបឡើងវិញនោះទេ បន្ទាប់ពីការធ្លាក់ចុះជាបន្តបន្ទាប់។
លោកបានឱ្យដឹងថា សមាជិករបស់សហព័ន្ធទាំងអស់បាននាំចេញម្រេចក្នុងបរិមាណសរុបប្រមាណ ៣ ០០០ តោន ក្នុងរយៈពេល ៩ ខែដើមឆ្នាំនេះ ចំណែកតម្លៃម្រេចស្ថិតនៅចន្លោះពី ៩ ០០០ រៀលទៅ ១០ ០០០ រៀលប៉ុណ្ណោះក្នុង ១ គីឡូក្រាម។
លោកបញ្ជាក់ថា៖ «តម្លៃម្រេចនេះមិនអាចឱ្យកសិករដាំម្រេចចំណេញបាននោះទេ ព្រោះថ្លៃដើមផលិតរបស់យើងនៅខ្ពស់ជាងគេ ហើយខ្ញុំជឿថា តម្លៃដែលកសិករអាចទទួលប្រាក់ចំណេញគឺចាប់ពី ១២ ០០០ រៀល ក្នុង ១ គីឡូក្រាមឡើងទៅ»។
តម្លៃម្រេចក្រៅតំបន់សម្គាល់ភូមិសាស្ត្រ «កំពត-កែប» បានហក់ឡើងបន្តិចវិញកាលពីអំឡុងត្រីមាសទី ២ ឆ្នាំនេះ បន្ទាប់ពីម្រេចនៅប្រទេសវៀតណាមឡើងថ្លៃ ប៉ុន្តែក្រោយមកក៏ធ្លាក់ចុះវិញ ប៉ុន្តែតម្លៃម្រេចនៅក្នុងតំបន់សម្គាល់ភូមិសាស្ត្រ GI គ្មានការប្រែប្រួលឡើយអស់រយៈពេល ៥ ឆ្នាំជាប់គ្នា។
សព្វថ្ងៃម្រេចរបស់កម្ពុជាស្ទើរទាំងស្រុងពឹងផ្អែកលើទីផ្សាររបស់វៀតណាម និងថៃ ហើយផលិតផលម្រេច ១ ផ្នែកទៀតបាននាំចេញទៅកាន់ទីផ្សារអាល្លឺម៉ង់តាមរយៈក្រុមហ៊ុនឯកជនដែលជាសមាជិកសហព័ន្ធ។
លោកប៉ាន់ប្រមាណថា ទិន្នផលម្រេចឆ្នាំ ២០២០ នេះនឹងបន្តធ្លាក់ចុះដោយប្រមូលផលបានចន្លោះពី ១៥ ០០០ តោន ទៅ ១៧ ០០០ តោននៃផ្ទៃដាំដុះម្រេចសរុបប្រមាណ ៧ ០០០ ហិកតា ខណៈឆ្នាំមុនទិន្នផលទទួលបានចំនួន ២១ ០០០ តោន។
លោកបញ្ជាក់ថា៖ «ទិន្នផលម្រេចធ្លាក់ចុះច្រើនឆ្នាំនេះ ដោយសារដំណាំម្រេចរងការខូចខាតជាច្រើនហិកតាដោយសារបញ្ហាអាកាសធាតុ និងការបោះបង់ការថែទាំរបស់កសិករបណ្តាលមកពីតម្លៃម្រេចចុះថោកពេកនាឆ្នាំកន្លងមក»។
ទោះជាបែបនេះក្តី លោកនៅតែមានសុទិដ្ឋិនិយមថា តាមរយៈកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-ចិនដែលនឹងចូលជាធរមាននៅឆ្នាំក្រោយ នឹងជួយបើកទីផ្សារឱ្យម្រេចក្រៅតំបន់ GI បន្ថែមទៀត។
លោកថា៖ «យើងពិតជាចង់បានទីផ្សារនៅប្រទេសចិន អាមេរិក កូរ៉េ និងទិសផ្សេងទៀត ព្រោះម្រេចយើងមានគុណភាពល្អ និងឈ្ងុយឆ្ងាញ់ បើធៀបជាមួយម្រេចរបស់វៀតណាម»។
លោកបន្តថា៖ «យើងសប្បាយចិត្តដែលរដ្ឋាភិបាលបង្កើតឱ្យកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន ព្រមទាំងកិច្ចព្រមព្រៀងជាមួយកូរ៉េ និងបណ្តាប្រទេសផ្សេងទៀតដែលនឹងផ្តល់ឱកាសសមាជិករបស់យើងអាចនាំចេញម្រេចទៅផ្សារពិភពលោក»។
លោក ងួន ឡាយ ប្រធានសមាគមលើកកម្ពស់ម្រេចកំពតបានអះអាងថា តម្លៃម្រេចកំពតមានស្ថិរភាពរយៈពេល ៥ ឆ្នាំរួមទាំងឆ្នាំនេះផង ដោយម្រេចខ្មៅមានតម្លៃ ១៥ ដុល្លារ ម្រេចក្រហមមានតម្លៃ ២៥ ដុល្លារ និង ម្រេចសមានតម្លៃ ២៨ ដុល្លារក្នុង ១ គីឡូក្រាមដូចគ្នា។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានបង្ហាញថា ការនាំចេញម្រេចសរុបទាំងម្រេចសម្គាល់ភូមិសាស្ត្រ និងនៅក្រៅតំបន់សម្គាល់ភូមិសាស្ត្រចំនួនជាង ៣ ៦៩៣ តោន កាលពីឆ្នាំ ២០១៩ ដោយមានកំណើន ៥៣,១៧ ភាគរយ ធៀបនឹងរយៈពេលដូចគ្នាឆ្នាំ ២០១៨ ដែលមាន ២ ៤១១ តោន៕ LA
