ភ្នំពេញ: ការនាំចេញរបស់កម្ពុជាទៅកាន់ប្រទេសជប៉ុនមានតម្លៃជាង ១ ពាន់លានដុល្លារ ក្នុងរយៈពេល ៩ ខែ ឆ្នាំ ២០១៩ នេះបានកើនឡើងជាង ៨ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន (Jetro)។
យោងតាមទិន្នន័យ Jetro កម្ពុជាបាននាំចេញផលិតផលគិតជាទឹកប្រាក់ជាង ១,២ ពាន់លានដុល្លារ គិតចាប់ពីខែមករាដល់ខែកញ្ញាឆ្នាំនេះកើនឡើង ៨,៤ ភាគរយ ខណៈការនាំចូលរបស់កម្ពុជាមកវិញមានតម្លៃជាង ៣៩៨ លានដុល្លារ កើនឡើង ៣៦ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃពុធថា កំណើននាំចេញរបស់កម្ពុជាទៅកាន់ទីផ្សារជប៉ុនគឺជាការរួមចំណែករបស់រដ្ឋាភិបាលក្នុងជួយសម្រួលដល់ក្រុមហ៊ុននាំចេញក្នុងការកាត់បន្ថយភាពស្មុគស្មាញលើឯកសារនាំចេញ ពិសេសការប្រតិបត្តិការឯកសារនាំចេញតាមប្រព័ន្ធអនឡាញ។
លោកថ្លែងថា៖ «យើងមានមោទនភាពចំពោះតួលេខទំហំពាណិជ្ជកម្មទ្វេភាគីកម្ពុជា ជប៉ុន មានការកើនឡើង និងជាការខិតខំរបស់ប្រទេសទាំង ២ ក្នុងការកៀរគរ វិនិយោគិនធុរកិច្ច និងការសម្រួលពាណិជ្ជកម្មរបស់ក្រសួងពាក់ព័ន្ធដែលធ្វើឲ្យតួលេខពាណិជ្ជកម្មកើនឡើង»។
បើតាមលោក ស៊ាង ថៃ កម្ពុជាបាននាំចេញផលិតផលទៅប្រទេសជប៉ុនភាគច្រើន សម្លៀកបំពាក់ និងស្បែកជើង គ្រឿងបន្លាស់រថយន្ត គ្រឿងផ្គុំអេឡិចត្រូនិក ជាដើម។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា កំណើនការនាំចេញរបស់កម្ពុជាទៅទីផ្សារជប៉ុននៅពេលនេះគឺបានរួមចំណែកយ៉ាងសំខាន់ពីកំណើនវិនិយោគិនជប៉ុនមកកម្ពុជានៅប៉ុន្មានឆ្នាំចុងក្រោយនេះ។ លោកថ្លែងថា៖ «រោងចក្រជប៉ុនគាត់មកកម្ពុជាច្រើននៅក្នុងតំបន់សេដ្ឋកិច្ចពិសេស ដែលភាគច្រើនផលិតដើម្បីនាំចេញទៅជប៉ុនវិញ វាជាសញ្ញាល្អដែលបង្ហាញថា ក្រុមហ៊ុនមានការកើនឡើង»។
ក្នុងកិច្ចប្រជុំគណៈកម្មាធិការចម្រុះកម្ពុជា ជប៉ុន លើកទី ១៨ កាលពីថ្ងៃទី ៧ វិច្ឆិកា លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថា វិនិយោគរបស់ជប៉ុនក្នុងវិស័យកម្មន្តសាលមិនមែនវាយនភណ្ឌ រួមមានការផលិតបរិក្ខារ អេឡិចត្រូនិក និងអគ្គិសនី ការផលិតគ្រឿងបន្លាស់រថយន្ត ជាដើមបានរួមចំណែកដល់ការធ្វើពិពិធកម្មមូលដ្ឋានសេដ្ឋកិច្ចកម្ពុជា ការអភិវឌ្ឍធនធានមនុស្ស ដែលស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥។
យោងតាមទិន្នន័យ CDC គិតត្រឹមខែកញ្ញា ឆ្នាំ ២០១៩ នេះបានចុះបញ្ជីគម្រោងវិនិយោគជប៉ុនចំនួន ១៤១ គម្រោងដែលមានទុនវិនិយោគ ២,៥ ពាន់លានដុល្លារក្នុងនោះគម្រោងចំនួន ៦៦ ស្ថិតនៅតំបន់សេដ្ឋកិច្ចពិសេស ដែលមានទុនវិនិយោគប្រមាណ ៣៤០ លានដុល្លារ។
របាយការណ៍ធនាគារជាតិនៃកម្ពុជា (NBC) បានបង្ហាញថា ក្នុងឆមាសទី ១ ឆ្នាំ ២០១៩ ការនាំចេញរបស់កម្ពុជាទៅកាន់ទីផ្សារអន្តរជាតិមានតម្លៃសរុប ៦,៨ ពាន់លានដុល្លារក្នុងនោះជប៉ុននៅចំណាត់ថ្នាក់ទី ៤ ជាមួយនឹងចំណែកទីផ្សារ ៧,៧ ភាគរយ។ រីឯការនាំចូលទំនិញមកកម្ពុជាប្រទេស ជប៉ុន ឈរនៅលេខរៀងទី ៤ ដោយមានចំណែកទីផ្សារ ៤,៥ ភាគរយ ក្នុងចំណោមការនាំចូលសរុប ១០,៥ ពាន់លានដុល្លារ៕LA