ភ្នំពេញៈ ការនាំចេញទំនិញកម្ពុជាទៅកាន់ទីផ្សារអន្តរជាតិសម្រេចបានជិត ១១ ពាន់លានដុល្លារ ក្នុងរយៈពេល ១០ ខែដំបូង ឆ្នាំ ២០១៩ ដែលរួមចំណែកភាគច្រើនមកពីវិស័យកាត់ដេរ វាយនភណ្ឌ ស្បែកជើង និងផលិតផលធ្វើដំណើរ។ នេះបើយោងតាមរបាយការណ៍ពាណិជ្ជកម្ម។
របាយការណ៍ដែលត្រូវបានចេញផ្សាយកាលពីថ្ងៃម្សិលមិញបង្ហាញថា ការនាំចេញទំនិញកម្ពុជាសម្រេចបានជាង ១០,៨ ពាន់លានដុល្លារ ទៅកាន់ទីផ្សារអន្តរជាតិក្នុងរយៈពេល ១០ ខែដំបូងឆ្នាំនេះកើនឡើង ៦,៤៥ ភាគរយ បើធៀបនឹងរយៈពេលដូចគ្នាកាលពីឆ្នាំមុនដែលមានតម្លៃ ១០,១៤ ពាន់លានដុល្លារ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ ២០១៩ និងទិសដៅអនុវត្តការងារពាណិជ្ជកម្មឆ្នាំ ២០២០ ពីថ្ងៃពុធថា ដើម្បីជំរុញការនាំចេញផលិតផលទៅទីផ្សារអន្តរជាតិ ក្រសួងកំពុងបន្តពង្រឹងចង្វាក់ផលិតកម្ម និងធ្វើពិពិធកម្មទីផ្សារនាំចេញតាមរយៈការធ្វើសមាហរណកម្មក្នុងសហគមន៍សេដ្ឋកិច្ចអាស៊ាន។
លោកថ្លែងថា៖ «ការចរចាបង្កើតតំបន់ពាណិជ្ជកម្មសេរី និងការពង្រីកទំនាក់ទំនងពាណិជ្ជកម្មអន្តរជាតិកំពុងតែត្រូវបានយកចិត្តទុកដាក់»។
លោកបានបន្តថា ដើម្បីចូលរួមប្រកួតប្រជែងក្នុងក្របខ័ណ្ឌតំបន់ និងពិភពលោក ក្រសួងពាណិជ្ជកម្មកំពុងខិតខំ ពង្រឹងសមត្ថភាព និងប្រសិទ្ធភាពការងារមន្ត្រីរាជការតាមរយៈការពង្រឹងធនធានមនុស្ស ការធ្វើកំណែទម្រង់រចនាសម្ព័ន្ធរដ្ឋបាល គ្រប់គ្រង និងការកែលម្អសេវាសាធារណៈជាដើម។
លោកបន្តថា៖ «ការការពារកម្មសិទ្ធិបញ្ញា ការការពារអ្នកប្រើប្រាស់ និងការបង្កើនប្រសិទ្ធភាពត្រួតពិនិត្យ ព្រមទាំងការបង្ក្រាបការក្លែងបន្លំផលិតផល និងសេវាកម្មក៏ត្រូវបានអនុវត្តដោយយកចិត្តទុកដាក់បំផុតផងដែរ»។
លោក វ៉ាន់ សូអៀង ប្រធានសមាគមរោងចក្រកាត់ដេរនៅកម្ពុជា (GMAC) ថ្លែងក្នុងសន្និសីទនេះថា ក្រសួងពាណិជ្ជកម្មបានធ្វើឲ្យមានភាពងាយស្រួលនូវនីតិវិធីការងារ ការធ្វើទំនើបកម្មវិធីសាស្ត្រ និងការកាត់បន្ថយការចំណាយប្រាក់ និងពេលវេលា។
លោកថ្លែងថា៖ «នៅក្នុងតំបន់ យើងឃើញថាការកើនឡើងថ្លៃដើមយ៉ាងឆាប់រហ័សដែលទាមទារឲ្យមានការទូទាត់ពីការសន្សំពីតំបន់ផ្សេងៗទៀត ដូចជាការធ្វើឲ្យប្រសើរឡើងនូវផលិតភាព និងការកាត់បន្ថយថ្លៃដើមប្រតិបត្តិការអាជីវកម្ម»។ លោកបន្តថា៖ «ដោយមានអ្នកបញ្ជាទិញកាន់តែច្រើនទាមទារពេលវេលាកាន់តែខ្លី ការកម្រិតចង្វាក់ផ្គត់ផ្គង់ក្នុងស្រុករបស់យើងតម្រូវឲ្យមានគោលនយោបាយគាំទ្រ ដើម្បីដោះស្រាយ»។
លោកបន្ថែមថា៖ «ក្នុងកម្រិតអន្តរជាតិ យើងឃើញមានបញ្ហាសង្គ្រាមពាណិជ្ជកម្មរវាងអាមេរិក និងចិន ដែលកំពុងគំរាមកំហែងដល់សេដ្ឋកិច្ចពិភពលោក ការគំរាមកំហែងពីបញ្ហា EBA ការចាកចេញពីអឺរ៉ុបរបស់ប្រទេសអង់គ្លេស និងបញ្ហាបរិយាកាសពាណិជ្ជកម្ម និងជំនួញដែលមានភាពប្រែប្រួលលឿនពិបាកប៉ាន់ស្មានបាន»។
លោកបន្តថា ជាការពិតណាស់នៅមានរឿងជាច្រើនទៀតដែលត្រូវធ្វើការឆ្លើយតបទៅនឹងបរិយាកាសពិភពលោកដែលមានការប្រែប្រួលយ៉ាងលឿន ខណៈក្រសួងត្រូវតែបន្តប្រកបដោយភាពច្នៃប្រឌិតមានព័ត៌មានត្រឹមត្រូវអំពីការអភិវឌ្ឍ និងនិន្នាការសកល និងត្រៀមខ្លួនក្នុងការសម្របខ្លួន ឬផ្លាស់ប្តូរនៅពេលដែលស្ថានភាពតម្រូវ។
លោកបានថ្លែងថា៖ «ពេលនេះជាងពេលណាៗទាំងអស់ដែលថា ផលប្រយោជន៍រួមរបស់ជាតិគួរមានឧត្តមភាពលើផលប្រយោជន៍បុគ្គល។ កម្ពុជាធ្លាប់មានប្រវត្តិសាស្ត្រដ៏ត្រចះត្រចង់ ហើយយើងទាំងអស់គ្នាមានភារកិច្ចក្នុងការទាមទារយកមកវិញនូវភាពរុងរឿងត្រចះត្រចង់នេះលើឆាកអន្តរជាតិ»។
បើយោងតាមទិន្នន័យការនាំចេញសម្លៀកបំពាក់មានតម្លៃ ៦,៤ ពាន់លានដុល្លារ វាយនភណ្ឌ ៤០ លានដុល្លារ ស្បែកជើង ៩០៥ លានដុល្លារ អង្ករជាង ២៨៦ លានដុល្លារ និងផលិតផលផ្សេងទៀតជាង ៣,១ ពាន់លានដុល្លារ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) ប្រាប់ភ្នំពេញប៉ុស្តិ៍កាលពីថ្ងៃពុធថា ការនាំចេញអង្ករកម្ពុជាទៅកាន់ទីផ្សារអន្តរជាតិសម្រេចបានជាង ៥១ ម៉ឺនតោន ក្នុងរយៈពេល ១១ ខែដំបូងឆ្នាំ ២០១៩ នេះ កើនឡើង ៣,៤ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ លោកថ្លែងថា៖ «ការកើនឡើងនេះជាការរួមចំណែកការនាំចេញទៅទីផ្សារចិន និងការពង្រីកទីផ្សារថ្មីៗនៅតំបន់អាស៊ាន និងប្រទេសអូស្ត្រាលី»៕