.jpg)
ក្រុងបាងកកៈ ក្រសួងពាណិជ្ជកម្មថៃបានឲ្យដឹងថា ការនាំចេញរបស់ប្រទេស ថៃ បានកើនឡើងឥតរំពឹងទុកកាលពីខែកុម្ភៈ បន្ទាប់ពីធ្លាក់ចុះ ៣ខែជាប់គ្នា ដោយសារការនាំចេញម្តងម្កាលនូវអាវុធ និងសព្វាវុធ។ នេះបើយោងតាមកាសែតបាងកកប៉ុស្តិ៍នៅថ្ងៃព្រហស្បតិ៍។
ការនាំចេញនៅខែកុម្ភៈ បានកើនឡើង ៥,៩១ ភាគរយធៀបនឹងរយៈពេលដូចគ្នាកាលពីឆ្នាំមុន ខណៈដែលការព្យាកររបស់ទីភ្នាក់ងារព័ត៌មាន Reuters បានបង្ហាញថាធ្លាក់ចុះ ១ ភាគរយ។ ការនាំចេញ គឺជាកត្តាចម្បងមួយនៃកំណើនសេដ្ឋកិច្ចរបស់ប្រទេស ថៃ។
កាលពីខែមករា ការនាំចេញធ្លាក់ ៥,៦៥ ភាគរយធៀបនឹងពេលដូចគ្នាកាលពីឆ្នាំមុន។
ក្រសួងពាណិជ្ជកម្មថៃបានឲ្យដឹងទៀតថា កំណើននាំចេញនៅខែកុម្ភៈនេះ កើតមានឡើងដោយសារការនាំចេញអាវុធ និងសព្វាវុធ បន្ទាប់ពីមានសមយុទ្ធយោធា បើមិនដូច្នេះទេ នឹងធ្លាក់ចុះ ៣,៤ ភាគរយ។
កាសែតបាងកកប៉ុស្តិ៍បានរាយការណ៍ទៀតថា ការនាំចេញរថយន្ត និងគ្រឿងបន្លាស់រថយន្តបានធ្លាក់ចុះ ៧,៩ ភាគរយនៅខែកុម្ភៈធៀបនឹងរយៈពេលដូចគ្នាកាលពីឆ្នាំមុន ខណៈដែលការនាំចេញកុំព្យូទ័រ និងគ្រឿងបន្លាស់កុំព្យូទ័របានធ្លាក់ចុះ ១៤,១ ភាគរយ។
នៅខែកុម្ភៈ ការនាំចូលបានធ្លាក់ចុះ ១០,៣ ធៀបនឹងរយៈពេលដូចគ្នានៅឆ្នាំមុន បន្ទាប់ពីកើនឡើងដ៏គួរឲ្យភ្ញាក់ផ្អើល ១៣,៩៩ ភាគរយនៅខែមករា។
សម្រាប់ខែកុម្ភៈ ថៃទទួលបានអតិរេកពាណិជ្ជកម្ម ៤,០៣ ពាន់លានដុល្លារធៀបនឹងការព្យាករដែលថាមានត្រឹមតែ ០,១៤ ពាន់លានដុល្លារ ខណៈដែលរងឱនភាពពាណិជ្ជកម្មចំនួន ៤,០៣ ពាន់លានដុល្លារនៅខែមករា។
ក្រសួងព្យាករថា ការនាំចេញនឹងកើន ៨ ភាគរយនៅឆ្នាំនេះ បន្ទាប់ពីធ្លាក់ចុះ ៦,៧ ភាគរយនៅឆ្នាំ ២០១៨៕ KC
