.jpg)
បុរសម្នាក់កំពុងសម្លឹងមើលការុងអង្ករក្នុងឃ្លាំងស្តុក ១ ក្នុងរាជធានីភ្នំពេញ។ ហុង មិនា
ភ្នំពេញៈ រដ្ឋាភិបាលកម្ពុជាបានសម្រេចបើកឲ្យមានការនាំចេញស្រូវ អង្ករស និងត្រីទៅកាន់ទីផ្សារអន្តរជាតិឡើងវិញចាប់ពីថ្ងៃពុធទៅ ក្រោយពីបានសម្រេចឲ្យផ្អាកកាលពីអំឡុងដើមខែមេសា ខណៈអ្នកសេដ្ឋកិច្ចនិយាយថា វានឹងចូលរួមចំណែកប៉ះប៉ូវការខាតបង់សេដ្ឋកិច្ចដែលរងផលប៉ះពាល់ពីជំងឺកូវីដ១៩ បានមួយចំណែក។
លទ្ធផលកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃសុក្រសប្តាហ៍មុនបានឲ្យដឹងថា រាជរដ្ឋាភិបាលកម្ពុជាសម្រេចផ្តល់ការអនុញ្ញាតឲ្យធ្វើការនាំចេញស្រូវ អង្ករស និងត្រីទៅក្រៅប្រទេសឡើងវិញចាប់ពីថ្ងៃទី ២០ ខែឧសភា ឆ្នាំ ២០២០ នេះតទៅគឺដូចមុនពេលប្រកាសបិទ ដោយផ្អែកលើតុល្យភាពស្បៀងសម្រាប់តម្រូវការក្នុងប្រទេស បន្ទាប់ពីត្រូវបានផ្អាកការនាំចេញនាពេលកន្លងមក។
ការនាំចេញស្រូវ អង្ករស និងផលនេសាទពីកម្ពុជាទៅក្រៅប្រទេសត្រូវបានរដ្ឋាភិបាលសម្រេចផ្អាកជាបណ្តោះអាសន្នកាលពីអំឡុងដើមខែមេសា ក្រោមហេតុផលដើម្បីធានាការផ្គត់ផ្គង់ក្នុងស្រុក ខណៈការរីករាលដាលនៃជំងឺកូវីដ១៩ បានធ្វើឲ្យតម្រូវការស្តុកទុកស្បៀងបានកើនឡើងយ៉ាងច្រើននៅគ្រប់ប្រទេសលើពិភពលោក។ បើតាមលោកនាយករដ្ឋមន្ត្រី ហ៊ុន សែន ការសម្រេចដាក់ចេញនូវវិធានការផ្អាកការនាំចេញគឺដើម្បីធានាស្ថិរភាពស្តុកក្នុងស្រុកឲ្យមានភាពរឹងមាំ ដែលអាចឆ្លើយតបនឹងតម្រូវការប្រើប្រាស់ក្នុងស្រុក។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា រដ្ឋាភិបាលតែងតែឃ្លាំមើលស្ថានភាពការបង្កបង្កើនផលរបស់ប្រជាកសិករ ការស្តុកទុក និងទីផ្សារពិភពលោកជាប្រចាំ ហេតុនេះការសម្រេចបើកឲ្យមានការនាំចេញឡើងវិញគឺមានន័យថា កម្ពុជាមានសមត្ថភាពគ្រប់គ្រាន់សម្រាប់ការប្រើប្រាស់ក្នុងស្រុក និងនាំចេញវិញបានហើយ។
លោកបានថ្លែងថា៖ «ខណៈប្រទេសមួយចំនួននៅបន្តបិទការនាំចេញផលិតផលកសិកម្ម និងផលនេសាទនោះ ការបើកឡើងវិញពេលនេះវាមិនត្រឹមតែបង្ហាញពីសមត្ថភាពរបស់កម្ពុជាប៉ុណ្ណោះទេ តែវាជាឱកាសក្នុងការពង្រីកទីផ្សារផងដែរ»។
លោកបន្ថែមថា ការនាំចេញអង្ករស ស្រូវ និងត្រី នឹងជួយប៉ះប៉ូវសេដ្ឋកិច្ចដែលបណ្តាលមកពីការធ្លាក់ចុះនៃវិស័យសេវាកម្ម ពិសេសវិស័យទេសចរណ៍បានមួយកម្រិត។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានប្រាប់ភ្នំពេញ-ប៉ុស្តិ៍កាលពីដើមខែឧសភានេះថា ក្រសួងកំពុងខិតខំយ៉ាងសកម្មក្នុងការពង្រីង និងពង្រឹកការដាំដុះដំណាំកសិកម្ម និងធ្វើវារីវប្បកម្មដើម្បីបង្កើនសក្តានុពលក្នុងការផ្គត់ផ្គង់តម្រូវការក្នុងស្រុក និងឈានទៅនាំចេញទៅកាន់ទីផ្សារអន្តរជាតិ។
លោកប្រាប់ទៀតថាលោក និងក្រុមការងារជំនាញតែងតែចុះទៅពិនិត្យ និងលើកទឹកចិត្តឲ្យប្រជាកសិករ និងក្រុមហ៊ុនបង្កើនការវិនិយោគលើវិស័យកសិកម្ម និងធ្វើវារីវប្បកម្មជាប្រចាំ ព្រោះវាមិនត្រឹមតែអាចជួយបង្កើតការងារឲ្យប្រជាជនក្នុងស្រុកប៉ុណ្ណោះទេ តែវាថែមទាំងបង្កើនសក្តានុពលផលិតផលផលិតក្នុងស្រុកដើម្បីនាំចេញផងដែរ។
លោក ហុង វណ្ណៈ អ្នកស្រាវជ្រាវនៃរាជបណ្ឌិត្យសភាកម្ពុជានិយាយថា ការសម្រេចរបស់រដ្ឋាភិបាលក្នុងការបើកឲ្យមានការនាំចេញស្រូវ អង្ករស និងត្រីនៅពេលខាងមុខនឹងផ្តល់ភាពវិជ្ជមានច្រើនសម្រាប់សេដ្ឋកិច្ចកម្ពុជា ព្រោះការបិទនាំចេញកន្លងមកកម្ពុជាគឺអាចបំពេញស្តុកទុកក្នុងស្រុកគ្រប់គ្រាន់ហើយ។ ការរក្សាស្តុកទុកច្រើនហួសកំណត់មិនមែនជារឿងល្អទេ ដោយវាអាចទាញទម្លាក់តម្លៃកសិផលដែលប្រជាកសិករផលិតបានទៀតផង។
លោកថ្លែងថា៖ «បន្ទាប់ពីការបិទនាំចេញមួយរយៈដើម្បីរក្សាស្ថិរភាពស្បៀងទាំងបរិមាណ និងតម្លៃរួចមក ការបើកឲ្យនាំចេញវិញនេះនឹងជួយឲ្យសេដ្ឋកិច្ចកម្ពុជាមានភាពល្អប្រសើរឡើងវិញមួយកម្រិត»។
លោកបន្ថែមថា ការដែលរដ្ឋាភិបាលសម្រេចបើកឲ្យមានការនាំចេញនេះ ក៏ដោយសារជំងឺកូវីដ១៩ នៅកម្ពុជាក៏ដូចជាប្រទេសមួយចំនួនកំពុងមានភាពល្អប្រសើរ។
លោក វណ្ណៈ លើកឡើងថា បទពិសោធកូវីដ១៩គឺជាការដាស់តឿនមួយឲ្យប្រជាកសិករ និងក្រុមអ្នកវិនិយោគត្រូវខិតខំពង្រឹងការវិនិយោគលើវិស័យកសិកម្មឲ្យបានកាន់តែច្រើន និងមានគុណភាព សុវត្ថិភាព ដើម្បីឈានទៅឯករាជភាពការផ្គត់ផ្គង់ក្នុងស្រុក និងឈានទៅនាំចេញឲ្យបានច្រើន។
ទិន្នន័យពីក្រសួងកសិកម្ម រុក្ខាប្រមាញ់ និងនេសាទបានបង្ហាញថា ក្នុងរយៈពេល ៤ ខែ ឆ្នាំ ២០២០ កម្ពុជាបាននាំចេញអង្ករទៅកាន់ទីផ្សារអន្តរជាតិ ៣០០ ២៥២ តោនកើនឡើង ៤០,៤៦ ភាគរយធៀបនឹងរយៈពេលដូចគ្នាកាលពីឆ្នាំ ២០១៩ ដែលមានចំនួន ២១៣ ៧៦៣ តោន។ ចំណែកទឹកប្រាក់ដែលទទួលបានពីការនាំចេញក្នុងរយៈពេល ៤ ខែនេះគឺ ២១០ លានដុល្លារ។
របាយការណ៍របស់សហព័ន្ធស្រូវអង្ករកម្ពុជាបានឲ្យដឹងថា កាលពីឆ្នាំ ២០១៩ ការនាំអង្ករកម្ពុជាចេញទៅកាន់ទីផ្សារអន្តរជាតិមានតម្លៃប្រមាណ ៥០១ លានដុល្លារធ្លាក់ចុះ ៤,៣ ភាគរយបើធៀបឆ្នាំ ២០១៨ ដែលមាន ៥២៤ លានដុល្លារ។
ចំណែកក្នុងរយៈពេល ៣ ខែ ឆ្នាំ ២០២០ កម្ពុជាបាននាំចេញផលនេសាទ ៣ ៤៧៥ តោន កើន ០,៧២ ភាគរយធៀបទៅនឹងរយៈពេលដូចគ្នាឆ្នាំ ២០១៩ ដែលមាន ៣ ៤៥០ តោន។ កាលពីឆ្នាំ ២០១៩ កម្ពុជានាំចេញផលនេសាទសរុប ១៤១០០ តោនធ្លាក់ ២,២៥ ភាគរយធៀបនឹងឆ្នាំ ២០១៨ ដែលមាន ១៤ ៥០០ តោន។ នេះបើតាមក្រសួងកសិកម្ម៕ LA
វីដេអូ៖
