.jpg)
ចម្ការស្វាយមួយកន្លែងក្នុងស្រុកល្វាឯម ខេត្តកណ្ដាល។ ហេង ជីវ័ន
ភ្នំពេញៈ អ្នកនាំពាក្យក្រសួងការបរទេសចិនបានឱ្យដឹងក្នុងសន្និសីទព័ត៌មានកាលពីថ្ងៃទី ១៤ ខែឧសភាថា ប្រទេសចិន បានចាត់វិធានការពិសេស ដើម្បីជួយសម្រួលដល់ការនាំចូលផ្លែស្វាយស្រស់ដែលមានគុណភាពពីកម្ពុជាទៅកាន់ទីផ្សារចិន ហើយរំពឹងថា ស្វាយស្រស់ចំនួន ១០០ ០០០ តោននឹងចូលទីផ្សារចិននៅក្នុងឆ្នាំនេះ។
ការលើកឡើងនេះធ្វើឡើង បន្ទាប់ពីស្វាយស្រស់ពីកម្ពុជាប្រហែល ១០០ តោន ត្រូវបាននាំចេញដោយផ្ទាល់ទៅប្រទេសចិនកាលពីថ្ងៃទី ៧ ឧសភា។
លោកស្រី Hua Chunying បានឆ្លើយតបនឹងសំណួររបស់ Beijing Youth Daily ថា នាយកដ្ឋានពាក់ព័ន្ធរបស់ចិនបានជម្នះបញ្ហាជាច្រើនដែលបណ្ដាលមកពីជំងឺកូវីដ ១៩ និងមានកិច្ចសហប្រតិបត្តិការពាណិជ្ជកម្មប្រកបដោយប្រសិទ្ធភាព និងជាក់ស្ដែងផ្នែកផលិតផលកសិកម្ម តាមរយៈមធ្យោបាយនវានុវត្តន៍នៃការត្រួតពិនិត្យដាច់ដោយឡែកតាមរយៈវីដេអូខន ហ្វើរិន។
លោកស្រីបន្តថា កិច្ចសហប្រតិបត្តិការនេះមិនគ្រាន់តែជួយសម្រេចបានតាមតម្រូវការអតិថិជនចិនប៉ុណ្ណោះទេ តែថែមទាំងជួយកសិករកម្ពុជាផងដែរ។
លោកស្រីថ្លែងថា៖ «ព័ត៌មាននេះទទួលបានការយកចិត្តទុកដាក់យ៉ាងខ្លាំង និងស្វាគមន៍ដោយកក់ក្ដៅពីវិស័យទាំងអស់នៅប្រទេសកម្ពុជា។ កិច្ចសហប្រតិបត្តិការនេះ គឺលើសពីផ្លែស្វាយស្រស់ទៅទៀត។ វាជា ការបង្ហាញពីមិត្តភាពជាបងប្អូនរវាងប្រទេសយើងទាំង ២»។
លោកស្រីបានបន្ថែមថា៖ «ក្នុងនាមជាមិត្តដែកថែបកម្ពុជាបានចែករំលែកសុវត្ថិភាព និងការពិបាក ហើយប្រទេសចិននឹងសហការជាមួយប្រទេសកម្ពុជា ដើម្បីធ្វើឱ្យកិច្ចសហប្រតិបត្តិការជាក់ស្ដែងកាន់តែស៊ីជម្រៅបន្តទៀតនៅក្នុងវិស័យនានា ដែលរួមទាំងផលិតកម្មកសិកម្ម ដើម្បីនាំយកអត្ថប្រយោជន៍ជាក់ស្ដែងដល់ប្រជាជនរបស់ប្រទេសទាំង ២»។
ការនាំចេញជាផ្លូវការនេះធ្វើឡើង បន្ទាប់ពីរដ្ឋបាលគយចិន កាលពីថ្ងៃទី ២៦ ខែមេសា បានអនុម័តជាផ្លូវការនូវបញ្ជីចម្ការស្វាយ និងរោងចក្រវេចខ្ចប់ចំនួន ៣៧ ដើម្បីនាំចេញស្វាយស្រស់ទៅប្រទេសចិន។
លោក វេង សាខុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទបានលើកឡើងថា លោករំពឹងថា ការនាំចេញស្វាយស្រស់នឹងបន្តកើនឡើងពី ១ ឆ្នាំ ទៅ ១ ឆ្នាំ។
យោងតាមក្រសួងកសិកម្ម កម្ពុជាបាននាំចេញស្វាយស្រស់ ១៤២ ៥៥៦ តោន នៅរយៈពេល ៤ ខែដំបូង ឆ្នាំ ២០២១ កើនឡើង ២៣៩,១៣ ភាគរយ ធៀបនឹងរយៈពេលដូចគ្នាកាលពីឆ្នាំ ២០២០។
គិតត្រឹមឆ្នាំ ២០២០ ស្វាយត្រូវបានដាំដុះលើផ្ទៃដី ១៣ ម៉ឺនហិកតាក្នុងនោះ ៩១ ១០៤ ហិកតា កំពុងប្រមូលផល។
ទិន្នផលជាមធ្យម ១,៣៨ លានតោនក្នុង ១ រដូវ៕ LA
