.jpg)
កម្មករកំពុងទាញការុងអង្ករនៅហាងលក់អង្ករមួយកន្លែង ក្នុងទីក្រុងភ្នំពេញកន្លងមក។ ហុង មិនា
ភ្នំពេញៈ ទោះបីកម្ពុជាបានបាត់បង់ការអនុគ្រោះពន្ធនាំចូលអង្ករទៅសហភាពអឺរ៉ុប (EU) ក៏ដោយក៏ការនាំចេញអង្កររបស់កម្ពុជាបានមើលឃើញកំណើន ៦ ភាគរយនៅត្រីមាសទី១ ឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន។ នេះបើតាមតួលេខបានពីលេខាធិការដ្ឋានសេវា ច្រកចេញចូលតែមួយសម្រាប់ការបំពេញបែបបទការនាំចេញអង្ករ។
អ្នកក្នុងឧស្សាហកម្មនេះបានឲ្យដឹងថា កំណើននេះគឺបានមកពីទីផ្សាររបស់ប្រទេស ចិន ដែលប៉ះប៉ូវដល់ដំណើរការយឺតនៅក្នុងទីផ្សារ EU។
របាយការណ៍បានបង្ហាញថា ការនាំចេញអង្កររបស់កម្ពុជានៅត្រីមាសដំបូងឆ្នាំនេះមានចំនួន ១៧០ ៨២១ តោន កើនឡើង ៦ ភាគរយពី ១៦១ ១១៥ តោនកាលពីឆ្នាំមុន។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា បានឲ្យដឹងថា កំណើននេះដោយសារតែកូតាថ្មី ដែលផ្ដល់ដោយរដ្ឋាភិបាលចិន ដែលអនុញ្ញាតឲ្យកម្ពុជានាំចូលអង្ករដោយរួចពន្ធទៅទីផ្សារចិនរហូតដល់ ៤០០ ០០០ តោន។ លោកថ្លែងថា៖ «អត្រាកំណើននេះគឺបានមក [ពីកូតាទីផ្សារចិន] ដែលលើកទឹកចិត្តដល់ក្រុមហ៊ុននាំចេញ ក្នុងការផ្ដោតលើទីផ្សារប្រទេស ចិន»។
លោកនាយករដ្ឋមន្ដ្រី ហ៊ុន សែន បានជួបជាមួយលោកប្រធានាធិបតី ស៊ី ជីនភីង ក្នុងអំឡុងដំណើរទស្សនកិច្ចរយៈពេល ៤ ថ្ងៃទៅទីក្រុងប៉េកាំងកាលពីខែមករា ដោយលើកឡើងថា លោក ស៊ី បានយល់ព្រមបន្ថែមកូតានាំចូលអង្ករពីកម្ពុជារហូតដល់ ៤០០ ០០០ តោន។
ទោះបីយ៉ាងនេះក្តី លោក ហ៊ុន ឡាក់ បានឲ្យដឹងថា ទីផ្សារ EU នៅតែមានស្ថិរភាព ដោយសារតែអតិថិជន នៅតែគាំទ្រអង្ករកម្ពុជា ទោះបីជាចំនួនអាចនឹងមិនកើនឡើងនៅពេលអនាគតក៏ដោយ។
ការនាំចេញអង្កររបស់កម្ពុជា បានធ្លាក់ចុះរួចហើយក្នុងរយៈពេលជិត ២ ឆ្នាំជាប់គ្នា ក្នុងគ្រាដែល EU មិនបានហូតពន្ធម្ល៉េះ ហើយអ្នកនៅក្នុងឧស្សាហកម្មនេះម្ដងហើយម្ដងទៀត បញ្ជាក់ថា ដោយសារតែការប្រកួតប្រជែងក្នុងចំណោមទីផ្សារអន្តរជាតិ។
វិស័យអង្ករកម្ពុជា បានបាត់បង់ការអនុគ្រោះពន្ធពាណិជ្ជកម្មនាំចេញដោយរួចពន្ធទៅកាន់សហភាពអឺរ៉ុបរយៈពេល ៣ ឆ្នាំ កាលពីថ្ងៃទី ១៧ ខែ មករា ឆ្នាំ ២០១៩ តាមបណ្តឹងរបស់អ៊ីតាលី និងអេស្ប៉ាញ។ ការយកពន្ធនេះ នឹងធ្វើឲ្យកម្ពុជាខាតបង់ប្រាក់ប្រហែល ៥៣ លានដុល្លារនៅឆ្នាំដំបូងបើផ្អែកលើចំនួនដែលកម្ពុជាបាននាំចេញទៅ EU កាលពីឆ្នាំមុន។
ប៉ុន្តែលោក សុង សារ៉ន ប្រធាន និងជាអគ្គនាយកក្រុមហ៊ុន Amru Rice (Cambodia) Co., Ltd បានឲ្យដឹងថា ការនាំចេញអង្កររបស់កម្ពុជាទៅ EU អាចបន្តកើនឡើងនៅឆ្នាំនេះ។
លោកថ្លែងថា៖ «ប្រសិនបើយើងនៅតែមានទីផ្សារ EU អត្រានេះនឹងកើនឡើងដល់ជាង ១០ ភាគរយធៀបនឹងចំនួនសរុប»។ លោកបន្តថា៖ «យើងអរគុណទីផ្សារចិន ដោយសារតែទីផ្សារនេះជួយធ្វើឲ្យតម្លៃស្រូវមានស្ថិរភាពសម្រាប់កសិករ»។
ចិន គឺជាទីផ្សារឈានមុខគេទីពីរសម្រាប់អង្ករកម្ពុជាបន្ទាប់ពីប្លុកអឺរ៉ុប។
កាលពីឆ្នាំមុន ប្រទេស កម្ពុជា បាននាំចេញអង្ករ ១៧០ ១៥៤ តោនទៅប្រទេស ចិន ខណៈការនាំចេញទៅ EU មានចំនួន ២៦៩ ១២៧ តោន។ កាលពីឆ្នាំមុនកម្ពុជា បាននាំចេញអង្ករ ៦២៦ ២២៥ តោន ធ្លាក់ចុះបន្តិចពី ៦៣៥ ៦៧៩ តោនកាលពីឆ្នាំ ២០១៧៕LA
