ភ្នំពេញៈ ការនាំចេញអង្កររបស់កម្ពុជាទៅកាន់ទីផ្សារអឺរ៉ុបនៅឆមាសទី ១ ឆ្នាំ ២០១៩ បានធ្លាក់ចុះធៀបនឹងចំណែកទីផ្សារចិន។ នេះបើយោងតាមរបាយការណ៍ពីលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ។
របាយការណ៍បង្ហាញថា ការនាំចេញអង្ករកម្ពុជាទៅកាន់ទីផ្សារអន្តរជាតិក្នុងឆមាសទី ១ ឆ្នាំ ២០១៩ មានចំនួន ២៨១ ៥៣៨ តោនកើនឡើង ៣,៧ ភាគរយធៀបនឹងរយៈពេលដូចគ្នាកាលពីឆ្នាំ ២០១៨ ក្នុងនោះចំណែកទីផ្សារចិនមានរហូតដល់ទៅជាង ៤០ ភាគរយនៃការនាំចេញសរុប ខណៈអឺរ៉ុបជាទីផ្សារឈានមុខនៃការនាំចេញអង្កររបស់កម្ពុជាបានធ្លាក់ចុះមកនៅជាង ៣៣ ភាគរយប៉ុណ្ណោះ។
ក្នុងចំណោមគោលដៅនាំចេញទាំង ៥០ ប្រទេស ចិន គឺជាទីផ្សារនាំមុខគេ ដោយគិតពីដើមខែមករាដល់ខែមិថុនាមានចំនួន ១១៨ ៤០១ តោនស្មើនឹង ៤២,០៦ ភាគរយ ខណៈដែលការនាំចេញទៅកាន់ទីផ្សារអឺរ៉ុបមានតែ ៩៣ ៥០៣ តោនប៉ុណ្ណោះស្មើនឹងជាង ៣៣ ភាគរយ។
កម្ពុជាបាននាំចេញអង្ករសរុប ៦២៦ ២២៥ តោនកាលពីឆ្នាំ ២០១៨ ក្នុងនោះការនាំចេញទៅសហភាពអឺរ៉ុបមានរហូតដល់ជាង ៤៣ ភាគរយនៃការនាំចេញសរុបដែលមានចំនួន ២៦៩ ១២៧ តោន ខណៈការនាំចេញទៅចិនមាន ១៧ ម៉ឺនតោនស្មើនឹង ២៧ ភាគរយ។
លោក សុង សារ៉ន នាយកប្រតិបត្តិក្រុមហ៊ុនអេមរុរ៉ាយស៍ដែលជាក្រុមហ៊ុននាំចេញឈានមុខគេទី ៣ នៅឆមាសទី ១ នេះបានឲ្យដឹងថា កំណើននៃការនាំចេញអង្ករកម្ពុជានៅពេលនេះភាគច្រើនបានមកពីបរិមាណនាំចេញអង្ករក្រអូបកើនឡើងដែលមានរហូត ៨៥ ភាគរយនៃការនាំចេញសរុប។
លោកថ្លែងថា៖ «យើងមិនសូវផ្តោតតែលើបរិមាណនៃការនាំចេញច្រើនទៀតទេ តែយើងផ្តោតសំខាន់ទៅលើគុណភាពនៃការនាំចេញដែលអាចធ្វើឲ្យយើងទទួលបានប្រាក់ចំណូលខ្ពស់»។
បច្ចុប្បន្នអង្ករក្រអូបលេខ ១ របស់កម្ពុជានៅលើទីផ្សារអន្តរជាតិមានតម្លៃប្រមាណ ៩៣០ ដុល្លារក្នុង ១ តោន និងអង្ករលេខ ២ តម្លៃប្រហែល ៧៦០ ដុល្លារ។ ចំណែកអង្ករសមានតម្លៃក្នុងចន្លោះពី ៣៦០ ដុល្លារទៅដល់ ៤៥០ ដុល្លារក្នុង ១ តោន។ នេះបើតាមលោក សុង សារ៉ន។
លោកបន្តថាការនាំចេញអង្ករនឹងកើនឡើងខ្ពស់នៅក្នុងឆមាសទី ២ បើបរិមាណនៃការនាំចេញទៅកាន់ប្រទេសចិនអាចសម្រេចបានទៅតាមកូតា ៤០ ម៉ឺនតោនដែលផ្តល់ដោយរដ្ឋាភិបាលចិន។
ការបន្ថែមកូតានេះធ្វើឡើងបន្ទាប់ពីសហភាពអឺរ៉ុបបានសម្រេចយកពន្ធនាំចូលអង្ករពីកម្ពុជាចាប់តាំងពីខែមករាទៅតាមបណ្តឹងរបស់ប្រទេសអ៊ីតាលី និងអេស្ប៉ាញ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ថា ដើម្បីជំរុញកំណើននៃការនាំចេញអង្ករទៅកាន់ទីផ្សារអន្តរជាតិ ក្រសួងពាណិជ្ជកម្ម និងផ្នែកពាក់ព័ន្ធកំពុងប្រឹងប្រែងដើម្បីបើកទីផ្សារឲ្យកាន់តែច្រើន ខណៈអាជ្ញាធរក៏បានកាត់បន្ថយភាពស្មុគស្មាញ និងជួយសម្រួលដល់ការធ្វើបែបបទជាច្រើនផងដែរ។
លោកបានថ្លែងថា៖ «ការបង្កើតឃ្លាំងស្តុក និងឡសម្ងួតនាពេលកន្លងមកសុទ្ធតែជាយុទ្ធសាស្ត្ររបស់រដ្ឋាភិបាលក្នុងការគាំទ្រទៅដល់ការនាំចេញអង្ករឲ្យបានកាន់តែច្រើន»។
ទោះយ៉ាងណាលោកបញ្ជាក់ថា បរិមាណនៃការនាំចេញអង្កររបស់កម្ពុជាក្នុងឆ្នាំ ២០១៩ នេះអាចសម្រេចបានកំណើនប៉ុន្មាននោះ អាស្រ័យទៅលើកិច្ចចរចារវាងក្រុមហ៊ុននាំចេញ និងប្រទេសបញ្ជាទិញផងដែរ៕ LA