ភ្នំពេញៈ ការនាំចេញអង្ករសរុបរបស់កម្ពុជាឆ្នាំ ២០១៨ ទាំងផ្លូវការ និងមិនផ្លូវការ ត្រូវបានព្យាករថានឹងកើនឡើង ៥ ភាគរយប្រមាណជា ១,៣៥ លានតោន។ នេះបើយោងតាមរបាយការណ៍របស់អង្គការស្បៀងអាហារ និងកសិកម្មរបស់អង្គការសហប្រជាជាតិ (FAO)។ យោងតាមរបាយការណ៍ក្នុងបរិមាណនាំចេញអង្ករនេះការនាំចេញមិនផ្លូវការសរុបឆ្លងកាត់តាមព្រំដែននឹងមានបរិមាណ ៦០ ម៉ឺនតោន ខណៈការនាំចេញផ្លូវការនឹងកើនឡើងដល់ ៧៥ ម៉ឺនតោន។
បើធៀបនឹងឆ្នាំ ២០១៧ ការនាំចេញអង្ករក្រៅផ្លូវការឆ្លងកាត់តាមព្រំដែនមានបរិមាណ ៦៣៥ ៧០០ តោន។ នេះបើតាមតួលេខរបស់លេខាធិការដ្ឋានសេវាច្រកចេញចូលតែមួយសម្រាប់ការនាំចេញអង្ករដែលបានលើកឡើងដោយ FAO ខណៈតួលេខរបស់ FOA ក្នុងរយៈពេលដូចគ្នាបានរកឃើញថា អង្ករកម្ពុជាសរុបដែលនាំចេញក្រៅផ្លូវការតាមព្រំដែនមានចំនួន ៦៥ ម៉ឺនតោន។
លោកស្រី Shirley A. Mustafa D សេដ្ឋវិទូផ្នែកពាណិជ្ជកម្ម និងទីផ្សាររបស់អង្គការ FAO បានឲ្យដឹងថា៖ «យើងពិចារណាពីកត្តាប្រែប្រួលនៅពេលយើងបែងចែកការព្យាករពីការជួញដូរអង្កររបស់យើងរួមមានចក្ខុវិស័យផ្គត់ផ្គង់ និងតម្រូវការ ការបង្កើតគោលនយោបាយ និងតម្លៃក្នុងទីផ្សារក្នុងស្រុក និងក្រៅស្រុក»។
លោកស្រីបន្តថា៖ «ដោយសារការប្រកាសជាវិជ្ជមានជាទូទៅពីរដូវប្រមូលផលឆ្នាំ ២០១៧/២០១៨ រហូតដល់បច្ចុប្បន្ន យើងព្យាករថាកម្ពុជានឹងពឹងផ្អែកលើផលលើសក្នុងការនាំចេញក្នុងឆ្នាំ ២០១៨ នេះ»។
លោកស្រី Shirley អះអាងថាការបង្កើនបរិមាណទិញអង្កររបស់រដ្ឋាភិបាលចិននាពេលថ្មីៗនេះពីប្រទេសកម្ពុជារហូតដល់ ៣០ ម៉ឺនតោនអាចនឹងជំរុញកំណើននាំចេញអង្ករនេះ»។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មក្រសួងកសិកម្មបានឲ្យដឹងថាដោយសារការនាំចេញផ្លូវការបានប្រឈមនឹងបញ្ហាជាច្រើន វាបានផ្តល់ឱកាសដល់ការនាំចេញអង្ករមិនផ្លូវការ។
លោកថ្លែងថា៖ «ដោយសារយើងស្ថិតក្នុងរដូវប្រមូលផល សមត្ថភាពផលិតអង្កររបស់ក្រុមហ៊ុនកែច្នៃអង្ករ មិនអាចប្រមូលទិញពីកសិករបាន ដូច្នេះអង្ករ និងស្រូវរបស់យើងត្រូវលក់ទៅឲ្យក្រុមឈ្មួញតាមព្រំដែន ដោយសារកង្វះហិរញ្ញវត្ថុ ការរក្សាទុក និងឃ្លាំងស្តុកស្រូវ»។
បើទោះជាយ៉ាងនេះក្តីលោកអះអាងថាអាជ្ញាធរនឹងគ្មានវិធានការទប់ស្កាត់នោះទេ។ លោកបន្តថា៖ «ទោះបីជាយើងដឹងថា វាមិនចំណេញដល់រដ្ឋក្តី តែយើងមិនអាចរារាំងការនាំចេញអង្ករមិនផ្លូវការនេះបានទេ ដោយសារវានឹងប៉ះពាល់ដល់កសិករយើង»។
យោងតាមទិន្នន័យដែលទទួលបានពីក្រសួងកសិកម្មកម្ពុជាមានផលស្រូវលើស ៥ លានតោន តែជាក់ស្តែងកម្ពុជាពុំមានសមត្ថភាពរក្សាទុកផលស្រូវលើសនេះបាន។
លោក ហ៊ាន វណ្ណហន លើកឡើងថា៖ «ដូច្នេះបន្ទាប់ពីប្រមូលផលរួច អង្ករ និងស្រូវរបស់យើងត្រូវហូរទៅកាន់ប្រទេសជិតខាង»។ លោកបន្តថាការនាំចេញអង្កររបស់កម្ពុជាអាចនឹងមានចំនួន ៧០ ម៉ឺនតោនក្នុងឆ្នាំនេះ។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាយល់ស្របចំពោះទិន្នន័យរបស់អង្គការ FAO ហើយថាសមត្ថភាពរក្សាទុកស្រូវរបស់កម្ពុជានៅមានកម្រិតនៅឡើយ។
លោកថ្លែងថា៖ «វាពិបាកនឹងគ្រប់គ្រងដោយសារយើងមានប៉ុស្តិ៍ត្រួតពិនិត្យច្រើននៅតាមព្រំដែន»។
លោកបន្ថែមថា៖ «ទោះជាយ៉ាងនេះក្តីការនាំចេញអង្ករមិនផ្លូវការក៏ជាកត្តាវិជ្ជមានផងដែរចំពោះកសិករដោយសារពួកគាត់អាចទទួលបានប្រាក់ចំណូលសម្រាប់ការដាំដុះស្រូវលើកក្រោយទៀត តែកត្តាអវិជ្ជមានផ្សេងទៀត គឺយើងពិបាកនឹងសម្រេចបានគោលដៅនាំចេញ ១ លានតោនតាមគោលដៅរបស់រដ្ឋាភិបាល»។
ទោះបីយ៉ាងនេះក្តីអ្នកជំនាញផ្នែកសេដ្ឋកិច្ចចាត់ទុកការនាំចេញក្រៅផ្លូវការច្រើនលើសលប់ថាធ្វើឲ្យខូចខាតដល់កំណើនសេដ្ឋកិច្ច។
លោក ង៉ែត ជូ ទីប្រឹក្សាជាន់ខ្ពស់នៅក្រុមហ៊ុន Emerging markets បាននិយាយថា រដ្ឋាភិបាលគួរតែចាត់វិធានការដើម្បីកាត់បន្ថយការនាំចេញក្រៅផ្លូវការនេះ ព្រោះវាធ្វើឲ្យកម្ពុជាខាតបង់ប្រាក់ចំណេញពីការនាំចេញតម្លៃពលកម្ម និងផលិតកម្មបន្ថែមតម្លៃ។
លោកថ្លែងថា៖ «ខណៈការនាំចេញក្រៅផ្លូវការធំជាងនាំចេញផ្លូវការ វានឹងប៉ះពាល់ដល់កំណើនសេដ្ឋកិច្ចកម្ពុជានឹងបាត់បង់អត្ថប្រយោជន៍ដូចជាចំណូលពីការនាំចេញឱកាសការងារតម្លៃបន្ថែម កេរ្តិ៍ឈ្មោះទីផ្សារ និងឱកាសជាមួយអ្នកបញ្ជាទិញចុងក្រោយ»៕ BP