.jpg)
ឃ្លាំងអង្ករនៅក្នុងហាងលក់អង្ករឯកជនមួយនៅទីក្រុងភ្នំពេញ។ ការនាំចេញអង្ករកម្ពុជានៅតែបន្តធ្លាក់រយៈពេល ៧ ខែនេះ។ រូបថត ភ្នំពេញ ប៉ុស្តិ៍
ភ្នំពេញៈ ខណៈការនាំចេញអង្កររបស់កម្ពុជាបន្តធ្លាក់ចុះ ៥ ខែជាប់គ្នាគិតត្រឹមខែកក្កដាឆ្នាំនេះអ្នកនៅក្នុងឧស្សាហកម្មនេះព្យាករថា ការនាំចេញសរុបឆ្នាំនេះអាចធ្លាក់ចុះប្រមាណ ១០ ភាគរយធៀបនឹងឆ្នាំមុន។
ការអះអាងនេះធ្វើឡើង ខណៈតួលេខការនាំចេញអង្ករនៅរយៈពេល ៧ ខែដំបូងនេះនៅតែបន្តធ្លាក់ចុះធៀបនឹងរយៈពេលដូចគ្នាកាលពីឆ្នាំមុន។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាបានបញ្ជាក់ថា ដំណើរការយឺតនៃការនាំចេញកាលពីដើមឆ្នាំនេះបានធ្វើឲ្យការនាំចេញអង្ករអាចមានចំនួនតិចជាងឆ្នាំមុន។
លោកថ្លែងថា៖ «យើងមានការបញ្ជាទិញច្រើនកាលពីដើមឆ្នាំនេះ ប៉ុន្តែយើងមិនអាចផ្គត់ផ្គង់បានទាន់ពេលដោយសារយើងមិនមានស្រូវក្នុងស្ដុកគ្រប់គ្រាន់»។ លោកបានបន្ថែមថារោងម៉ាស៊ីនកិនស្រូវភាគច្រើនមិនមានស្រូវនៅក្នុងស្ដុក ខណៈសមត្ថភាពឃ្លាំងស្ដុកនៅមានកម្រិត។
លោកបានលើកឡើងថា៖ «ដោយសារតែនិន្នាការនៃការនាំចេញនេះ វានឹងពិបាកក្នុងការសម្រេចបានក្នុងតួលេខនាំចេញកាលពីឆ្នាំមុន»។
កម្ពុជានាំចេញអង្ករចំនួន ៦៣៥ ៦៧៩ តោនកាលពីឆ្នាំ ២០១៧ កើនឡើង ១៧ ភាគរយធៀបនឹងឆ្នាំ ២០១៦។ នេះបើយោងតាមតួលេខបានពីក្រសួងកសិកម្ម។ តួលេខនេះបង្ហាញថាក្នុងរយៈពេល ៧ ខែឆ្នាំនេះកម្ពុជានាំចេញអង្ករ ២៩៧ ០៨០ តោនធ្លាក់ចុះ ៦,៣០ ភាគរយធៀបនឹងរយៈពេលដូចគ្នាកាលពីឆ្នាំមុន។
សម្រាប់រយៈពេល ៧ ខែឆ្នាំនេះកំណើនការនាំចេញអង្ករមានតែនៅខែមករា និងខែមិថុនាប៉ុណ្ណោះដែលកើនឡើង ២៨,៣០ ភាគរយ និង ១,៣០ ភាគរយកាលពីខែមិថុនា។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៅក្រសួងកសិកម្មបានព្យាករថា ការនាំចេញអង្ករនៅឆ្នាំនេះនឹងធ្លាក់ចុះប្រហែល ១០ ភាគរយធៀបនឹងឆ្នាំមុន។
លោកថ្លែងថា៖ «វាជាលើកដំបូងដែលតួលេខនាំចេញនៅតែបន្តធ្លាក់ចុះជាប់ៗគ្នាដូចនេះ»។ លោកបន្ថែមថានេះដោយសារតែកង្វះសមត្ថភាពឃ្លាំងស្ដុកស្រូវ។
កម្ពុជាបានដំណើរការឃ្លាំងស្ដុកស្រូវ និងឡសម្ងួត ៤ កាលពីដើមខែកក្កដា ដែលអ្នកនៅក្នុងឧស្សាហកម្មនេះថ្លែងថាវានឹងជួយជំរុញការនាំចេញរបស់ប្រទេសនេះព្រមទាំងរក្សាតម្លៃស្រូវក្នុងស្រុកផងដែរ។
កម្ពុជាក៏បានបរាជ័យក្នុងកិច្ចព្រមព្រៀងនាំចេញអង្ករចំនួន ២៥០ ០០០ តោនដល់ប្រទេសបង់ក្លាដែសកាលពីឆ្នាំមុនផងដែរដោយអ្នកនៅក្នុងឧស្សាហកម្មនេះអះអាងថាដោយសាររោងម៉ាស៊ីនកិនស្រូវបច្ចុប្បន្នមិនមានស្ដុក ដើម្បីឆ្លើយតបបានតាមតម្រូវការនាំចេញ។
លោក ច្រាយ សុន នាយករងក្រុមហ៊ុននាំចេញអង្ករ Capital Food បានយល់ស្របនឹងការអះអាងខាងលើ ប៉ុន្តែលើកឡើងថាការធ្លាក់ចុះនេះនឹងមានចំនួនបន្តិចបន្តួចប៉ុណ្ណោះ។ លោកថ្លែងថា៖ «ខ្ញុំមិនសង្ឃឹមថាការនាំចេញអង្ករនឹងសម្រេចបានដូចគ្នានឹងឆ្នាំមុននោះទេ ប៉ុន្តែវាក៏នឹងមិនធ្លាក់ចុះច្រើននោះដែរ»។ លោកបន្ថែមថាការរំពឹងទុកនៃការនាំចេញអង្ករនឹងសម្រេចបានជាង ៥០០ ០០០ តោន។
លោកបញ្ជាក់ថា៖ «យើងនៅតែប្រឈមបញ្ហាតម្លៃជាមួយទីផ្សារជិតខាង ប្រសិនបើពួកគេទម្លាក់តម្លៃរបស់ពួកគេ យើងនឹងមិនអាចលក់ក្នុងតម្លៃដូចគ្នាបានទេ ខណៈឃ្លាំងស្ដុករបស់យើងនៅមានកម្រិតនៅឡើយ»៕LA
