ក្រុងបាងកកៈ ការនាំចេញអង្ករថៃក្នុងរយៈពេល ២ ខែដំបូងក្នុងឆ្នាំ ២០១៨ នេះ បានកើនឡើង ១០ ភាគរយធៀបនឹងឆ្នាំមុន គិតជាបរិមាណដល់ ១,៩១ លានតោន និងកើនឡើង ១៦,១ ភាគរយគិតជាប្រាក់បាត ដល់ ៣០,-៣២ ពាន់លានបាត (ប្រហែល ៩៧២ លានដុល្លារ) តែការបញ្ជាទិញកំពុងធ្លាក់ចុះដោយសារកំណើនថ្លៃប្រាក់បាត។
លោក Charoen Laothamatas ប្រធានសមាគមក្រុមហ៊ុននាំចេញអង្ករថៃបានឲ្យដឹងកាលពីថ្ងៃសុក្រសប្តាហ៍មុនថា នៅខែកុម្ភៈប្រទេសថៃបាននាំចេញអង្ករចំនួន ៩៥០ ៧៦១ តោនមានតម្លៃ ១៤,៩២ ពាន់លានបាត។ បរិមាណនេះបានធ្លាក់ចុះ ១,២ ភាគរយ ហើយតម្លៃបានធ្លាក់ចុះ ៣,១ ភាគរយបើធៀបនឹងខែមករាដោយសារការធ្លាក់ចុះការនាំចេញអង្ករម្លិះក្រអូប និងអង្ករចំហុយ (parboiled rice)។
លោកបានបន្តឲ្យដឹងថាការបញ្ជាទិញអង្ករទាំង ២ ប្រភេទនេះ បានធ្លាក់ចុះ ដោយសារតម្លៃរបស់វាខ្ពស់ពេក ដោយសារប្រាក់បាតថ្លៃ និងការប្រមូលផលស្រូវកាន់តែច្រើននៅតាមប្រទេសមួយចំនួនក្នុងតំបន់អាស៊ីអាគ្នេយ៍នេះ។
សមាគមនាំចេញអង្ករថៃបានព្យាករថា ប្រទេសថៃនឹងនាំចេញអង្ករចំនួន ៨៥០០០០ តោននៅខែមីនា។
យោងតាមលោក Charoen បានឲ្យដឹងថា ការនាំចេញអង្ករសទៅកាន់ទីផ្សារអាស៊ី និងអាហ្វ្រិកនឹងបន្តមានកម្រិតដូចមុន ហើយអតិថិជនធំៗនឹងរួមមាន ប្រទេសបេនីន ឥណ្ឌូនេស៊ី ម៉ាឡេស៊ី និងម៉ូសំប៊ិក។
ការនាំចេញអង្ករម្លិះក្រអូប និងអង្ករចំហុយទំនងជានឹងធ្លាក់ចុះបើធៀបទៅនឹងការនាំចេញកាលពីខែកុម្ភៈ ដោយសារអតិថិជនបាននាំចូលអង្ករច្រើននាពេលថ្មីៗនេះហើយអង្ករថៃមានតម្លៃខ្ពស់។ អតិថិជនមួយចំនួនកំពុងបញ្ជាទិញអង្ករគុណភាពខ្ពស់ពីគូប្រជែង ដូចជា កម្ពុជា និងវៀតណាមជាដើម។
ប្រទេសថៃបានកំណត់តម្លៃអង្ករម្លិះក្រអូបរបស់ខ្លួននៅតម្លៃ ១១៤៤ ដុល្លារក្នុងមួយតោន ខណៈកម្ពុជាកំណត់តម្លៃ ៩០០ ដុល្លារ ក្នុងមួយតោន និងវៀតណាម កំណត់តម្លៃ ៦៥០ ដុល្លារ ក្នុងមួយតោន៕ BP