.jpg)
សកម្មភាពកម្មករបញ្ជាគ្រឿងចក្រលើកដាក់អង្ករក្នុងឃ្លាំងស្តុកមួយក្នុងរាជធានីភ្នំពេញនាពេលកន្លងមក។ ហេង ជីវ័ន
ភ្នំពេញៈ កម្ពុជាប្តេជ្ញាបង្កើនការនាំចេញអង្ករឲ្យបានកាន់តែច្រើនទៅទីផ្សារប្រទេស ចិន ដើម្បីសម្រេចឲ្យកូតានាំចេញ ៤០ ម៉ឺនតោន ដែលផ្តល់ដោយរដ្ឋាភិបាលប្រទេស ចិន។ នេះបើយោងតាមអនុប្រធានសហព័ន្ធស្រូវអង្ករកម្ពុជា។
អនុប្រធានសហព័ន្ធស្រូវអង្ករកម្ពុជាកាលពីថ្ងៃម្សិលមិញបានជួបជាមួយនឹងតំណាងក្រុមហ៊ុនសាជីវកម្មរដ្ឋចិន COFCO ដើម្បីពិភាក្សាពីលទ្ធភាពនៃការនាំចេញរបស់កម្ពុជាដោយរំពឹងថា ការនាំចេញអង្ករទៅកាន់ប្រទេស ចិន ក្នុងឆ្នាំ ២០១៩។ នេះនឹងសម្រេចបានលទ្ធផលល្អប្រសើរជាងឆ្នាំទៅ។
របាយការណ៍លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបានបង្ហាញថាក្នុងរយៈពេល ៧ ខែ ឆ្នាំ ២០១៩ ការនាំចេញអង្ករកម្ពុជាទៅទីផ្សារអន្តរជាតិសម្រេចបាន ៣០៨ ០១៣ តោន កើនឡើង ៣,៧ ភាគរយ បើធៀបនឹងរយៈពេលដូចគ្នាឆ្នាំ ២០១៨ ដែលមានចំនួន ២៩៧ ០៨០ តោន។ ចិន គឺជាទីផ្សារនាំមុខគេដោយគិតពីខែមករាដល់ខែកក្កដាមានបរិមាណ ១២៣ ៣៦១ តោន កើនឡើង ៩៤ ភាគរយ បើធៀបរយៈពេលដូចគ្នាឆ្នាំ ២០១៨។
លោក ចាន់ សុខឃាំង អនុប្រធានសហព័ន្ធស្រូវអង្ករកម្ពុជាបានឲ្យដឹងកាលពីថ្ងៃម្សិលមិញថា បច្ចុប្បន្ននេះក្រុមការងាររបស់លោកកំពុងខិតខំធ្វើការសិក្សាទីផ្សារ និងរៀបចំយុទ្ធសាស្ត្រថ្មីៗព្រមទាំងធ្វើកិច្ចសហប្រតិបត្តិការជាមួយគ្រប់ភាគីពាក់ព័ន្ធដើម្បីរៀបចំជាផែនការក្នុងការឈានឆ្ពោះសម្រេចផែនការនាំចេញអង្ករឲ្យបាន ១ លានតោនក្នុង ១ ឆ្នាំ។
លោកថ្លែងថា៖ «ខ្ញុំរំពឹងថាការនាំចេញអង្ករទៅប្រទេសចិនឆ្នាំនេះនឹងមានកំណើនខ្ពស់ជាងឆ្នាំមុន»។
កាលពីឆ្នាំមុនប្រទេសចិនបានផ្តល់កូតាឲ្យកម្ពុជានាំចេញអង្ករទៅទីផ្សារចិន ៣០ ម៉ឺនតោន ប៉ុន្តែកម្ពុជាសម្រេចបានត្រឹមតែ ១៧០ ១៥៤ តោនប៉ុណ្ណោះ។ កាលពីដើមឆ្នាំ ២០១៩ ចិនបានបន្ថែមកូតាដល់កម្ពុជា ១០ ម៉ឺនតោនបន្ថែមទៀត។
ការប្រកួតប្រជែងខាងតម្លៃលើទីផ្សារអន្តរជាតិ ពិសេសជាមួយអង្កររបស់ប្រទេសជិតខាងថៃ និងវៀតណាម នៅតែជាបញ្ហាអ្នកនៅក្នុងវិស័យស្រូវអង្ករប្រឈម។
បើតាមលោក ចាន់ សុខឃាំង នៅថ្ងៃទី ១០-១២ ខែ កញ្ញា ខាងមុខនេះ ថ្នាក់ដឹកនាំសហព័ន្ធស្រូវអង្ករកម្ពុជានឹងដឹកនាំអ្នកពាក់ព័ន្ធក្នុងវិស័យស្រូវអង្ករមួយចំនួនដើម្បីទៅសិក្សាទីផ្សារប្រទេស ចិន ផងដែរ។
បច្ចុប្បន្ន COFCO ដែលជាក្រុមហ៊ុនសាជីវកម្មផ្នែកផលិតម្ហូបអាហារធំជាងគេនៅប្រទេស ចិន កំពុងចុះមកពិនិត្យសកម្មភាពនៃការធ្វើស្រែ និងគុណភាពស្រូវអង្កររបស់ប្រជាកសិករនៅកម្ពុជា។ ការចុះមកនេះមានគោលបំណងធ្វើការពិនិត្យគុណភាព ដើម្បីរៀបចំផែនការប្រមូលទិញនៅចុងឆ្នាំ ២០១៩ នេះតែម្តង។ នេះបើតាមលោក សុខឃាំង។
កាលពីឆ្នាំ ២០១៨ កម្ពុជានាំចេញអង្ករសរុប ៦២៦ ២២៥ តោន ធ្លាក់ចុះ ១,៥ ភាគរយ បើធៀបទៅនឹងឆ្នាំ ២០១៧។ ទីផ្សារសហភាពអឺរ៉ុបមានបរិមាណច្រើនជាងគេ គឺរហូតដល់ ២៦៩ ១២៧ តោន និងប្រទេស ចិន មានចំនួន ១៧០ ១៥៤ តោន៕
