ភ្នំពេញៈ ការនាំចេញអង្កររបស់កម្ពុជាធ្លាក់ចុះជិត ៦ ភាគរយនៅឆមាសទី ១ ឆ្នាំ ២០១៨ បើធៀបរយៈពេលដូចគ្នាកាលពីឆ្នាំមុន ជានិន្នាការដែលមន្ដ្រីមកពីក្រសួងកសិកម្មជំរុញឲ្យវិស័យឯកជនត្រូវការធ្វើការងារបន្ថែមទៀតដើម្បីស្រោចស្រង់ទីផ្សារអន្តរជាតិ។
របាយការណ៍បានពីក្រសួងកសិកម្មបានបង្ហាញថាការនាំចេញអង្ករក្នុងអំឡុងឆមាសទី ១ ឆ្នាំនេះកើនឡើងដល់ ២៧១- ៥៣៧ តោនធ្លាក់ចុះ ៥,៩ ភាគរយធៀបនឹង ២៨៨ ៥៦២ តោននៅក្នុងរយៈពេលដូចគ្នាកាលពីឆ្នាំមុន។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មបានឲ្យដឹងកាលពីថ្ងៃម្សិលមិញថា ការធ្លាក់ចុះនេះគឺដោយសារតែសមត្ថភាពប្រកួតប្រជែងនៅក្នុងទីផ្សារអន្តរជាតិ ដែលក្រុមហ៊ុននាំចេញអង្ករក្នុងស្រុកគឺជាអ្នកដើរតួនាទីដ៏សំខាន់សម្រាប់ការជំរុញការនាំចេញ។
លោក ហ៊ាន វណ្ណហន បានជំរុញឲ្យវិស័យឯកជនត្រូវបង្កើនសមត្ថភាព និងធានាការបញ្ជាទិញអន្តរជាតិកាន់តែច្រើន ដើម្បីពង្រឹងការនាំចេញរបស់កម្ពុជា។
លោកថ្លែងថា៖ «និន្នាការនាំចេញបានបង្ហាញបញ្ហារបស់ទីផ្សារ វិស័យឯកជនគឺជាអ្នកដើរតួនាទីដ៏សំខាន់ ដើម្បីទទួលបានកិច្ចព្រមព្រៀងទ្រង់ទ្រាយធំកាន់តែច្រើន»។ លោកបន្តថា៖ «ដោយសារតែនិន្នាការនេះការនាំចេញអង្ករ នឹងមិនកើនឡើងខ្លាំងទេ ដែលវាខុសគ្នាពីតួលេខនាំចេញសរុបកាលពីឆ្នាំមុន»។
ទោះបីជាកម្ពុជាទទួលបានកូតានាំចេញអង្ករ ២០០ ០០០ តោនកាលពីឆ្នាំ ២០១៧ ពីប្រទេសចិនដែលនឹងជំរុញឲ្យការនាំចេញកើនឡើងរហូតដល់ ៣០០ ០០០ តោននៅឆ្នាំនេះបញ្ហាឃ្លាំងស្ដុក និងហិរញ្ញប្បទាន គឺជាឧបសគ្គសម្រាប់ការសម្រេចបានតាមទិសដៅកំណត់របស់កម្ពុជា។
ទោះបីយ៉ាងនេះក្តីចាប់ពីរដូវខាងមុខឧបសគ្គឃ្លាំងស្ដុកនឹងលែងជាបញ្ហាទៀតហើយ ដោយសារសមត្ថភាពដ៏ធំរបស់ឃ្លាំងស្ដុក ឡសម្ងួត និងម៉ាស៊ីនកិនស្រូវ បានត្រៀមរួចរាល់សម្រាប់ប្រតិបត្តិការ។ នេះបើយោងតាមលោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា។
លោកបានថ្លែងថា៖ «ទោះបីជាយើងទទួលបានកូតាពីប្រទេសចិន ប៉ុន្តែបញ្ហាប្រឈមរបស់យើងរហូតមកដល់ពេលនេះគឺសមត្ថភាពឃ្លាំងស្ដុកដែលធ្វើឲ្យនិន្នាការនាំចេញមានការធ្លាក់ចុះ»។
លោកបន្តថា៖ «ប៉ុន្តែនៅក្នុងរដូវខាងមុខសមត្ថភាពនៃការប្រមូលស្រូវនឹងបង្កើនល្បឿន ដោយសារតែឃ្លាំងស្ដុករបស់យើងរួចរាល់ហើយ ដូច្នេះវានឹងជួយក្នុងការបង្កើនការនាំចេញនៅចុងឆ្នាំនេះ»៕LA