អង្ករប្រមាណជាង ៥៣ ម៉ឺនតោន ត្រូវបានកម្ពុជានាំចេញទៅទីផ្សារអន្តរជាតិក្នុងរយៈពេល ១០ ខែដើមឆ្នាំ ២០២០ កើនឡើងជាង ១៧ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩។ ហុង មិនា
ភ្នំពេញៈ អង្ករប្រមាណជាង ៥៣ ម៉ឺនតោន ត្រូវបានកម្ពុជានាំចេញទៅទីផ្សារអន្តរជាតិក្នុងរយៈពេល ១០ ខែដើមឆ្នាំ ២០២០ កើនឡើងជាង ១៧ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩ ដោយទទួលបានប្រាក់ចំណូលប្រមាណ ៣៦៧ លានដុល្លារ។
តាមទិន្នន័យលើបណ្តាញសង្គមផ្លូវការរបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកាលពីថ្ងៃទី ៣១ ខែតុលា បានបង្ហាញថា ក្នុងរយៈពេល ១០ ខែឆ្នាំ ២០២០ ការនាំចេញអង្ករកម្ពុជាសម្រេចបាន ៥៣៦ ៣០៥ តោន កើនឡើង ១៧,១១ ភាគរយពីចំនួន ៤៥៧ ៩៤០ តោន កាលពីរយៈពេលដូចគ្នាឆ្នាំ ២០១៩។
មានប្រទេសចំនួន ៦០ ដែលទទួលទិញអង្ករពីកម្ពុជាដោយទីផ្សារប្រទេសចិនបានបន្តនាំមុខគេជាមួយនឹងបរិមាណ ១៩៤ ៤៥១ តោន ស្មើនឹងចំណែកទីផ្សារ ៣៦,២៦ ភាគរយ សហភាពអឺរ៉ុប ១៧៤ ៣៩១ តោន ស្មើ ៣២,៥១ ភាគរយ ប្រទេសសមាជិកអាស៊ាន ៧១ ៨៨២ តោន ស្មើ ១៣,៤០ ភាគរយ និងគោលដៅផ្សេងៗទៀតមាន ៩៥ ៥៨១ តោនស្មើនឹង ១៧,៨៣ ភាគរយ។
ក្នុងបរិមាណនាំចេញអង្ករសរុបខាងលើគឺអង្ករក្រអូបគ្រប់ប្រភេទមានចំនួន ៤២១ ១៣២ តោន អង្ករសចម្រុះគ្រប់ប្រភេទមាន ១០៩ ០១២ តោន និងអង្ករចំហុយមានចំនួន ៦ ១៣៨ តោន។ ទោះយ៉ាងណាការនាំចេញអង្ករក្នុងខែតុលា ឆ្នាំនេះមិនបានកើនទេ ដោយមានបរិមាណត្រឹម ៤៧ ៥៣០ តោន ធ្លាក់ចុះ ១៩,៩២ ភាគរយធៀបទៅខែតុលាឆ្នាំមុនដែលមាន ៥៩ ៣៥៤ តោន។
លោក ហ៊ុន ឡាក់ ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជាបានប្រាប់ភ្នំពេញ-ប៉ុស្តិ៍កាលពីថ្ងៃចន្ទថា ទោះបីជាការនាំចេញអង្ករទៅកាន់ទីផ្សារអន្តរជាតិនាអំឡុងខែចុងក្រោយនេះបានធ្លាក់ចុះបន្តិច ដោយសារការរងផលប៉ះពាល់ពីគ្រោះទឹកជំនន់ និងឧបសគ្គនៃផ្លូវដឹកជញ្ជូន ប៉ុន្តែបរិមាណសរុបនៃការនាំចេញអង្ករទៅទីផ្សារអន្តរជាតិនៅតែរក្សាបាននូវភាពវិជ្ជមានដដែលក្នុងរយៈពេល ១០ ខែមកនេះធៀបនឹងរយៈពេលដូចគ្នាឆ្នាំ ២០១៩។ លោកបន្តថាខណៈបច្ចុប្បន្នស្ថានភាពទឹកជំនន់បានថមថយទៅវិញហើយនោះ លោកគិតថា បរិមាណអង្ករនាំចេញនឹងមានកំណើនឡើងវិញចាប់ពីពេលនេះតទៅ។
លោកថ្លែងថា៖ «បរិមាណនៃការនាំចេញនឹងស្ទុះឡើងវិញ ពិសេសចាប់ពីខែធ្នូ និងខែមករា ឆ្នាំ ២០២១ ខាងមុខ ហើយចិននឹងនៅតែជាទីផ្សារដែលមានសក្តានុពលសម្រាប់កម្ពុជា»។
លោកប្រាប់ទៀតថា បច្ចុប្បន្ននេះអាជ្ញាធរក៏ដូចជាប្រជាកសិករក៏កំពុងចាប់ផ្តើមបង្កបង្កើនផលស្រូវដែលខូចខាតដោយសារទឹកជំនន់ឡើងវិញផងដែរ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានប្រាប់ថា ទឹកប្រាក់ដែលទទួលបានពីការនាំចេញអង្ករក្នុងរយៈពេល ១០ ខែដើមឆ្នាំ ២០២០ នេះមានតម្លៃប្រមាណ ៣៦៧ លានដុល្លារ ខណៈសម្រាប់ខែតុលា មានចំនួន ៣៨,៩ លានដុល្លារ។
កាលពីឆ្នាំ ២០១៩ ការនាំចេញអង្កររបស់កម្ពុជាសម្រេចបាន ៦២០ ១០៦ តោន ធ្លាក់ចុះ ០,៩៧ ភាគរយធៀបទៅឆ្នាំ ២០១៨ និងទទួលបានចំណូលប្រមាណ ៥០១ លានដុល្លារ ធ្លាក់ចុះ ៤,៣ ភាគរយ៕ LA
វីដេអូ៖
