.jpg)
កម្មករកំពុងទាញយកអង្ករដែលនៅក្នុងហាងលក់អង្ករមួយក្នុងទីក្រុងភ្នំពេញ នាពេលកន្លងមក ។ ហុង មិនា
ភ្នំពេញៈ ការនាំចេញអង្ករបស់កម្ពុជាបានធ្លាក់ចុះ ៣ ភាគរយនៅត្រីមាសទី ១ ឆ្នាំនេះធៀបរយៈពេលដូចគ្នាកាលពីឆ្នាំទៅដែលក្រុមហ៊ុននាំចេញអង្ករ និងតំណាងឧស្សាហកម្មបានស្ដីបន្ទោសលើការរត់ពន្ធអង្ករតាមព្រំដែន។
ទិន្នន័យក្រសួងកសិកម្មកាលពីម្សិលមិញឲ្យដឹងថា កម្ពុជាបាននាំចេញអង្ករ ១៦១ ១១៥ តោននៅត្រីមាសទី ១ ឆ្នាំនេះធ្លាក់ចុះពី ១៦៦,៦៧៨ តោនកាលពីឆ្នាំ ២០១៧។
ទោះបីយ៉ាងនេះក្តីអ្នកនៅក្នុងវិស័យនេះអះអាងថាតម្លៃអង្ករខ្ពស់នៅឆ្នាំនេះ បានធ្វើឲ្យកសិករសម្រុកលក់ស្រូវទៅឲ្យឈ្មួញកណ្តាលដើម្បីនាំចេញទៅប្រទេសជិតខាង។
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជាបានថ្លែងថា៖ «ទីផ្សារអង្ករអន្តរជាតិល្អ ដូច្នេះតម្រូវការស្រូវបានកើនឡើង»។
លោកថ្លែងថា៖ «ក្រុមហ៊ុននាំចេញអង្ករមិនអាចទិញអង្ករឲ្យបានមុនឈ្នួញមកពីព្រំដែនដែលបានទិញស្រូវពីកសិករនោះទេ»។ លោកបានព្រមានថា ការនាំចេញមួយឆ្នាំពេញនឹងត្រូវបានខូចប្រយោជន៍ ប្រសិនបើអាជ្ញាធរមិនអន្តរាគមន៍ដើម្បីរារាំងអ្នករត់ពន្ធស្រូវនេះទេ។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៅក្រសួងកសិកម្មមិនអាចទាក់ទងសុំការអត្ថាធិប្បាយបានទេកាលពីម្សិលមិញ។ កាលពីសប្ដាហ៍មុនលោកប្រាប់ភ្នំពេញប៉ុស្ដិ៍ថារដ្ឋាភិបាលមិនអាចបង្ក្រាបលើការរត់ពន្ធអង្ករ និងស្រូវបានទេដោយសារតែវានឹងដាក់សម្ពាធដ៏ធំលើកសិករក្នុងស្រុក។
លោក ហ៊ុន ឡាក់ បានថ្លែង៖ «ទោះបីជាយើងជាក្រុមហ៊ុននាំចេញអង្ករមានការបញ្ជាទិញពីបរទេសក៏ដោយ ប៉ុន្តែយើងមិនមានស្ដុកនៅក្នុងដៃនោះទេ»។ លោកបន្តថា៖ «តើយើងអាចផ្គត់ផ្គង់បានប៉ុន្មាន? នោះជាមូលហេតុដែលតួលេខនាំចេញមានការធ្លាក់ចុះ»។
ការរត់ពន្ធស្រូវ អង្ករ គឺជាបញ្ហាដ៏យូរអង្វែងសម្រាប់វិស័យអង្ករកម្ពុជា។ អង្គការស្បៀងអាហារ និងកសិកម្មអង្គការសហប្រជាជាតិបានព្យាករថា អង្ករដែលរត់ពន្ធតាមព្រំដែនរបស់កម្ពុជានឹងមានរហូតដល់ ៤៤ នៅឆ្នាំនេះ។
លោក សុង សារ៉ន អគ្គនាយកក្រុមហ៊ុននាំចេញអង្ករ Amru Rice បានថ្លែងថា ការប្រែប្រួលនៅក្នុងទីផ្សារអង្ករគឺជារឿងធម្មតា ហើយថាកសិករនឹងទទួលបានអត្ថប្រយោជន៍ពីតម្លៃស្រូវកាន់តែខ្ពស់។ លោកថ្លែងថា៖ «វាជាជម្រើសល្អសម្រាប់កសិករក្នុងការលក់ស្រូវរបស់ពួកគេ ពួកគេមិនចាំបាច់បារម្ភអំពីតម្លៃនោះទេ ដោយសារឈ្នួញមកពីបណ្ដាប្រទេសជិតខាងចំណាយតម្លៃខ្ពស់»។
អ្នកស្រី ដឹម ស្រីលីម កសិករអង្ករនៅស្រុកសង្កែ ខេត្តបាត់ដំបង ដែលធ្វើស្រែលើដីចំនួន ៥ ហិកតា បានឲ្យដឹងថាតម្លៃស្រូវនៅឆ្នាំនេះល្អរហូតដល់ ១ ៧០០ រៀលក្នុង ១ គីឡូក្រាម បើធៀបនឹងឆ្នាំ ២០១៧ ដែលមានតម្លៃ តែ ១២០០ រៀលប៉ុណ្ណោះ។
អ្នកស្រីថ្លែងថា៖ «តម្លៃស្រូវរបស់យើងគឺល្អ យើងសប្បាយចិត្តក្នុងការលក់ស្រូវទាំងអស់របស់យើង»។
អ្នកស្រីបានបន្តថា៖ «យើងចង់លក់ឲ្យឈ្នួញវៀតណាម ដោយសារតែពួកគេឲ្យលុយភ្លាមៗនៅនឹងវាលស្រែ។ ប្រសិនបើយើងលក់ឲ្យឈ្នួញក្នុងស្រុក ពួកគេបង់ប្រាក់ឲ្យយើងយឺត ១ សប្ដាហ៍»៕ LA
