ភ្នំពេញៈ កម្ពុជាបាននាំចេញអង្ករសរីរាង្គទៅទីផ្សារអន្តរជាតិជាង ១១ ០០០ តោន កាលពីឆ្នាំ ២០២០ កើនជាង ១ ភាគរយ ធៀបនឹងឆ្នាំ ២០១៩ ខណៈអ្នកនៅក្នុងវិស័យនាំចេញអង្ករអះអាងថា កំណើនដ៏ទាបនេះគឺដោយសារវិបត្តិនៃការឆ្លងរាលដាលជំងឺកូវីដ ១៩ ខណៈសហព័ន្ធស្រូវអង្ករកម្ពុជារំពឹងថា នឹងជំរុញការនាំចេញឱ្យបានច្រើនសម្រាប់ឆ្នាំ ២០២១ នេះ។
ទិន្នន័យពីសហព័ន្ធស្រូវអង្ករកម្ពុជាដែល ភ្នំពេញ ប៉ុស្តិ៍ ទទួលបានកាលពីថ្ងៃចន្ទ បានបង្ហាញថា ក្នុងចំណោមអង្ករកម្ពុជានាំចេញសរុប ៦៩០ ៨២៩ តោន នៅក្នុងឆ្នាំ ២០២០ គឺមានអង្ករសរីរាង្គ ១១ ២០០ តោន កើនត្រឹម ១,២ ភាគរយ បើធៀបនឹងឆ្នាំ ២០១៩។ អង្ករសរីរាង្គជាង ៩០ ភាគរយត្រូវបាននាំទៅកាន់ទីផ្សារអឺរ៉ុប និងមួយចំនួនតូចនាំទៅអាមេរិក។
លោក សុង សារ៉ន ប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន អេមរុ រ៉ាយស៍ បានប្រាប់ ភ្នំពេញ ប៉ុស្តិ៍ កាលពីថ្ងៃចន្ទថា ទោះបីការនាំចេញអង្ករសរុបពីកម្ពុជាទៅទីផ្សារអន្តរជាតិក្នុងឆ្នាំ ២០២០ សម្រេចបាន ៦៩០ ៨២៩ តោនកើនឡើង ១១,៤ ភាគរយក៏ដោយ ប៉ុន្តែសម្រាប់អង្ករសរីរាង្គ គឺកើនឡើងតិចតួចប៉ុណ្ណោះបើធៀបនឹងឆ្នាំ ២០១៩។
ការកើនឡើងតិចតួចនេះ គឺដោយសារទីផ្សារអង្ករសរីរាង្គកម្ពុជា គឺពឹងផ្អែករហូតដល់ជាង ៩០ ភាគរយលើទីផ្សារអឺរ៉ុប ខណៈការនាំចេញអង្ករទៅអឺរ៉ុបកាលពីឆ្នាំ ២០២០ មិនបានកើនឡើងទេ ព្រោះការនាំចេញទៅទីនោះត្រូវជាប់កាតព្វកិច្ចបង់ពន្ធ។ លោកបន្តថា ម្យ៉ាងទៀតនៅក្នុងពេលនៃការឆ្លងរាលដាលកូវីដ-១៩ នេះតម្រូវការអង្ករសរីរាង្គ គឺមិនបានកើនឡើងទេ។
លោកថ្លែងថា៖ «ជារួមទោះបីការនាំចេញអង្ករទៅអឺរ៉ុបមិនកើនឡើងដោយសារការជាប់បន្ទុកពន្ធ ប៉ុន្តែសម្រាប់អង្ករសរីរាង្គ គឺមានកំណើន។ បើមិនមានរបាំងពន្ធ ការប្រកួតប្រជែងរបស់យើងនឹងកាន់តែមានភាពល្អប្រសើរបន្ថែមទៀត»។ លោកបញ្ជាក់ថា៖ «កំណើនប៉ុណ្ណឹង គឺអាចទទួលយកបាននៅក្នុងបរិបទនេះ»។
ក្នុងនាមប្រធានសហព័ន្ធស្រូវអង្ករកម្ពុជាលោក សារ៉ន បានអះអាងថា៖ «យើងនឹងខំស្វែងរកទីផ្សារនាំចេញអង្ករសរីរាង្គឱ្យបានកាន់តែច្រើន និងធំថែមទៀត ពិសេសនៅអាមេរិកដែលមានតម្រូវការខ្ពស់ ខណៈពេលនេះការនាំអង្ករសរីរាង្គទៅទីនោះនៅមានបរិមាណតិចតួចនៅឡើយ»។
លោកបញ្ជាក់ថា៖ «យើងនឹងជំរុញការនាំចេញអង្ករសរីរាង្គកម្ពុជាឱ្យកើនឡើងដល់ក្នុងរង្វង់ ១៥ ០០០ តោន ក្នុងឆ្នាំ ២០២១ នេះ»។
បើយោងតាមលោក សារ៉ន ក្នុងបរិមាណការនាំចេញអង្ករសរីរាង្គសរុប ១១ ២០០ តោន កាលពីឆ្នាំ ២០២០ គឺក្រុមហ៊ុន អេមរុ រ៉ាយស៍ មានប្រហែល ៩ ០០០ តោន ដោយកើនពី ១០ ទៅ ២០ ភាគរយធៀបនឹងឆ្នាំ ២០១៩។
លោក ចាន់ សុខឃាំង អគ្គនាយកក្រុមហ៊ុននាំចេញអង្ករ Signatures of Asia Co., Ltd បានប្រាប់ថា ការរីករាលដាលកូវីដ ១៩ បានធ្វើឱ្យតម្រូវការអង្ករសរីរាង្គលើពិភពលោកធ្លាក់ចុះ ជាក់ស្តែងការនាំចេញរបស់ក្រុមហ៊ុនលោកបានធ្លាក់ចុះប្រមាណ ២០ ភាគរយបើធៀបនឹងឆ្នាំ ២០១៩ ខណៈការនាំចេញអង្ករធម្មតាមានកំណើនប្រហែល ៣០ ភាគរយ។
លោកបានបន្តថា កាលពីឆ្នាំ ២០២០ ការនាំចេញអង្កររបស់ Signatures of Asia Co., Ltd សម្រេចបានជាង ២២ ០០០ តោន ក្នុងនោះអង្ករសរីរាង្គមានជាង ២ ០០០ តោន។
លោកថ្លែងថា៖ «ការធ្លាក់ចុះប្រាក់ចំណូលក្នុងអំឡុងពេលជំងឺកូវីដ១៩ បានធ្វើឱ្យមនុស្សងាកទៅជ្រើសរើសយកប្រភេទអង្ករដែលជាតម្រូវការចាំបាច់ ដោយមិនសូវផ្តោតទៅលើអង្ករសរីរាង្គ (ប្រភេទអង្ករសុខភាព) ទេ ព្រោះអង្ករសរីរាង្គមានតម្លៃជិតទ្វេដងធៀបអង្ករធម្មតា»។
តម្លៃអង្ករសរីរាង្គនៅលើទីផ្សារអន្តរជាតិក្នុងឆ្នាំ ២០២០ មិនមានការប្រែប្រួលច្រើនទេធៀបឆ្នាំ ២០១៩ ដោយអង្ករសរីរាង្គ (ស) មានតម្លៃក្នុងរង្វង់ ៩៥០ ដុល្លារ ក្នុង ១ តោន និងអង្ករសរីរាង្គ (ក្រអូប) តម្លៃពី ១ ២០០-១ ៣០០ ដុល្លារក្នុង ១ តោន។ នេះបើតាមលោក សុខឃាំង៕