ភ្នំពេញៈ ការនាំចេញអង្កររបស់កម្ពុជានៅក្នុងការចាប់ផ្តើមឆ្នាំ ២០១៩ នេះ បានបន្តធ្លាក់ចុះចំនួន ៥ ភាគរយ បន្ទាប់ពីការធ្លាក់ចុះបានកើតឡើងស្ទើរពេញ ១ ឆ្នាំរួចទៅហើយកាលពីឆ្នាំ ២០១៨ ខណៈអ្នកនៅក្នុងវិស័យនេះមិនចាត់ទុកថាជារឿងបារម្ភទេ ដោយសារវាទើបជាការចាប់ផ្តើម។
របាយការណ៍ពីលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករកាលពីថ្ងៃម្សិលមិញបង្ហាញថា ការនាំចេញអង្កររបស់កម្ពុជាក្នុងខែមករា ឆ្នាំ ២០១៩ មានបរិមាណចំនួន ៥៩ ៦២៥ តោន ធ្លាក់ចុះ ៥ ភាគរយបើធៀបនឹងខែមករា ឆ្នាំ ២០១៨ ដែលមាន ៦២ ៦២៣ តោន។
ទិន្នន័យបង្ហាញទៀតថា អង្ករចំនួន ២៣ ៨៩៩ តោន ដែលស្មើនឹង ៤០,៧ ភាគរយនៃបរិមាណនាំចេញសរុបត្រូវបាននាំទៅកាន់ទីផ្សារសហគមន៍អឺរ៉ុប ប្រទេស ចិន មាន ១៨ ៦៧១ តោន ក្រុមប្រទេសសមាជិកអាស៊ានមាន ៩ ២២៦ តោន និងទិសដៅផ្សេងទៀតមានចំនួន ៧ ៨៣៩ តោន។
កាលពីឆ្នាំ ២០១៨ កម្ពុជានាំចេញអង្ករបាន ៦២៦ ២២៥ តោន ធ្លាក់ចុះតិចតួចពីចំនួន ៦៣៥ ៦៧៩ តោនកាលពីឆ្នាំ ២០១៧។
វិស័យនាំចេញអង្ករកម្ពុជា នាពេលនេះក៏កំពុងជួបនឹងបញ្ហាប្រឈមផងដែរ ខណៈកាលពីថ្ងៃទី ១៨ ខែមករា សហគមន៍អឺរ៉ុបបានកំណត់យកពន្ធអង្ករនាំចេញពីកម្ពុជារយៈពេល ៣ ឆ្នាំ ដោយឆ្នាំដំបូងតម្រូវឲ្យបង់ពន្ធ ២០០ ដុល្លារក្នុង ១ តោន ឆ្នាំទី២ ចំនួន ១៧០ ដុល្លារ និងឆ្នាំទី៣ ចំនួន ១៤២ ដុល្លារ។ អង្ករកម្ពុជាក៏អាចប្រឈមនឹងបញ្ហាមួយទៀតទៅទីផ្សារអឺរ៉ុបផងដែរ បើប្រព័ន្ធអនុគ្រោះពន្ធ EBA ត្រូវបានព្យួរនោះ។
លោក ហ៊ុន ឡាក់ អនុប្រធានសហព័ន្ធស្រូវអង្ករ កម្ពុជា និងជាប្រធានក្រុមហ៊ុននាំចេញអង្ករ Mekong OryzaTrading បាននិយាយថា ការនាំចេញអង្ករកម្ពុជាធ្លាក់ចុះកាលពីខែមករា មិនមែនជារឿងដែលគួរឲ្យព្រួយបារម្ភទេ ព្រោះវាគ្រាន់តែជាតួលេខរយៈពេល ១ ខែប៉ុណ្ណោះ ហើយការធ្លាក់ចុះនេះក៏មិនមានបរិមាណច្រើនទេ។ លោកថ្លែងថា៖ «ខ្ញុំមិនទាន់អាចវាយតម្លៃថាបែបណានោះទេដោយយើងគួរតែរង់ចាំមើល ២-៣ ខែទៀតសិន»។
លោកបន្តថា សម្រាប់ការយកពន្ធអង្ករកម្ពុជានៅពេលនាំចូលទីផ្សារអឺរ៉ុបនោះ លោកគិតថា មិនប៉ះពាល់អ្វីច្រើនទេ ព្រោះតម្លៃអង្ករបន្ទាប់ពីយកពន្ធ គឺកើនឡើងតិចតួចប៉ុណ្ណោះ។ លោកអះអាងថា៖ «ខ្ញុំគិតថា អ្នកនិយមរសជាតិអង្ករកម្ពុជានឹងនៅតែបន្តបរិភោគអង្ករកម្ពុជាដដែល ព្រោះតម្លៃកើនឡើងតែប៉ុន្មានសេនប៉ុណ្ណោះ ក្នុង ១ គីឡូក្រាម»៕LA