.jpg)
ការនាំចេញអង្ករពីកម្ពុជាទៅកាន់ទីផ្សារអន្តរជាតិនៅក្នុងរយៈពេល ៤ ខែដំបូង ឆ្នាំ ២០២០ សម្រេចបានបរិមាណជាង ៣០ ម៉ឺនតោន។ រូបថត ហុង មិនា
ភ្នំពេញៈ ការនាំចេញអង្ករពីកម្ពុជាទៅកាន់ទីផ្សារអន្តរជាតិនៅក្នុងរយៈពេល ៤ ខែដំបូង ឆ្នាំ ២០២០ សម្រេចបានបរិមាណជាង ៣០ ម៉ឺនតោនស្មើនឹងតម្លៃ ២១០ លានដុល្លារ ដែលនេះជាបរិមាណនាំចេញខ្ពស់បំផុតក្នុងរយៈពេលទសវត្សរ៍កន្លងមក។ នេះបើយោងតាមរបាយការណ៍របស់សហព័ន្ធស្រូវអង្ករកម្ពុជា (CRF)។
របាយការណ៍សង្ខេបការនាំចេញអង្ករកម្ពុជាបង្ហាញថា ក្នុងរយៈពេល ៤ ខែ ឆ្នាំ ២០២០ ការនាំចេញអង្ករសម្រេចបាន ៣០០ ២៥២ តោនកើន ៤០,៤៦ ភាគរយធៀបនឹងរយៈពេលដូចគ្នាកាលពីឆ្នាំ ២០១៩ ដែលមាន ២១៣ ៧៦៣ តោន។ «នេះជាការនាំចេញដែលមានបរិមាណខ្ពស់បំផុតមិនធ្លាប់មាននៅក្នុងរយៈពេល ១០ ឆ្នាំចុងក្រោយ។ ចំណែកប្រាក់ដែលទទួលបានពីការនាំចេញក្នុងរយៈពេលនេះគឺ ២១០ លានដុល្លារ។
របាយការណ៍ឲ្យដឹងទៀតថា ការនាំចេញទៅកាន់ប្រទេសចិនមានបរិមាណ ៤១ ភាគរយទៅសហគមន៍អឺរ៉ុប និងអង់គ្លេសមាន ៣២ ភាគរយទៅបណ្តាប្រទេសក្នុងតំបន់អាស៊ានមាន ១៣ ភាគរយ និងបណ្តាប្រទេសផ្សេងៗទៀត មានចំនួន ១៤ ភាគរយ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ការនាំចេញអង្ករក្នុងឆ្នាំ ២០២០ នេះនឹងមានបរិមាណខ្ពស់បើធៀបឆ្នាំ ២០១៩ ព្រោះគ្រាន់តែក្នុងរយៈពេល ៤ ខែការនាំចេញសម្រេចបាន ៤៨,៤១ ភាគរយនៃការនាំចេញសរុបកាលពីឆ្នាំ ២០១៩ រួចទៅហើយ។ លោកបន្តថា ការរីករាលដាលកូវីដ១៩ បានធ្វើឲ្យតម្រូវការស្បៀង និងការស្តុកទុកកើនឡើងយ៉ាងខ្ពស់នៅគ្រប់ប្រទេសលើសកលលោក។
លោកនិយាយថា៖ «វាជាមោទនភាពមួយសម្រាប់វិស័យស្រូវអង្ករកម្ពុជាដែលអាចសម្រេចបានកំណើននាំចេញក្នុងបរិមាណខ្ពស់បែបនេះ»។
ទាក់ទងនឹងការដាក់ចេញវិធានការរបស់រដ្ឋាភិបាលកម្ពុជាកាលពីដើមខែមេសាដែលហាមឃាត់ការនាំចេញស្រូវ និងអង្ករសទៅក្រៅប្រទេសលោក លន់ យ៉េង បានប្រាប់ថា មិនបានចូលរួមចំណែកជាដុំកំភួនសម្រាប់ការនាំចេញអង្ករកម្ពុជាទៅទីផ្សារអន្តរជាតិក្នុងអំឡុងពេលនេះទេ ព្រោះបើគិតតែក្នុងខែមេសាគឺការនាំចេញស្ទើរ ១០០ ភាគរយជាប្រភេទក្រអូប។
លោកអះអាងថា៖ «វាមិនបានចូលរួមចំណែកច្រើនក្នុងនាំចេញ ប៉ុន្តែវាមានសារៈសំខាន់ខ្លាំងណាស់ក្នុងការរក្សាស្ថិរភាពសន្តិសុខស្បៀងសម្រាប់បម្រើសេចក្តីត្រូវការរបស់ប្រជាជនក្នុងស្រុកដែលនិយមទទួលទានអង្ករស»។
ការស្តារ និងពង្រីកប្រព័ន្ធធារាសាស្ត្រថ្មីៗក្នុងពេលនេះនឹងជួយជំរុញការដាំដុះ និងការប្រមូលផលក្នុងឆ្នាំនេះមានបរិមាណខ្ពស់ជាងឆ្នាំមុន។ នេះបើតាមលោក លន់ យ៉េង។
លោក ចាន់ សុខឃាំង ប្រធានក្រុមហ៊ុន Signature of Asia Co., Ltd ដែលជាក្រុមហ៊ុននាំចេញអង្ករទៅកាន់ទីផ្សារអន្តរជាតិបានប្រាប់ភ្នំពេញប៉ុស្តិ៍ថា ក្តីបារម្ភពីការរីករាលដាលរបស់កូវីដ១៩ បានធ្វើឲ្យតម្រូវការស្តុកទុកអង្ករ នៅលើពិភពលោកកំពុងកើនឡើងដែលនេះជាឱកាសសម្រាប់ទីផ្សារនាំចេញអង្ករកម្ពុជា ប៉ុន្តែទោះយ៉ាងណាអ្វីៗក៏អាស្រ័យទៅលើគុណភាព និងទិន្នផលស្រូវដែលកសិករយើងផលិតបានដែរ។
លោកថ្លែងថា៖ «យើងមានជំនឿថា ការនាំចេញក្នុងឆ្នាំនេះនឹងមានកំណើនខ្ពស់ធៀបនឹងឆ្នាំ ២០១៩ តែយ៉ាងណាអ្វីៗក៏ត្រូវពឹងលើអាកាសធាតុ និងទឹកភ្លៀងផងដែរ»។
លោកបន្តថា កំណើនតម្រូវការបានធ្វើឲ្យតម្លៃអង្ករលើទីផ្សារអន្តរជាតិនៅពេលនេះកើនឡើងប្រហែល ៣០ ភាគរយ បើធៀបនឹងឆ្នាំមុន។ លោកអះអាងថា៖ «តម្លៃអង្ករនៅលើទីផ្សារអន្តរជាតិកើនឡើង តែសម្រាប់ក្នុងប្រទេសកម្ពុជាគឺមិនកើនឡើងទេ»។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានប្រាប់សារព័ត៌មានក្នុងស្រុកកាលពីថ្ងៃសៅរ៍ថា កំណើនការនាំចេញ និងប្រាក់ចំណូលក្នុងរយៈពេលខាងលើគឺដោយសារតែការងើបឡើងវិញនៃតម្រូវការនៅទីផ្សារសហគមន៍អឺរ៉ុប និងប្រទេសមួយចំនួនទៀត។
កាលពីឆ្នាំ ២០១៩ កម្ពុជានាំចេញអង្ករ ៦២០ ១០៦ តោនធ្លាក់ចុះ ០,៩៧ ភាគរយធៀបនឹងឆ្នាំ ២០១៨ ដែលមាន ៦២៦ ២២៥ តោន។ ចំណែកតម្លៃមាន ៥០១ លានដុល្លារ ធ្លាក់ ៤,៣ ភាគរយធៀបឆ្នាំ ២០១៨៕ LA
