The Phnom Penh Post Search

Search form




Logo of Phnom Penh Post newspaper Phnom Penh Post - ការ​នាំ​ចេញ​អង្ករ ៦ខែ​ដើម​ឆ្នាំ​នេះ​កើន​ឡើង ៥៩,៥%

ការ​នាំ​ចេញ​អង្ករ ៦ខែ​ដើម​ឆ្នាំ​នេះ​កើន​ឡើង ៥៩,៥%

កម្មករ​របស់​ក្រុមហ៊ុន Amru កំពុង​លើក​អង្ករ​ដាក់​លើ​ខ្សែ​ពាន​យន្ត​ដើម្បី​នាំ​អង្ករ​ទៅ​លើ​រថយន្ត។
កម្មករ​របស់​ក្រុមហ៊ុន Amru កំពុង​លើក​អង្ករ​ដាក់​លើ​ខ្សែ​ពាន​យន្ត​ដើម្បី​នាំ​អង្ករ​ទៅ​លើ​រថយន្ត។ ហេង ជីវ័ន

ការ​នាំ​ចេញ​អង្ករ ៦ខែ​ដើម​ឆ្នាំ​នេះ​កើន​ឡើង ៥៩,៥%

ភ្នំពេញៈ ការ​នាំ​ចេញ​អង្ករ​របស់​កម្ពុជា​ចាប់​ពី​ខែ​មករា ​ដល់​ខែ​មិថុនា​ បង្ហាញ​ពី​និន្នាការ​កើន​ឡើង​ប្រកប​ដោយ​ស្ថិរភាព ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន ​ដែល​ក្រុមហ៊ុន​នាំ​ចេញ​អង្ករ​ធំៗ​បាន​ឲ្យ​ដឹង​ថា កំណើន​នេះ​បាន​កើត​មាន​ឡើង​ដោយ​សារ​កំណើន​តម្រូវ​ការ​អង្ករ​ស​ពី​ប្រទេស​ចិន និង​អង្ករ​ចំហុយ​ពី​បណ្ដា​ប្រទេស​នៃ​សហភាព​អឺរ៉ុប (EU)​។

យោង​តាម​តួ​លេខ​ពី​លេខាធិការដ្ឋាន​សេវា​ច្រក​ចេញ​ចូល​តែ​មួយ​សម្រាប់​បំពេញ​បែប​បទ​នាំ​ចេញ​អង្ករ កម្ពុជា​បាន​នាំ​ចេញ​អង្ករ​សរុប ២៨៣ ៨២៥​ តោន​នៅ​ក្នុង​រយៈពេល ៦ ខែ​ដំបូង​នៅ​ឆ្នាំ​នេះ ​ដោយ​បាន​កើន​ឡើង ៥៩,៥០​ ភាគរយ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុន។

ក្នុង​ចំណោម​តួ​លេខ​សរុប​នេះ អង្ករ​ក្រអូប​មាន​បរិមាណ ៤៤,៥០ ភាគ​រយ អង្ករ​ស មាន​ចំនួន ៤៧,៤០ ភាគរយ​ ខណៈ​ដែល​អង្ករ​ចំហុយ​មាន​ចំនួន ៨,១០ ​ភាគ​រយ។

លោក សុង សារ៉ន អគ្គ​នាយក Amru Rice Cambodia ដែល​ជា​ក្រុមហ៊ុន​នាំ​ចេញ​មួយ​ក្នុង​ចំណោម​ក្រុម​ហ៊ុន​នាំ​ចេញ​ឈាន​មុខ​គេ​នៅ​កម្ពុជា ​បាន​ថ្លែង​កាល​ពី​ចុង​សប្តាហ៍​មុន​ថា តម្រូវ​ការ​មក​ពី​ប្រទេស​ចិន​កំពុង​ជួយ​ជំរុញ​កំណើន​នាំ​ចេញ​អង្ករ​នៅ​​ឆ្នាំ​នេះ ខណៈ​ដែល​កម្ពុជា​ក៏​កំពុង​ផ្ដល់​ជូន​ផលិតផល​ថ្មី​ផង​ដែរ ដូច​ជា អង្ករ​ចំហុយ បន្ថែម​លើ​អង្ករស និង​អង្ករ​ក្រអូប ដល់​អតិថិជន​ជាច្រើន។

លោក​ថ្លែង​ថា៖ «ទីផ្សារ​អង្ករ​កម្ពុជា​នៅ​តាម​បណ្ដា​ប្រទេស​នៅ​សហភាព អឺរ៉ុប​នៅ​តែ​មាន​ស្ថិរភាព ខណៈ​ដែល​ទីផ្សារ​អង្ករ​កម្ពុជា​នៅ​ក្នុង​ប្រទេស​ចិន​បាន​កើន​ឡើង​យ៉ាង​ឆាប់​រហ័ស។ ចិន​បាន​ចាប់​ផ្ដើម​នាំ​ចូល​អង្ករ​កាន់​តែ​ច្រើន​ពី​ប្រទេស​កម្ពុជា ដែល​ប្រទេស​នេះ​មិន​បាន​នាំ​ចូល​សោះ​កាល​ពី​ឆ្នាំ​២០១៣ »។

លោក​បន្ត​ថា៖ «​កម្ពុជា​ក៏​កំពុង​ចាប់​ផ្ដើម​ផលិត​អង្ករ​ចំហុយ​ផង​ដែរ ​ដើ​ម្បី​ផ្គត់​ផ្គង់​តម្រូវ​ការ​ទៅ​កាន់​បណ្ដា​ប្រទេស​នានា ដូចជា​ ប្រទេស​អ៊ីតាលី ជាដើម។ រហូត​មក​ដល់​ពេល​នេះ​ យើង​មាន​រោង​ម៉ាស៊ីន​កិន​ស្រូវ​ចំនួន​ ៥ ដែល​អាច​កែច្នៃ​អង្ករ​ចំហុយ​បាន​។ នេះ​គឺជា​កិច្ច​ខិត​ខំ​ប្រឹង​ប្រែង​មួយ​ផ្សេង ទៀត​នៃ​ការ​ធ្វើ​ពិពិធកម្ម​លើ​ផលិតផល របស់​យើង​ដែល​អនុញ្ញាត​ឲ្យ​ប្រទេស​កម្ពុជា​នាំ​ចេញ​កាន់​តែ​ច្រើន​»។

លោក ​សារ៉ន ថ្លែង​ថា ​ប្រទេស​កម្ពុជា​គួរ​តែ​ផ្ដោត​លើ​ការ​ផលិត​អង្ករ​ប្រកប​ដោយ​គុណភាព ​ដើម្បី​ប្រកួត​ប្រជែង​ក្នុង​ទីផ្សារ​ ជា​ពិសេស​ទីផ្សារ​ប្រទេស​ចិន​ ដែល​ជា​អតិថិជន​កំពុង ជ្រើស​រើស​អាហារ​ដែល​មិន​មាន​សារ​ជាតិ​គីមី ជា​ជាង​ផលិត​អង្ករ​ដែល​មាន​តម្លៃ​កាន់​តែ​ទាប​ដែល​ផ្ដល់​ប្រាក់ ចំណេញ​តិច​តួច​ដល់​កសិករ និង​ក្រុមហ៊ុន​នាំ​ចេញ​។

យោង​តាម​របាយការណ៍​នេះ គ្រាន់ តែ​ប្រទេស​ចិន​តែ​មួយ​បាន​នាំ​ចូល អង្ករ​ជាង​ ៧២ ០០០​តោន​ពី​ប្រទេស​កម្ពុជា​នៅ​ក្នុង​ឆមាស​ទី១។ រហូត​មក ទល់​ពេល​នេះ កម្ពុជា​កំពុង​រង់ចាំ​កូតា​ថ្មី​ពី​ប្រទេស​ចិន​បន្ទាប់​ពី​កូតា​ចំនួន​ ១សែន​តោន​សម្រាប់​ឆ្នាំ​២០១៤-២០១៥ ត្រូវ​ចប់​នៅ​ខែ​ឧសភា។

លោក កែន រដ្ឋា​ អ្នក​នាំ​ពាក្យ​របស់​ក្រសួង​ពាណិជ្ជកម្ម មិន​អាច​ទាក់ទង​សុំ​ការ​អត្ថាធិប្បាយ​បាន​ទេ​កាល​ពី​ថ្ងៃ​ម្សិលមិញ។

ក្នុង​រយៈពេល​៦ខែ​ដំបូង​នៅ​ក្នុង​ឆ្នាំ​២០១៣ ប្រទេស​កម្ពុជា​បាន​នាំ​ចេញ​ចំនួន​តែ ១៧៥ ៩៥៩​តោន​ប៉ុណ្ណោះ។ តួ​លេខ​នេះ​មិន​បាន​ផ្លាស់​ប្តូរ​ច្រើន​ទេ​កាល​ពី​ឆ្នាំ​២០១៤ ដែល​ការ​នាំ​ចេញ អង្ករ​សរុប​មាន​ចំនួន ១៧៧ ៩២៨​តោន​។

ប្រទេស​នៅ​តំបន់​អឺរ៉ុប រួម​មាន​ប្រទេស​បារាំង​ ប៉ូឡូញ និង​ហូឡង់ នៅ​តែ​ជា​ប្រទេស​នាំ​ចូល​អង្ករ​ពី​កម្ពុជា​ច្រើន​ជាង​គេ​ទាំង​បី​ចាប់​ពី​ខែ​មករា​ដល់​ខែ​មិថុនា​នៅ​ឆ្នាំ​នេះ។ ប្រទេស អ៊ីតាលី ដែល​បាន​ដាក់​ញ្ញត្តិ​ទៅ​សហភាព​អឺរ៉ុប​ឲ្យ​ដកចេញ​អង្ករ​របស់​ប្រទេស​កម្ពុជា​ពី​គម្រោង​អ្វីៗ​គ្រប់​យ៉ាង​លើក​លែង​តែ​អាវុធ (EBA) និង​ដែល​បាន​លើក​ឡើង​ពី​ការ​ប្រកួត​ប្រជែង​កាន់​តែ​ខ្លាំង​ពី​ប្រទេស​កម្ពុជា​នោះ​ បាន​ជាប់​ចំណាត់​ថ្នាក់​ជា​ប្រទេស​នាំ​ចូល​អង្ករ​ទី៤​ពី​ប្រទេស​កម្ពុជា៕ PB

អត្ថបទគួរចាប់អារម្មណ៍