ភ្នំពេញៈ ការនាំចេញអង្ករពីកម្ពុជាទៅកាន់ទីផ្សារអន្តរជាតិក្នុងរយៈពេល ៩ ខែ ឆ្នាំ ២០១៩ កើនឡើង ២ ភាគរយបើធៀបនឹងរយៈពេលដូចគ្នាកាលពីឆ្នាំមុនដែលក្នុងនោះត្រូវបាននាំមុខដោយទីផ្សារចិន។ នេះបើតាមទិន្នន័យរបស់សហព័ន្ធស្រូវអង្ករកម្ពុជា (CRF)។
ទិន្នន័យបង្ហាញថា ការនាំចេញអង្ករទៅទីផ្សារប្រទេសចិនកើនជាង ៤៤ ភាគរយ ខណៈទីផ្សារអឺរ៉ុបបានធ្លាក់ចុះជិត ៣០ ភាគរយ។
របាយការណ៍ឲ្យដឹងទៀតថា ការនាំចេញអង្ករកម្ពុជាទៅកាន់ទីផ្សារអន្តរជាតិនៅក្នុងរយៈពេល ៩ ខែ ឆ្នាំនេះសម្រេចបាន ៣៩៨ ៥៨៦ តោន កើនឡើង ២,៣ ភាគរយ បើធៀបនឹងរយៈពេលដូចគ្នាឆ្នាំ ២០១៨ ដែលមាន ៣៨៩ ២៦៤ តោន។
លោក ចាន់ សុខឃាំង អនុប្រធានសហព័ន្ធស្រូវអង្ករកម្ពុជាកាលពីម្សិលមិញបាននិយាយថា កំណើននាំចេញតិចតួចក្នុងរយៈពេល ៩ ខែនេះដោយសារតែកម្ពុជាមិនមានបរិមាណអង្ករក្នុងស្តុកគ្រប់គ្រាន់សម្រាប់នាំចេញទៅកាន់ទីផ្សារអន្តរជាតិ។
លោកថ្លែងថា៖ «ការនាំចេញអង្ករ ៩ ខែកន្លងមកនេះមានកំណើនតិចតួចដោយសារការប្រមូលផលស្រូវឆ្នាំនេះយឺតជាងពេលធម្មតាចន្លោះពី ២ ទៅ ៣ សប្តាហ៍។ ហេតុនេះយើងមិនមានអង្ករគ្រប់គ្រាន់សម្រាប់នាំចេញច្រើនទេ ពិសេសក្នុងរយៈពេល ៨ ខែដំបូង»។
លោកបន្តថា ទោះយ៉ាងណាដោយសារការប្រមូលផលស្រូវនៅកម្ពុជាពេលនេះបានកើនឡើងជាបន្តបន្ទាប់នោះធ្វើឲ្យការនាំចេញក្នុងខែកញ្ញា កើនឡើងរហូតដល់ ១៨,៧ ភាគរយបើធៀបនឹងរយៈពេលដូចគ្នាក្នុងឆ្នាំ ២០១៨ ហើយចំនួននេះនឹងបន្តកើនឡើងរហូតដល់ចុងឆ្នាំតែម្តង។
លោកអះអាងថា៖ «សម្រាប់ឆ្នាំ ២០១៩ នេះខ្ញុំគិតថា ការនាំចេញអង្ករទៅទីផ្សារអន្តរជាតិនឹងកើនចន្លោះពី ៥-៨ ភាគរយ បើធៀបនឹងឆ្នាំ ២០១៨។
ឆ្នាំ ២០១៨ កម្ពុជានាំចេញអង្ករ ៦២៦ ២២៥ តោន ធ្លាក់ចុះ ១,៥ ភាគរយ បើធៀបនឹង ៦៣៥ ៦៧៩ តោន កាលពីឆ្នាំ ២០១៧។ ក្នុងនោះទីផ្សារអឺរ៉ុបមានចំនួន ២៦៩ ១២៧ តោន និងប្រទេស ចិន មាន ១៧០ ១៥៤ តោន។ ទោះយ៉ាងណាការនាំចេញទៅទីផ្សារអឺរ៉ុបបានធ្លាក់ចុះជាបន្តបន្ទាប់ ក្រោយពីសហភាពអឺរ៉ុបសម្រេចយកពន្ធពីការនាំចូលអង្ករកម្ពុជាកាលពីខែ មករា ឆ្នាំ ២០១៩។
បើតាមលោក សុខឃាំង អង្ករនៅលើទីផ្សារអន្តរជាតិក្នុងឆ្នាំនេះមានតម្លៃខ្ពស់ជាងឆ្នាំមុនប្រហែល ១០ ភាគរយ។
របាយការណ៍នាំចេញអង្ករកម្ពុជាពីលេខាធិការដ្ឋានច្រកចេញចូលតែមួយបានឲ្យដឹងថា ក្នុងរយៈពេល ៩ ខែនេះកម្ពុជានាំចេញអង្ករទៅទីផ្សារចិនបាន ១៥៧ ៧៩៣ តោន អឺរ៉ុប ១៣៥ ៤៧១ តោន និងតំបន់អាស៊ាន ៥៣ ៣៤៧ តោន៕ LA