.jpg)
កម្មករកំពុងលើកអង្ករចេញពីឡានដើម្បីដាក់ចូលឃ្លាំងនៅក្បែរស្ថានីយរថភ្លើងក្នុងទីក្រុងភ្នំពេញកាលពីសប្តាហ៍មុន។ រូបថត ហ៊ាន រង្សី
ភ្នំពេញៈ ក្រុមហ៊ុន ហ្គ្រីនត្រេត និងសហព័ន្ធស្រូវអង្ករកម្ពុជាបានឲ្យដឹងថា វិធានការនៃការបញ្ចេញស្ដុកអង្ករទៅក្នុងទីផ្សារក្នុងរយៈពេលជាង ១ សប្ដាហ៍ គិតត្រឹមថ្ងៃពុធបានជួយក្នុងការធ្វើឲ្យមានស្ថិរភាពតម្លៃទីផ្សារជុំវិញការបារម្ភដោយសារតែកូវីដ ១៩។
កាលពីដើមខែនេះ ដោយសារតែការបារម្ភការរីករាលដាលកូវីដ ១៩ បានជំរុញឲ្យប្រជាជនជាច្រើននៅភ្នំពេញបានទិញអង្ករជាច្រើន និងអាហារសម្រាប់ស្ដុកទុក។
លោក ចាន់ សុខឃាំង អនុប្រធានសហព័ន្ធស្រូវអង្ករ-កម្ពុជា (CRF) បានប្រាប់ភ្នំពេញប៉ុស្ដិ៍ថា ដើម្បីបង្ការការបារម្ភមួយចំនួនថា ទីផ្សារនឹងអស់ទំនិញប្រើប្រាស់សំខាន់ៗដូចជា អង្ករ រដ្ឋាភិបាល និងវិស័យឯកជនបានបង្កើនការផ្គត់ផ្គង់អង្ករបន្ថែមពី ១០០ ទៅ ៥០០ តោនដល់ហាងលក់នៅទីក្រុងភ្នំពេញ ដោយសារតែការរីករាលដាលកូវីដ ១៩។
លោកថ្លែងថា៖ «បច្ចុប្បន្នការលក់អង្ករនៅក្នុងស្រុកគឺល្អ និងតម្លៃអង្ករមានស្ថិរភាពនៅពេលនេះ»។ លោកបន្ថែមថានៅពេលនេះប្រជាជនអាចទិញអង្ករនៅក្រុមហ៊ុន ហ្គ្រីនត្រេត ដែលមានសាខានៅខណ្ឌដូនពេញ និងខណ្ឌឫស្សីកែវនៅទីក្រុងភ្នំពេញ។
តំណាងមួយរូបរបស់ក្រុមហ៊ុន ហ្គ្រីនត្រេត ដែលគ្រប់គ្រងដោយរដ្ឋស្នើសុំមិនបញ្ចេញឈ្មោះបានឲ្យដឹងថា ក្រុមហ៊ុនរបស់លោកលក់អង្ករ ១ តោនក្នុង ១ ថ្ងៃ ហើយលោកចាប់ផ្ដើមដាក់លក់តាំងពីថ្ងៃទី ៩ ខែមីនា មក។ លោកបានលើកឡើងថា៖ «មានប្រជាជនជាច្រើនរីករាយក្នុងការទិញអង្ករពីហាងលក់របស់ខ្ញុំ និងលក់ក្នុងតម្លៃសមរម្យ»។
អង្ករក៏អាចទិញបាននៅក្រុមហ៊ុន Amru Rice (Cambodia) Co Ltd ក្រុមហ៊ុន Mekong Oryza Trading ក្រុមហ៊ុន Baitong Rice Export Company ក្រុមហ៊ុន Khmer Food Group និងតាមរយៈម្ចាស់រោងម៉ាស៊ីនកិនស្រូវនានា។
សេចក្ដីប្រកាសព័ត៌មានរបស់ CRF បានឲ្យដឹងថា អង្ករក្រអូបលក់ក្នុងតម្លៃ ១៥២ ០០០ រៀល (៣៨ ដុល្លារ)។ សេចក្ដីប្រកាសព័ត៌មាននេះបន្តថា៖ «ដូច្នេះសូមកុំបារម្ភខ្លាំងពេក។ មិនមានកង្វះអង្ករនោះទេ។ ប្រសិនបើអ្នកភ័យខ្លាចខ្លាំងពេក តម្លៃអង្ករនឹងកើនឡើងខ្លាំងជាមិនខាន»។
ទន្ទឹមនឹងនេះតម្លៃ និងតម្រូវការម៉ាស់មុខ និងទឹកលាងដៃនៅកម្ពុជាបានកើនឡើងយ៉ាងខ្លាំង ដោយសារតែការបារម្ភការរីករាលដាលកាន់តែខ្លាំងឡើងរបស់វីរុសនេះនៅពេលបច្ចុប្បន្ន៕LA
