.jpg)
កម្មករចាកចេញពីកន្លែងធ្វើការក្នុងរោងចក្រមួយកន្លែងនៅសង្កាត់ចោមចៅ។ ហេង ជីវ័ន
ភ្នំពេញៈ វិស័យឯកជនបានស្វាគមន៍វិធានការជាបន្តរបស់រដ្ឋាភិបាលក្នុងការជំរុញកំណើនសេដ្ឋកិច្ចដើម្បីធ្វើឱ្យក្រុមហ៊ុនអាចរក្សាលំនឹងក្នុងអំឡុងពេលការរីករាលដាលជំងឺកូវីដ១៩ ដែលនៅតែបន្ត ជាពិសេសផលប៉ះពាល់ធ្ងន់ធ្ងរដោយសារព្រឹត្តិការណ៍សហគមន៍ ២០ កុម្ភៈ។
កាលពីថ្ងៃទី ២៥ ខែមីនា រដ្ឋាភិបាលបានប្រកាសដាក់ចេញវិធានការបន្ថែមជុំទី ៨ សម្រាប់វិស័យកាត់ដេរ វាយនភណ្ឌ ស្បែកជើង ផលិតផលធ្វើដំណើរ និងកាបូបដែលរដ្ឋាភិបាលនឹងបន្តផ្ដល់ប្រាក់ឧបត្ថម្ភ ៤០ ដុល្លារ ក្នុង ១ ខែសម្រាប់កម្មករ និយោជិត ១ នាក់ ដែលបំពេញការងារក្នុងវិស័យនេះសម្រាប់រយៈពេល ៣ ខែបន្ថែមទៀតពីខែមេសា-មិថុនា ឆ្នាំ ២០២១។ ម្ចាស់រោងចក្រ សហគ្រាស ក្នុងវិស័យនេះត្រូវបន្ថែមចំនួន ៣០ ដុល្លារ សម្រាប់កម្មករនិយោជិត ១ នាក់ (សរុបកម្មករ និយោជិត ១ នាក់ទទួលបាន ៧០ ដុល្លារក្នុង ១ ខែ)។
លោក ខេន លូ អគ្គលេខាធិការនៃសមាគមរោងចក្រកាត់ដេរកម្ពុជាបានសាទរការធ្វើអន្តរាគមន៍ពីរដ្ឋាភិបាលក្នុងការជួយដល់ឧស្សាហកម្មនេះដែលបានរងផលប៉ះពាល់ធ្ងន់ធ្ងរដោយសារការរីករាលដាលវីរុសកូរ៉ូណា។
លោកថ្លែងថា៖ «ការសម្រេចចិត្តបន្តផែនការ ៤០ ដុល្លារ សម្រាប់កម្មករដែលផ្អាកការងារគឺល្អណាស់។ ការបន្តនេះនឹងជួយដល់កម្មករដែលរងប៉ះពាល់ ក្នុងពេលដ៏ពិបាកក៏ដូចជាការជួយដល់ថៅកែផងដែរ។ ថៅកែដែលបច្ចុប្បន្ន មិនមានការបញ្ជាទិញអាចដាក់ពាក្យសម្រាប់ការផ្អាកដំណើរការ និងប្រើប្រាស់ពេលវេលាក្នុងការព្យាយាម និងទទួលបានឱកាសអាជីវកម្មថ្មីៗ»។
ទន្ទឹមនឹងនេះសម្រាប់វិស័យទេសចរណ៍ រដ្ឋាភិបាលក៏នឹងបន្តផ្ដល់ប្រាក់ឧបត្ថម្ភ ៤០ ដុល្លារ ក្នុង ១ ខែសម្រាប់កម្មករ ១ នាក់សម្រាប់រយៈពេល ៣ ខែផងដែរ។ សហគ្រាស និងអាជីវកម្មក្នុងវិស័យទេសចរណ៍ត្រូវរួមចំណែកតាមគោលការណ៍ស្ម័គ្រចិត្ត និងតាមលទ្ធភាពជាក់ស្ដែងបន្ថែមលើអ្វីដែលរដ្ឋាភិបាលបានផ្ដល់ជូន។
ចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីនឹងបន្តលើកលែងការបង់ពន្ធប្រចាំខែគ្រប់ប្រភេទ សម្រាប់រយៈពេល ៣ ខែបន្ថែមទៀតពីខែមេសា-មិថុនា។ ការលើកលែងនេះអនុវត្តចំពោះសកម្មភាពអាជីវកម្មនៅក្នុងរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកែប ខេត្តកំពត ក្រុងបាវិត (ស្វាយរៀង) និងក្រុងប៉ោយប៉ែត (បន្ទាយមានជ័យ)។ អាជីវកម្មទាំងនេះនៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញសម្រាប់គ្រប់គ្រងអាករលើតម្លៃបន្ថែម (E-VAT) ជារៀងរាល់ខែក្នុងអំឡុងពេលលើកលែងនេះ។
លោក ធួន ស៊ីណាន ប្រធាន PATA Cambodia Chapter បានទទួលស្គាល់ការធ្វើអន្តរាគមន៍ពីរដ្ឋាភិបាលក្នុងការជួយឧស្សាហកម្មទេសចរណ៍ ទោះបីជាវាមិនច្រើនក៏ដោយ។ លោកបញ្ជាក់ថា៖ «យើងពិតជាកោតសរសើរការជួយពីរដ្ឋាភិបាលសម្រាប់ឧស្សាហកម្មរបស់យើង។ ទោះបីយ៉ាងណា យើងចង់ឱ្យរាជរដ្ឋាភិបាលកំណត់មូលនិធិពិសេសសម្រាប់វិស័យទេសចរណ៍សម្រាប់ក្រោយជំងឺកូវីដ ១៩ ព្រោះអាជីវករភាគច្រើនមិនទទួលបានប្រាក់ចំណូលទាល់តែសោះ ដូច្នេះយើងចង់ឱ្យរដ្ឋាភិបាលពិចារណាសំណើរបស់យើង នៅពេលដែលវីរុសកូរ៉ូណាត្រូវទប់ស្កាត់បាន»។
យោងតាមសេចក្ដីប្រកាសនេះ រដ្ឋាភិបាលក៏បន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធប្រឆាំងនឹងកូវីដ ១៩ សម្រាប់រយៈពេល ៣ ខែបន្ថែមទៀតពីខែមេសាខែមិថុនា ឆ្នាំ ២០២១។
ជាមួយគ្នានេះ រដ្ឋាភិបាលក៏បន្តណែនាំដល់ក្រសួង ស្ថាប័នរដ្ឋ និងអំពាវនាវដល់បុគ្គលឯកជន ដែលជាម្ចាស់អគារទីតាំងអាជីវកម្ម និងរោងចក្រជួយសម្រួលដល់ភាគីអ្នកជួលដោយចៀសវាងការបញ្ឈប់កិច្ចសន្យា ឬការបណ្ដេញចេញក្នុងករណីដែលភាគីអ្នកជួលមិនមានលទ្ធភាពបង់ថ្លៃសេវាជួលបានទាន់ពេលវេលា។
សេចក្ដីប្រកាសបានបន្តថា៖ «រាជរដ្ឋាភិបាលបន្តតាមដានជាប់ជាប្រចាំនូវស្ថានភាពនៃជំងឺកូវីដ ១៩ លើស្ថានភាពសង្គមសេដ្ឋកិច្ច និងហិរញ្ញវត្ថុក្នុងក្របខ័ណ្ឌសកល តំបន់ និងប្រទេស ដើម្បីពិនិត្យ និងវាយតម្លៃផលប៉ះពាល់នៃជំងឺកូវីដ១៩ មកលើវិស័យសំខាន់ៗនៃសេដ្ឋកិច្ចកម្ពុជាក្នុងទិសដៅធ្វើបច្ចុប្បន្នភាព និងត្រៀមដាក់ចេញនូវវិធានការថ្មីៗបន្ថែមចាំបាច់នានា សំដៅស្ដារ និងជំរុញកំណើនសេដ្ឋកិច្ចក្រោមក្របខ័ណ្ឌផែនការយុទ្ធសាស្ដ្រស្តារសេដ្ឋកិច្ចឡើងវិញក្នុងអំឡុងពេល និងក្រោយពីវិបត្តិនៃជំងឺកូវីដ ១៩៕LA
