ភ្នំពេញៈ ការបាក់រលំអគារកម្ពស់ ៧ ជាន់ ដែលជាគម្រោងសណ្ឋាគាររបស់វិនិយោគិនចិននៅក្រុងព្រះសីហនុ នឹងមិនជះឥទ្ធិពលអវិជ្ជមានណាមួយទៅដល់វិស័យទេសចរណ៍នៅកម្ពុជាទេ។ នេះបើតាមអ្នកនៅក្នុងវិស័យទេសចរណ៍។
ខេត្តព្រះសីហនុ ត្រូវបានគេដឹងថា ជាកន្លែងដែលសំណង់អគារធំៗកំពុងលេចឡើងយ៉ាងច្រើន ពិសេសសំណង់សណ្ឋាគារ កាស៊ីណូ មជ្ឈមណ្ឌលពាណិជ្ជកម្ម ខុនដូ និងអាផាតមិនជាដើម ដែលជាគម្រោងវិនិយោគរបស់ចិន។
លោក តុប សុភ័ក អ្នកនាំពាក្យក្រសួងទេសចរណ៍ បានប្រាប់ភ្នំពេញ ប៉ុស្តិ៍ កាលពីថ្ងៃម្សិលមិញថា ការដួលរលំសំណង់សណ្ឋាគារក្នុងក្រុងព្រះសីហនុ កាលពីសប្តាហ៍មុនមិនធ្វើឲ្យប៉ះពាល់ដល់ទំនុកចិត្តភ្ញៀវទេសចរបរទេសដែលចង់ធ្វើដំណើរខេត្តនេះទេ។ លោកបន្តថា ក្រសួងទេសចរណ៍តែងខិតខំធ្វើការងារជាច្រើន ដើម្បីទាក់ទាញភ្ញៀវទេសចរបរទេសឲ្យធ្វើដំណើរមកកម្សាន្តនៅកម្ពុជា។
លោកថ្លែងថា៖ «ខ្ញុំគិតការដួលរលំនៃអគារដែលគ្រោងនឹងប្រើប្រាស់ជាសណ្ឋាគារនេះ មិនមានផលប៉ះពាល់ទៅដល់ទំនុកចិត្តរបស់ភ្ញៀវទេសចរបរទេស ពិសេសភ្ញៀវជនជាតិចិននោះទេ ព្រោះវាគ្រាន់តែជាឧបទ្ទវហេតុក្នុងវិស័យសំណង់ប៉ុណ្ណោះ»។
ទោះយ៉ាងណា លោកនិយាយថា ក្នុងនាមក្រសួងទេសចរណ៍ក៏សូមស្នើឲ្យអ្នកពាក់ព័ន្ធទាំងអស់បង្កើនការយកចិត្តទុកដាក់លើគុណភាពនៃការសាងសង់បន្ថែមទៀត ដើម្បីធានាបាននូវការទុកចិត្តទុកដាក់មួយកម្រិតថែមទៀត។ លោកថ្លែងថា៖ «ប្រសិនបើគុណភាពសំណង់សណ្ឋាគារមិនមានគុណភាពនោះ វាក៏អាចធ្វើឲ្យការចូលមកស្នាក់នៅធ្លាក់ចុះផងដែរ»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានប្រាប់ថា វាមិនមានបញ្ហាទេសម្រាប់ព័ត៌មានពីការដួលរលំអគារសណ្ឋាគារក្នុងក្រុងព្រះសីហនុ ព្រោះហេតុការណ៍ដូចគ្នានេះក៏ធ្លាប់កើតមាននៅតាមប្រទេសមួយចំនួននៅលើពិភពលោករួចហើយ។ លោកថ្លែងថា៖ «នេះគ្រាន់តែជាការរំញោចអារម្មណ៍តិចតួចប៉ុណ្ណោះ ហើយវានឹងមិនមានផលប៉ះពាល់ដល់វិស័យទេសចរណ៍នៅកម្ពុជា ពិសេសក្នុងខេត្តព្រះសីហនុទេ»។
លោកបន្តថា ហេតុការណ៍នេះក៏អាចនិយាយថា ជាកង្វះខាតនៃការត្រួតពិនិត្យ និងទទួលខុសត្រូវរបស់រដ្ឋាភិបាលផងដែរ។ ទោះយ៉ាងណាលោកថា៖ «គ្រប់ទីក្រុងធំៗនៅលើពិភពលោក ឲ្យតែមានការអភិវឌ្ឍសម្រុកខ្លាំងដូចជានៅក្រុងព្រះសីហនុ ការប៉ះទង្គិច ការខ្វះខាតនូវការអនុវត្តច្បាប់ និងការត្រួតពិនិត្យប្រាកដជាកើតមាន»។
ទោះបីយ៉ាងនេះក្តី លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានប្រាប់ថា ទោះតិចឬច្រើន ហេតុការណ៍នេះ ពិតជាធ្វើឲ្យមានផលប៉ះពាល់ទៅដល់ផ្លូវចិត្តសម្រាប់ភ្ញៀវទេសចរ ពិសេសភ្ញៀវជនជាតិចិនដែលកំពុងមានវត្តមានយ៉ាងច្រើននៅក្នុងខេត្តព្រះសីហនុ។ លោកថ្លែងថា៖ «ការខ្លាចរអាចំពោះការស្នាក់នៅទាំងរយៈពេលខ្លី និងវែង ពិតជាកើតមានសម្រាប់ភ្ញៀវទេសចរ និងអ្នកស្នាក់នៅផ្សេងទៀត»។
លោកបានបន្តថា ឧបទ្ទវហេតុនេះកើតឡើងដោយសារការធ្វេសប្រហែសរបស់អ្នកវិនិយោគ និងការមិនសូវយកចិត្តទុកដាក់ពីសំណាក់អាជ្ញាធរក្នុងការត្រួតពិនិត្យទៅលើគុណភាពសំណង់។
លោកបញ្ជាក់ថា៖ «យើងចង់ឲ្យមានគណៈកម្មការត្រួត-ពិនិត្យគុណភាពសំណង់អគារទាំងអស់ឡើងវិញនៅគ្រប់រាជធានី ខេត្តក្រុង ដើម្បីបន្ថែមសេចក្តីសុខផ្លូវចិត្តសម្រាប់គ្រប់គ្នា ព្រោះនៅពេលមានសេចក្តីសុខផ្លូវចិត្ត សេចក្តីសុខផ្លូវកាយនឹងជំរុញឲ្យភ្ញៀវកាន់តែច្រើនធ្វើដំណើរមកសម្រាកកម្សាន្តនៅកម្ពុជា»៕AL