ភ្នំពេញៈ មន្ដ្រីវៀតណាមបញ្ជាក់ថា ទោះបីជាការរឹតបន្តឹងព្រំដែនជាមួយប្រទេសកម្ពុជាដោយសារតែការរីករាលដាលវីរុសកូរ៉ូណាក៏ពាណិជ្ជកម្មឆ្លងកាត់ព្រំដែនរវាងប្រទេសទាំង ២ នេះនៅតែស្ថិតក្នុងកិច្ចខិតខំប្រឹងប្រែងដើម្បីសម្រេចបានពាណិជ្ជកម្មទ្វេភាគីដែលបានកំណត់ ៥ ពាន់លានដុល្លារត្រឹមចុងឆ្នាំនេះ។
ព្រំដែនរវាងប្រទេសកម្ពុជា និងវៀតណាម ត្រូវបានរឹតបន្តឹងការឆ្លងកាត់ និងដាក់ការហាមឃាត់សម្រាប់អ្នកដំណើរបរទេសរយៈពេល ១ ខែ លើកលែងតែអ្នកកាន់លិខិតឆ្លងដែនការទូត និងផ្លូវការ។
លោក Minh Quang Vu ឯកអគ្គរដ្ឋទូតវៀតណាមប្រចាំនៅកម្ពុជាបានបង្ហោះសារលើទំព័រ facebook របស់លោកកាលពីថ្ងៃពុធដោយបញ្ជាក់ថា ព័ត៌មានក្លែងក្លាយនេះត្រូវបានរីករាលដាល។ បច្ចុប្បន្នប្រទេសវៀតណាមកំពុងពង្រឹងវិធានការការទប់ស្កាត់ការរីករាលដាលកូវីដ ១៩។ ការដាក់ឲ្យនៅដាច់ដោយឡែកដោយបង្ខំនៅក្នុងអគារដែលបានកំណត់នឹងត្រូវបានពង្រីកដើម្បីដាក់បញ្ចូលអ្នកទាំងអស់ដែលចូលមកពីអាមេរិក អឺរ៉ុប និងបណ្ដាប្រទេសអាស៊ាន។
ក្រសួងការបរទេស និងសហប្រតិបត្តិការអន្តរជាតិកម្ពុជាកាលពីថ្ងៃពុធ បានចេញសេចក្ដីប្រកាសព័ត៌មានហាមប្រជាជនវៀតណាមមិនឲ្យធ្វើដំណើរចូលមកប្រទេស កម្ពុជា ក្នុងអំឡុងពេលការរឹតបន្តឹងការធ្វើដំណើររបស់វៀតណាម ទោះបីយ៉ាងណានៅតែបើកចំហសម្រាប់ការផ្លាស់ប្តូរទំនិញ។
លិខិតនេះឲ្យដឹងថា៖ «ភាគីកម្ពុជាស្នើឡើងថា អាជ្ញាធររបស់ប្រទេសទាំង ២ ត្រូវធ្វើការងារជាមួយគ្នា ដើម្បីជួយសម្រួល និងធានាថាការដឹកជញ្ជូនទំនិញឆ្លងកាត់ព្រំដែនធម្មតាអាចត្រូវបានធ្វើឡើងដោយមិនមានការរំខាន»។
មន្ដ្រីនៅស្ថានទូតវៀតណាមប្រចាំនៅកម្ពុជាដែលស្នើសុំមិនបញ្ចេញឈ្មោះបានឲ្យដឹងថា ទោះបីប្រទេស វៀតណាម កំពុងពង្រឹងវិធានការឆ្លងកាត់តាមបណ្ដោយព្រំដែនដោយសារតែការរីករាលដាលជំងឺកូវីដ ១៩ ក៏ដោយប្រទេសទាំង ២ នៅតែផ្លាស់ប្តូរទំនិញទៅវិញទៅមក។
មន្ដ្រីនោះបានបន្តថា៖ «សកម្មភាពពាណិជ្ជកម្មនៅតែធ្វើឡើងជាធម្មតា។ ភាគីវៀតណាមនៅថ្នាក់មូលដ្ឋានដែលមានព្រំដែនជាប់ប្រទេសកម្ពុជានឹងសហការយ៉ាងជិតស្និទ្ធជាមួយភាគីកម្ពុជា ដើម្បីធ្វើឲ្យប្រាកដថាសកម្មភាពនោះត្រូវបានធ្វើឡើងយ៉ាងល្អប្រសើរ»។
មន្ដ្រីនោះលើកឡើងថា៖ «ខ្ញុំគិតថា ការធ្លាក់ចុះទំហំពាណិជ្ជកម្មទ្វេភាគី មិនអាចចៀសផុតនោះទេ ដោយសារតែការរីករាលដាលនេះធ្វើឲ្យមានផលប៉ះពាល់ដ៏អាក្រក់លើបណ្ដាប្រទេសទាំងអស់លើពិភពលោក មិនគ្រាន់តែវៀតណាម ឬកម្ពុជានោះទេ»។
មន្ដ្រីនោះបញ្ជាក់ថា៖ «ប៉ុន្តែភាគីវៀតណាម បានរៀបចំផែនការលើកកម្ពស់ពាណិជ្ជកម្មរួចហើយ ដើម្បីជំរុញកិច្ចសហប្រតិបត្តិការសេដ្ឋកិច្ចរបស់យើងបន្ទាប់ពីវីរុសនេះបញ្ចប់ការរីករាលដាល។ ដូច្នេះសូមជឿជាក់ថា កិច្ចសហប្រតិបត្តិការសេដ្ឋកិច្ចរបស់យើងនឹងស្ទុះងើបឡើងវិញក្នុងពេលឆាប់ៗ»។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា ការបិទព្រំដែននេះនឹងប៉ះពាល់ដល់ការផ្លាស់ប្តូរទំនិញរវាងប្រទេសទាំង ២ ជាពិសេសវិស័យទេសចរណ៍។ លោកបន្តថា៖ «តាមដែលខ្ញុំដឹងការបិទនេះគឺគ្រាន់តែរឹតបន្តឹងប្រជាជនឆ្លងកាត់ព្រំដែន។ ទោះយ៉ាងណាការផ្លាស់ប្តូរពាណិជ្ជកម្មនៅតែមាន។ ប៉ុន្តែផលប៉ះពាល់ខ្លាំងបំផុតគឺវិស័យទេសចរណ៍រវាងប្រទេសទាំង ២ ប្រសិនបើការបិទនោះមានរយៈពេលវែង»។
មេដឹកនាំរបស់ប្រទេសទាំង ២ បានសន្យាថានឹងលើកកម្ពស់ពាណិជ្ជកម្មឆ្លងកាត់ព្រំដែនរវាងប្រទេសទាំង ២ ដើម្បីសម្រេចបានជាង ៥ ពាន់លានដុល្លារត្រឹមចុងឆ្នាំនេះ។
ទិន្នន័យបានពីស្ថានទូតវៀតណាមប្រចាំនៅកម្ពុជាបានឲ្យដឹងថា ទំហំពាណិជ្ជកម្មសរុបសម្រាប់ឆ្នាំ ២០១៨ បានកើនឡើងដល់ ៤,៧០៤ ពាន់លានដុល្លារ កើនឡើង ២៣,៨ ភាគរយ ធៀបនឹងឆ្នាំ ២០១៧។ ទំហំពាណិជ្ជកម្មក្នុងអំឡុង ១១ ខែដំបូងកាលពីឆ្នាំមុនបានកើនឡើងដល់ ៤,៨ ពាន់លានដុល្លារ កើនឡើង ១៣,៨ ភាគរយ ធៀបនឹងឆ្នាំ ២០១៨។
មានគម្រោងវិនិយោគរបស់វៀតណាមចុះបញ្ជីចំនួន ២១៤ នៅកម្ពុជាដែលមានតម្លៃសរុប ៣,០៧៤ ពាន់លានដុល្លារ។ នៅក្នុងចំណោមនោះ ១៧៦ គម្រោង កំពុងដំណើរការជាមួយនឹងទុនចុះបញ្ជីសរុប ២,៧៧ ពាន់លានដុល្លារ។
នៅក្នុងរយៈពេល ៥ ខែដំបូងកាលពីឆ្នាំមុន រដ្ឋាភិបាលកម្ពុជាបានអនុម័តគម្រោងថ្មី ៣ ជាមួយនឹងទុនចុះបញ្ជីសរុប ៥៣០ ០០០ ដុល្លារ។ គម្រោង ៣ បន្ថែមទៀតបានកែតម្រូវការប្ដេជ្ញាចិត្តរបស់ពួកគេដែលបង្កើនការវិនិយោគសរុបដល់ ៣៧,៥ លានដុល្លារ។ ជាលទ្ធផលប្រទេសវៀតណាមគឺជាដៃគូពាណិជ្ជកម្មឈានមុខគេទី ៣ របស់ប្រទេសកម្ពុជាដោយមានក្រុមហ៊ុនវិនិយោគរហូតដល់ ៥០ លានដុល្លារគិតត្រឹមខែកញ្ញាឆ្នាំមុន៕LA