ភ្នំពេញ: អ្នកជាប់ពន្ធទាំងអស់នឹងកាន់តែងាយស្រួលក្នុងការដាក់លិខិតប្រកាសពន្ធ និងពន្ធលើប្រាក់ចំណូលរបស់ពួកគេ តាមរយៈប្រព័ន្ធអនឡាញ E-filling ដែលនឹងចាប់ផ្ដើមអនុវត្តចាប់ពីខែមីនា។
យោងតាមសេចក្ដីប្រកាសបានពីអគ្គនាយកដ្ឋានពន្ធដារ (GDT) ដែលចុះកាលបរិច្ឆេទថ្ងៃទី ១៨ ខែកុម្ភៈថា អគ្គនាយកដ្ឋានពន្ធដារបានអភិវឌ្ឍប្រព័ន្ធរួចរាល់នូវប្រព័ន្ធគ្រប់គ្រងការដាក់លិខិតប្រកាសពន្ធលើប្រាក់ចំណូលប្រចាំឆ្នាំតាមអនឡាញ (ToI E-filing) ដើម្បីសម្រួលការដាក់លិខិតប្រកាសពន្ធ និងបង់ប្រាក់ពន្ធលើប្រាក់ចំណូលប្រចាំឆ្នាំ។
សេចក្ដីប្រកាសនេះបន្តថា៖ «ប្រព័ន្ធនេះ ដើម្បីពង្រឹងសេវាផ្នែកចាត់ចែងលិខិតប្រកាសពន្ធជូនអ្នកជាប់ពន្ធឱ្យកាន់តែមានប្រសិទ្ធភាពខ្ពស់ ស័ក្ដិសិទ្ធិភាព ធានាបាននូវតម្លាភាព ភាពងាយស្រួល ឆាប់រហ័ស ចំណេញពេលវេលា និងភាពជឿទុកចិត្តក្នុងការផ្ដល់សេវាជូនដល់អ្នកជាប់ពន្ធ»។ អ្នកជាប់ពន្ធតាមរបបស្វ័យប្រកាសទាំងអស់ ត្រូវដាក់លិខិតប្រកាសពន្ធលើប្រាក់ចំណូលប្រចាំឆ្នាំ តាមប្រព័ន្ធគ្រប់គ្រងការដាក់លិខិតប្រកាសពន្ធលើប្រាក់ចំណូលប្រចាំឆ្នាំតាមអនឡាញ (ToI E-filing) ចាប់ពីខែមីនា ឆ្នាំ ២០២១ នេះតទៅ។
លោក Anthony Galliano អគ្គនាយកក្រុមហ៊ុន Cambodian Investment Management បានប្រាប់ ភ្នំពេញ ប៉ុស្ដិ៍ថា ការចាប់ផ្ដើមប្រើប្រាស់ប្រព័ន្ធអនឡាញ E-filling បានផ្លាស់ប្តូរការរៀបចំពន្ធរបស់កម្ពុជា និងការបំពេញឯកសារពីការទំនាក់ទំនងដោយផ្ទាល់ ការប្រើប្រាស់ពេលវេលា និងដំណើរការផលិតភាពទាប ជាមួយនឹងការចូលរួមពហុភាគីដែលមិនចាំបាច់ដូចជា ជាមួយនាយកដ្ឋានពន្ធដារ និងធនាគារទៅជាប្រព័ន្ធស្វ័យប្រវត្តិកម្ម និងរួមបញ្ចូលគ្នាជាទូទៅ។
លោកបានឱ្យដឹងថា វាជាសមិទ្ធផលមួយក្នុងចំណោមសមិទ្ធផលធំៗជាច្រើនរបស់ GDT លើការផ្លាស់ប្តូរឯកសារពន្ធទៅជាឌីជីថលដ៏ទំនើប។ លោកថ្លែងថា៖ «ការដាក់បញ្ចូលពន្ធលើប្រាក់ចំណូល គឺជាការរីកចម្រើនជាធម្មតាមួយ និងជាការជឿនលឿនមួយកម្រិតទៀតរបស់ប្រព័ន្ធនេះ។ ការប្រើប្រាស់ប្រព័ន្ធនេះកាន់តែទូលំទូលាយ គុណតម្លៃក៏កាន់តែធំសម្រាប់ទាំងអ្នកជាប់ពន្ធ និង GDT»។
ជាមួយនឹងការផ្លាស់ប្តូររបស់ GDT ទៅជាការធ្វើទំនើបកម្មផ្នែកបច្ចេកវិទ្យា លោកថា ការប្រមូលពន្ធ ច្បាស់ណាស់នឹងប្រសើរឡើង ដោយសារតែទិន្នន័យអ្នកជាប់ពន្ធសម្រាប់ការដាក់ឯកសារពន្ធប្រចាំខែ និងប្រចាំឆ្នាំនៅពេលនេះគឺស្ថិតនៅយ៉ាងពេញលេញ។
លោកលើកឡើងថា៖ «ខ្ញុំសូមអបអរសាទរ GDT សម្រាប់ការបន្តធ្វើឱ្យប្រសើរឡើង និងការកែលម្អនៃប្រព័ន្ធអនឡាញ E-Filing។ ខ្ញុំមានភាពកក់ក្ដៅ សុវត្ថិភាពខ្លាំងបំផុត ដោយការដាក់ឱ្យដំណើរការនៅពេលថ្មីៗនៃប្រព័ន្ធចុះបញ្ជីអាជីវកម្មអនឡាញ និងការបន្តរីកចម្រើននៃប្រព័ន្ធអនឡាញ E-Filing បានធ្វើឱ្យកេរ្ដិ៍ឈ្មោះរបស់កម្ពុជាកើនឡើងខ្លាំងទាក់ទងនឹងការបន្ធូរបន្ថយការធ្វើអាជីវកម្ម»៕LA