ភ្នំពេញៈ ការប្រមូលប្រាក់ចំណូលរបស់អគ្គនាយកដ្ឋានគយ និងរដ្ឋាករកម្ពុជា (GDCE) បានធ្លាក់ចុះជាង ១៦ ភាគរយនៅឆមាសទី ១ ឆ្នាំនេះដែលការធ្លាក់ចុះនេះបណ្តាលមកពីសកម្មភាពនាំចូល និងនាំចេញទំនិញបានទទួលរងផលប៉ះពាល់ធ្ងន់ធ្ងរពីវិបត្តិសុខភាពពិភពលោក។
យោងតាមទិន្នន័យពី GDCE ដែលចេញផ្សាយកាលពីថ្ងៃពុធ អគ្គនាយកដ្ឋានប្រមូលចំណូលពន្ធបានជាង ១,២៧ ពាន់លានដុល្លារនៅឆមាសទី ១ ធ្លាក់ចុះ ១៦,២ ភាគរយធៀបនឹងរយៈពេលដូចគ្នាកាលពីឆ្នាំមុនដែលមានចំនួន ១,៥១៧ ពាន់លានដុល្លារ។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានឲ្យដឹងថា ការធ្លាក់ចុះប្រាក់ចំណូលគឺដោយសារការធ្លាក់ចុះប្រាក់ចំណូលពន្ធពីមុខទំនិញយានយន្តដែលមាន ៣១,៧ ភាគរយ គ្រឿងសំណង់ ធ្លាក់ ២៨,២ ភាគរយ និងប្រាក់ចំណូលពន្ធបានពីប្រេងឥន្ធនៈកើនឡើង ៥,៥ ភាគរយ និងមុខទំនិញចម្រុះផ្សេងទៀតមានកំណើន ៣,១ ភាគរយ។
លោកថ្លែងថា៖ «ការនាំចូលមុខទំនិញយានយន្តដែលជាប្រភពចំណូលគយសំខាន់សម្រាប់ GDCE បានធ្លាក់ចុះយ៉ាងខ្លាំង ជាពិសេសនៅក្នុងត្រីមាសទី ២ ឆ្នាំ ២០២០ នេះ»។
លោកបានពន្យល់ថា ការធ្លាក់ចុះចំណូលពេលនេះព្រោះទំហំពាណិជ្ជកម្មអន្តរជាតិធ្លាក់ចុះ ដោយនៅក្នុងឆមាសទី ១ ឆ្នាំ ២០២០ នេះការនាំចូលទំនិញបានធ្លាក់ចុះ ៩,៤ ភាគរយ ខណៈតម្លៃនាំចេញធ្លាក់ចុះ ០,៧ ភាគរយក្នុងចំណោមនោះតម្លៃនាំចេញផលិតផលកាត់ដេរបានធ្លាក់ចុះ ៧,៥ ភាគរយ ប៉ុន្តែតម្លៃផលិតផលស្រូវអង្ករ កៅស៊ូ និងកសិផលផ្សេងទៀតសរុបកើនឡើង ១៤,៥ ភាគរយ។
លោក ហុង វណ្ណៈ អ្នកស្រាវជ្រាវផ្នែកសេដ្ឋកិច្ចនៃរាជបណ្ឌិត្យសភាកម្ពុជាបានយល់ស្របថា ការធ្លាក់ចុះនេះគឺឆ្លុះបញ្ចាំងពីស្ថានការណ៍ពិត ដែលសកម្មភាពនាំចូល និងនាំចេញត្រូវរងផលប៉ះពាល់យ៉ាងខ្លាំងដោយសារតែការរីករាលដាលជំងឺកូវីដ ១៩ ខណៈដែលទីផ្សារបរទេសបានបិទ។
លោកថ្លែងថា៖ «ទោះជារដ្ឋាភិបាលរបស់យើងបានជំរុញរក្សាសកម្មភាពនាំចូល និងនាំចេញ ជាពិសេសជាមួយបណ្ដាប្រទេសជិតខាងក៏ដោយ ក៏យើងនៅតែមើលឃើញថា ទំហំការនាំចូល និងនាំចេញរបស់យើងទាបជាងអ្វីដែលយើងធ្លាប់មាន ដោយសារតែការរីករាលដាលវីរុសកូរ៉ូណា។ ការនេះពិតណាស់ប៉ះពាល់ដល់ការប្រមូលប្រាក់ចំណូលរបស់យើងផងដែរ»។
ទោះយ៉ាងណាលោកលើកឡើងថា៖ «យើងសង្ឃឹមថា ជាមួយនឹងការបើកដំណើរការសេដ្ឋកិច្ចឡើងវិញ និងបណ្ដាប្រទេសផ្សេងទៀតនឹងជួយបង្កើនការប្រមូលប្រាក់ចំណូលពន្ធរបស់យើងនៅឆមាសទី ២ នេះ»។
យោងតាម GDCE ប្រភពប្រាក់ចំណូលសំខាន់ៗគឺមុខទំនិញយានយន្ត និងគ្រឿងចក្រ ដែលមានចំនួន ៤២,៤ ភាគរយមុខទំនិញប្រេងឥន្ធនៈមាន ២១,៦ ភាគរយ ចំណែកមុខទំនិញចម្រុះផ្សេងទៀត និងសម្ភារសំណង់មានចំនួន ៣៤,៧ ភាគរយ។
លោក គុណ ញឹម បានបន្ថែមថា៖ «អគ្គនាយកដ្ឋានគយ និងរដ្ឋាករនឹងខំពង្រឹងការប្រមូលប្រាក់ចំណូលនៅឆមាសទី ២ ដើម្បីបង្កើនប្រាក់ចំណូល សម្រាប់គាំទ្រកំណើនសេដ្ឋកិច្ចរបស់ប្រទេសក្នុងអំឡុងពេលវេលាដ៏ពិបាកដែលបង្កឡើងដោយជំងឺកូវីដ១៩»។
កាលពីឆ្នាំមុន កម្ពុជាប្រមូលបានប្រហែល ៦ ពាន់លានដុល្លារកើនឡើងជាង ១,៤៨ ពាន់លានដុល្លារនៃផែនការ។ ក្នុងចំណោមតួលេខនេះគឺចំនួន ២,២៦ ពាន់លានដុល្លារត្រូវបានប្រមូលដោយអគ្គនាយកដ្ឋានគយ និងរដ្ឋាករ និងចំនួន ២,៣ ពាន់លានដុល្លារត្រូវបានប្រមូលដោយអគ្គនាយកដ្ឋានពន្ធដារ៕ LA