ភ្នំពេញៈ ការប្រមូលចំណូលពន្ធពីវិស័យកាស៊ីណូនៅកម្ពុជាបានធ្លាក់ចុះយ៉ាងគំហុកក្នុងឆ្នាំ ២០២០ ដោយសារតែការរីករាលដាលជំងឺកូវីដ ១៩ ប៉ះពាល់យ៉ាងខ្លាំងទៅដល់ការធ្វើដំណើររបស់ភ្ញៀវទេសចរបរទេសមកកាន់ប្រទេសកម្ពុជា។ នេះបើតាមមន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ ប្រាប់ភ្នំពេញប៉ុស្តិ៍កាលពីថ្ងៃអាទិត្យ។
លោក រស់ ភិរុណ អគ្គនាយករងនៃអគ្គនាយកដ្ឋានឧស្សាហកម្មនៃក្រសួងសេដ្ឋកិច្ច និងហិរញ្ញវត្ថុបានថ្លែងថា ការប្រមូលចំណូលពន្ធពីវិស័យកាស៊ីណូ ក្នុងឆ្នាំ ២០២០ សម្រេចបានថវិកា ៤០ លានដុល្លារ ថយចុះជាង ៥០ ភាគរយបើធៀបនឹងរយៈពេលដូចគ្នាឆ្នាំ ២០១៩ ដែលកាលនោះសម្រេចបានរហូតដល់ ៨៥ លានដុល្លារ ដោយសារតែការផ្ទុះឡើងជំងឺកូវីដ ១៩ ជាសកលដែលបង្កផលប៉ះពាល់លើវិស័យនានាក្នុងនោះបានប៉ះពាល់ដល់ប្រតិបត្តិការរបស់វិស័យកាស៊ីណូផងដែរ។
លោកថ្លែងថា៖ «ដូចយើងទាំងអស់គ្នាជ្រាបហើយថា ការរីករាលដាលជំងឺកូវីដ ១៩ ដែលចាប់ផ្តើមតាំងពីចុងឆ្នាំ ២០១៩ និងបន្តរហូតមកដល់បច្ចុប្បន្ននេះគឺបានប៉ះពាល់យ៉ាងធ្ងន់ធ្ងរដល់វិស័យនានាដែលក្នុងនោះឧស្សាហកម្មកាស៊ីណូក៏រងផលប៉ះពាល់ខ្លាំងដែរ គឺប្រតិបត្តិការកាស៊ីណូស្ទើរទាំងស្រុងត្រូវបានបិទកាលពីឆ្នាំ ២០២០ ដោយមានតែកាស៊ីណូប្រមាណជា ៧ ទៅ ៨ ប៉ុណ្ណោះដែលត្រដាបត្រដួសដំណើរការអាជីវកម្មរបស់ខ្លួន។ ការណ៍នេះហើយទើបធ្វើឱ្យការប្រមូលចំណូលរបស់យើងធ្លាក់ចុះខ្លាំងមែនទែន»។
កាលពីខែសីហា ឆ្នាំ ២០១៩ លោកនាយករដ្ឋមន្ត្រី ហ៊ុន សែន បានដាក់ចេញបទបញ្ជាមួយក្នុងការហាមរាល់សកម្មភាពល្បែងតាមអនឡាញគ្រប់ប្រភេទដោយត្រូវបិទបញ្ចប់ពីកម្ពុជានៅត្រឹមដំណាច់ចុងឆ្នាំ ២០១៩។ បម្រាមនេះធ្វើឱ្យដំណើការអាជីវកម្មក្នុងឧស្សាហកម្មល្បែង និងកាស៊ីណូនៅកម្ពុជាធ្លាក់ចុះយ៉ាងគំហុក ពិសេសនៅក្នុងខេត្តព្រះសីហនុដែលម្ចាស់អាជីវកម្ម និងអ្នកលេងភាគច្រើនជាជនជាតិចិន។
លោកបន្ថែមថា ការបិទសកម្មភាពល្បែងតាមអនឡាញក៏រួមចំណែកធ្វើឱ្យការប្រមូលពន្ធធ្លាក់ចុះផងដែរ ស្របពេលនឹងការផ្ទុះរីករាលដាលកូវីដ ១៩ ជាសកល។ ជាមួយគ្នានេះក្នុងឆ្នាំ ២០២០ រដ្ឋាភិបាលក៏បានសម្រេចផ្អាកប្រតិបត្តិការក្នុងវិស័យកាស៊ីណូ ដោយសារបញ្ហាជំងឺកូវីដ ១៩។ ការផ្អាកដំណើរការនេះសម្រេចនៅដើមខែមេសា ឆ្នាំ ២០២០ ហើយក្នុងអំឡុងខែសីហា និងខែកញ្ញាត្រូវនឹងត្រីមាសទី ៤ មានកាស៊ីណូមួយចំនួនតូចបានដំណើរការឡើងវិញ។
លោកថ្លែងថា៖ «តាមពិតទៅយើងមានក្តីរំពឹងថា ការប្រមូលពន្ធពីឧស្សាហកម្មកាស៊ីណូរបស់យើងនឹងមានភាពល្អប្រសើរក្នុងឆ្នាំ ២០២១ នេះ ដោយសារតែយើងអនុវត្តតាមច្បាប់ស្ដីពីការគ្រប់គ្រងល្បែងពាណិជ្ជកម្មដែលទើបទទួលបានការអនុម័តដាក់ឱ្យប្រើប្រាស់កាលពីថ្ងៃទី ១៤ ខែ វិច្ឆិកា ឆ្នាំ ២០២០ ដោយរំពឹងថា នឹងមានការកើនឡើងទ្វេដង។ យើងនឹងប្រមូលប្រកបដោយតម្លាភាព តែជំងឺកូវីដ១៩នេះនៅតែបន្តរីករាលដាល ដែលធ្វើឱ្យប៉ះពាល់ដល់ការមកដល់នៃភ្ញៀវទេសចរ ដូច្នេះយើងមិនហ៊ានធ្វើការព្យាករថា ចំណូលពីវិស័យនេះនឹងទៅជាយ៉ាងណានោះទេ»។
កាលពីថ្ងៃទី ១៥ ខែមីនា ក្រុមហ៊ុន NagaCorp ដែលជាក្រុមហ៊ុនមេរបស់ក្រុមហ៊ុនកាស៊ីណូ NagaWorld មានមូលដ្ឋាននៅរាជធានីភ្នំពេញបានប្រកាសថា នឹងបែងចែក ១០០ ភាគរយ នៃប្រាក់ចំណេញសុទ្ធដែលរកបាននៅឆមាសទី២ ឆ្នាំ ២០២០។ ការបែងចែកភាគលាភសម្រាប់ភាគទុនិកគឺមានចំនួន ១,៨៨ សេនដុល្លារ ក្នុង ១ ភាគហ៊ុន ដែលតំណាងឱ្យអនុបាតការបែងចែក ១០០ ភាគរយ ដោយពឹងផ្អែកលើប្រាក់ចំណេញសុទ្ធដែលរកបានក្នុងអំឡុងឆមាសទី២ ឆ្នាំ ២០២០។
ក្រុមហ៊ុននេះឱ្យដឹងថា៖ «ក្នុងអំឡុងពេលរៀងរាល់ ៦ ខែនៅក្នុងឆ្នាំខាងមុខ ក្រុមហ៊ុននឹងត្រួតពិនិត្យ វាយតម្លៃ និងពេលវេលាដ៏សមរម្យ កែតម្រូវគោលនយោបាយភាគលាភរបស់ខ្លួនស្របជាមួយប្រាក់ចំណូលរបស់ក្រុមហ៊ុន សេដ្ឋកិច្ចពិភពលោក ស្ថានភាពជំងឺកូវីដ១៩ និងកត្តាផ្សេងទៀត។ ការណ៍នេះបង្ហាញពីកំណត់ត្រាតាមដានការបែងចែកភាគលាភប្រចាំឆ្នាំ ជាមួយនឹងការបែងចែកភាគលាភសរុបលើសពី ១,៥ ពាន់លានដុល្លារអាមេរិក ចាប់តាំងពីការបោះផ្សាយ IPO របស់ខ្លួនកាលពីឆ្នាំ ២០០៦»។
បើយោងតាមលោក រស់ ភិរុណ គិតត្រឹមខែមីនា ឆ្នាំ ២០២១ កម្ពុជាមានក្រុមហ៊ុនកាស៊ីណូចំនួន ១០១ បានដាក់ពាក្យបន្តអាជ្ញាប័ណ្ណក្នុងចំណោមកាស៊ីណូសរុបចំនួន ១៩៣ នៅត្រឹមដំណាច់ឆ្នាំ ២០២០៕ LA
វីដេអូ៖