.jpg)
អ្នកដំណើរកំពុងធ្វើដំណើរកាត់មុខការិយាល័យកណ្តាល GDT កន្លងមក។ ហុង មិនា
ភ្នំពេញៈ ការប្រមូលចំណូលរបស់អគ្គនាយកដ្ឋានពន្ធដារក្នុងរយៈពេល ១១ ខែ ឆ្នាំ ២០១៩ នេះមានកំណើនប្រមាណជិត ២៨ ភាគរយ បើធៀបទៅនឹងរយៈពេលដូចគ្នាកាលពីឆ្នាំ ២០១៨។ នេះបើយោងតាមលទ្ធផលនៃកិច្ចប្រជុំរបស់អគ្គនាយកដ្ឋានពន្ធដារ។
របាយការណ៍កិច្ចប្រជុំកាលពីថ្ងៃចន្ទបានឲ្យដឹងថា គិតចាប់ពីខែមករាដល់ខែវិច្ឆិកា ឆ្នាំ ២០១៩ អគ្គនាយកដ្ឋានពន្ធដារប្រមូលចំណូលពន្ធអាករគ្រប់ប្រភេទបានចំនួន ២,៦៣ ពាន់លានដុល្លារ ស្មើនឹង ១១៥ ភាគរយ នៃផែនការប្រចាំឆ្នាំ។ ចំនួននេះបើធៀបនឹងរយៈពេលដូចគ្នាកាលពីឆ្នាំ ២០១៨ គឺកើនឡើង ២៧,៦៨ ភាគរយ ឬស្មើនឹង ៥៧០ លានដុល្លារ។
ដោយឡែកសម្រាប់ខែវិច្ឆិកា អគ្គនាយកដ្ឋានពន្ធដារប្រមូលចំណូលបាន ២២៧,៤៨ លានដុល្លារ បើធៀបទៅនឹងខែវិច្ឆិកា ឆ្នាំ ២០១៨ បានកើនឡើង ២១,៣២ ភាគរយ ស្មើនឹងជិត ៤០ លានដុល្លារ។
លោក គង់ វិបុល អគ្គនាយកនៃអគ្គនាយកដ្ឋានពន្ធដារបាននិយាយថា ដើម្បីធានាបាននូវប្រសិទ្ធភាពក្នុងការគ្រប់គ្រងប្រមូលចំណូលពន្ធ និងទៅសម្រេចបានលើសផែនការជាអតិបរមានោះ អគ្គនាយកដ្ឋានពន្ធដារនឹងបន្តអនុវត្តយ៉ាងម៉ឺងម៉ាត់ និងប្រកបដោយប្រសិទ្ធភាពខ្ពស់ថែមទៀតនូវគោលនយោបាយកែទម្រង់ស៊ីជម្រៅរបស់រដ្ឋាភិបាល។
បើតាមលោក គង់ វិបុល វិធានការណ៍ដែលអគ្គនាយកដ្ឋានពន្ធដារត្រូវអនុវត្តមានដូចជា ការចុះធ្វើបច្ចុប្បន្នភាពព័ត៌មានសហគ្រាស ពង្រឹងការចាត់ចែងលិខិតប្រកាសពន្ធ ការយកចិត្តទុកដាក់លើការអនុវត្ត E-VAT System ការធ្វើបច្ចុប្បន្នភាពព័ត៌មានអចលនទ្រព្យ និងការលើកកម្ពស់ និងបញ្ជ្រាបវប្បធម៌បង់ពន្ធជាដើម។
លោក ព្រាប កុល នាយកប្រតិបត្តិអង្គការតម្លាភាពកម្ពុជាបានប្រាប់ថា ក្នុងរយៈពេល ៣ ឆ្នាំចុងក្រោយនេះកំណែទម្រង់ពន្ធដារបានផ្តល់នូវផលល្អជាច្រើនសម្រាប់កម្ពុជា។ ជាក់ស្តែងកំណើនដែលទទួលបាននេះ គឺដោយសារតែលទ្ធផលនៃការកាត់បន្ថយអំពើពុករលួយព្រមជាមួយនឹងការអនុវត្តរបស់មន្ត្រីពន្ធដារ និងគយក៏ដូចជាដោយសារគោលនយោបាយ និងយុទ្ធសាស្ត្រប្រមូលពន្ធប្រកបដោយគណនេយ្យភាព និងតម្លាភាព។
លោកបន្តថា៖ «ការប្រមូលចំណូលពន្ធដារនៅកម្ពុជានឹងឈានដល់ចំណុចខ្ពស់ នៅពេលដែលអាជីវកម្មទាំងអស់ដែលកាន់កាប់ ឬគាំទ្រដោយមន្ត្រីមានអំណាច និងអ្នកនយោបាយបង់ពន្ធពេញលេញ»។
បើទោះបីជាអាជ្ញាធរបានខិតខំធ្វើការអប់រំ និងផ្សព្វផ្សាយជាយូរមកហើយក៏ដោយ រហូតមកដល់ពេលនេះការប្រមូលពន្ធនៅកម្ពុជាត្រូវបានគេដឹងថា នៅមានការបាត់បង់ជាច្រើនរាប់តាំងពីចំណូលពីសហគ្រាសធុនធំ មធ្យម និងតូច។
តាមក្រសួងឧស្សាហកម្ម និងសិប្បកម្មបច្ចុប្បន្ននៅកម្ពុជាមានសហគ្រាសធុនតូច និងមធ្យមចំនួនជាង ៥០ ម៉ឺន ក្នុងនោះសហគ្រាសដែលមកចុះបញ្ជីគឺមានតែ ៥ ភាគរយប៉ុណ្ណោះ៕
