អគ្គនាយកដ្ឋានពន្ធដារ (GDT)។ ហុង មិនា
ភ្នំពេញៈ អគ្គនាយកនៃអគ្គនាយកដ្ឋានពន្ធដារ (GDT) លោក គង់ វិបុល បានឱ្យដឹងកាលពីថ្ងៃព្រហស្បតិ៍ថា ស្ថាប័ននេះប្រមូលប្រាក់ចំណូលពន្ធបានប្រហែល ២,៦៩៧ ពាន់លានដុល្លារ គិតត្រឹមថ្ងៃទី ១៦ ខែធ្នូ ឬសម្រេចបាន ៩៤,៦៣ ភាគរយនៃផែនការប្រចាំឆ្នាំ បើទោះបីជាទទួលផលប៉ះពាល់ដោយសារជំងឺកូវីដ ១៩ លើសេដ្ឋកិច្ចក្នុងតំបន់ និងពិភពលោកក៏ដោយ។
លោក គង់ វិបុល បានឱ្យដឹងតាមរយៈកម្មវិធីផ្សាយពិសេសលើទំព័រហ្វេសប៊ុករបស់ GDT ថា គិតត្រឹមថ្ងៃទី ១៦ ខែធ្នូ GDT ប្រមូលប្រាក់ចំណូលពន្ធបាន ២,៦៩៧ ពាន់លានដុល្លារ ប្រៀបធៀបនឹងផែនការឆ្នាំ ២០២០ នៃផែនការដែលមានចំនួន ២,៨៥០ ពាន់លានដុល្លារ ឬ ៩៤,៦៣ ភាគរយ។
លោកថ្លែងថា៖ «ទោះបីជាយើងទទួលរងផលប៉ះពាល់ដោយសារជំងឺកូវីដ ១៩ ដែលប៉ះពាល់ដល់ក្រុមហ៊ុនក៏ដោយ ក៏ប្រាក់ចំណូលរបស់ក្រុមហ៊ុនកាលពីឆ្នាំ ២០១៩ មានលទ្ធផលល្អ ដូច្នេះពួកគេប្រកាសពន្ធក្នុងឆ្នាំ ២០២០ ធ្វើឱ្យចំណូលយើងឆ្នាំនេះក៏នៅតែល្អដែរ។ ខ្ញុំបានអង្កេតឃើញថា និន្នាការប្រាក់ចំណូលប្រចាំខែរបស់ យើងក៏នៅតែកំពុងធ្វើបានល្អដែរ ការនេះបានធ្វើឱ្យយើងទទួលបានប្រាក់ចំណូលខ្ពស់សម្រាប់ឆ្នាំនេះ»។
លោកលើកឡើងថា៖ «ដូចដែលយើងបានមើលឃើញហើយថា យើងទទួលរងផលប៉ះពាល់ដោយសារតែជំងឺកូវីដ ១៩ និងការធ្លាក់ចុះសេដ្ឋកិច្ច យើងនៅតែសម្រេចបានចំណូលជាង ៩៤,៦៣ ភាគរយនៃផែនការឆ្នាំនេះ។ ខ្ញុំគិតថា យើងនឹងសម្រេចបានតាមទិសដៅត្រឹមចុងឆ្នាំនេះដូចដែលក្រសួងសេដ្ឋកិច្ច និងហិរញ្ញវត្ថុបានកំណត់ផែនការប្រចាំឆ្នាំមកយើង»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានលើកឡើងពីប្រតិបត្តិការល្អនៃការប្រមូលប្រាក់ចំណូលនៅឆ្នាំនេះ ទោះបីជាការរីករាលដាលជំងឺកូវីដ១៩ ដែលប៉ះពាល់ដល់សេដ្ឋកិច្ចក៏ដោយ។
លោកថ្លែងថា៖ «វាមិនជាការបារម្ភអំពីការប្រមូលប្រាក់ចំណូលពន្ធនៅឆ្នាំនេះទេ។ ដូចដែលខ្ញុំបានមើលឃើញថា ការប្រមូលប្រាក់ចំណូលពន្ធ ល្អប្រសើរជាងការរំពឹងទុក ដោយសារតែយើងមើលឃើញវិស័យមួយចំនួនទៀតនៅតែដំណើរការបានល្អ»។
លោក គង់ វិបុល បានឱ្យដឹងថា ផែនការអនុវត្តឆ្នាំ ២០២១ នឹងទាបជាងលទ្ធផលឆ្នាំ ២០២០ ដោយសារតែប្រតិបត្តិការអាជីវកម្មធ្លាក់ចុះក្នុងឆ្នាំ ២០២០ ជាពិសេសនៅក្នុងវិស័យទេសចរណ៍។ ប៉ុន្តែលោកមើលឃើញថា វិស័យផ្សេងទៀត ដូចជាការដឹកជញ្ជូន និងមិនមែនកាត់ដេរកំពុងមានប្រតិបត្តិការល្អប្រសើរ។
លោកថ្លែងថា៖ «តាមផែនការប្រចាំឆ្នាំ GDT ត្រូវតែប្រមូលឱ្យបានប្រហែល ២,២៧១ ពាន់លានដុល្លារនៃផែនការអនុវត្តឆ្នាំ ២០២១ ដែលទាបជាងឆ្នាំ ២០២០ ដោយសារតែផលប៉ះពាល់ជំងឺកូវីដ១៩ ដែលប៉ះពាល់ដល់ក្រុមហ៊ុនជាច្រើន ដូច្នេះវានឹងបន្តដល់ឆ្នាំ ២០២១»។ តាមច្បាប់ពន្ធ លោកពន្យល់ថា សម្រាប់ក្រុមហ៊ុននានាដែលបានខាតបង់ប្រាក់ចំណូលក្នុងឆ្នាំ ២០២០ ពួកគេអាចបន្តទៅមុខចាប់ពី ៣ ទៅ ៥ ឆ្នាំបន្ថែមទៀត។
លោកបញ្ជាក់ថា៖ «នោះជាមូលហេតុដែលអ្នកមើលឃើញ ផែនការអនុវត្តឆ្នាំ ២០២១ នឹងទាបជាងឆ្នាំ ២០២០»។
កាលពីឆ្នាំ ២០១៩ GDT ប្រមូលប្រាក់ចំណូលពន្ធបាន ២,៨១៩ ពាន់លានដុល្លារ លើសពីទិសដៅប្រចាំឆ្នាំចំនួន ៥៣០ លានដុល្លារ ឬ ២៣,២០ ភាគរយ។ វាមានចំនួន ២៨,២៨ ភាគរយខ្ពស់ជាងចំនួន ២,១៩៧ ពាន់លានដុល្លារកាលពីឆ្នាំ ២០១៨៕ LA
