.jpg)
សកម្មភាពកម្មករកំពុងកាត់ក្រណាត់នៅក្នុងរោងចក្រកាត់ដេរមួយនៅភ្នំពេញកន្លងមក។ រូបថត ភ្នំពេញ ប៉ុស្តិ៍
ភ្នំពេញៈ ខណៈពិភពលោកបានឈានដល់បដិវត្តន៍ឧស្សាហកម្ម ៤.០ ការប្រើប្រាស់បច្ចេកវិទ្យាថ្មីៗនៅក្នុងវិស័យវាយនភណ្ឌ គឺពិតជាមានភាពចាំបាច់ណាស់ដោយវាមិនត្រឹមតែជួយកាត់បន្ថយពេលវេលា និងថវិកាប៉ុណ្ណោះទេ តែវាថែមជួយធ្វើឲ្យផលិតផលមានគុណភាពល្អថែមទៀត។
នេះជាការលើកឡើងរបស់ប្រធានប្រតិបត្តិសមាគមរោងចក្រកាត់ដេរនៅកម្ពុជា (GMAC) ក្នុងសន្និសីទស្តីពី «សូហ្វវែររោងចក្រ» ដែលរៀបចំឡើងនៅទីស្នាក់ការ GMAC កាលពីថ្ងៃម្សិលមិញ។
លោក លី តេកហេង ប្រធានប្រតិបត្តិសមាគមរោងចក្រកាត់ដេរនៅកម្ពុជា បាននិយាយថាការប្រើប្រាស់ប្រព័ន្ធសូហ្វវែរលើការត្រួតពិនិត្យ និងដំណើរការតាមខ្សែចង្វាក់ផលិតកម្មតាមរោងចក្រនីមួយៗគឺពិតជាមានភាពចាំបាច់ណាស់នៅក្នុងបរិបទនៃបដិវត្តន៍ឧស្សាហកម្មទី ៤ ។ ប្រព័ន្ធបច្ចេកវិទ្យាបាននិងកំពុងចូលរួមចំណែកយ៉ាងច្រើនក្នុងការជំរុញប្រសិទ្ធភាព និងភាពរីកចម្រើនរបស់ក្រុមហ៊ុននីមួយៗ។ លោកបន្តថាការមកដល់នៃប្រព័ន្ធសូហ្វវែររបស់ Zilingo នេះគឺអាចជាការឆ្លើយតបទៅនឹងតម្រូវការនៃការបង្កើនប្រសិទ្ធភាពនៅតាមរោងចក្រកាត់ដេរនីមួយៗ។
លោកថ្លែងថា៖ «ខ្ញុំសង្ឃឹមថា Zilingo នឹងចូលរួមចំណែកក្នុងការជួយអភិវឌ្ឍវិស័យកាត់ដេរនៅកម្ពុជាឲ្យកាន់តែលឿនបន្ថែមទៀត ខណៈដែលការប្រើប្រាស់បច្ចេកវិទ្យារីកចម្រើនផងដែរ» បើតាមលោក តេកហេង ប្រព័ន្ធសូហ្វវែររបស់ Zilingo នឹងជួយដល់រោងចក្រចាប់ផ្តើមតាំងពីការបញ្ជាទិញក្រណាត់ចូលក្នុងរោងចក្ររហូតដល់បញ្ចប់ប្រតិបត្តិការក្នុងរោងចក្រតែម្តង។
ខណៈដែលកម្ពុជាកំពុងប្រឈមនឹងការបាត់បង់ប្រព័ន្ធអនុគ្រោះពន្ធពីទីផ្សារសហគមន៍អឺរ៉ុប (EBA) ក្នុងពេលឆាប់ៗនេះលោក តេកហេង បាននិយាយថា៖ « យើងពិតជាមានការបារម្ភខ្លះ ប៉ុន្តែទោះយ៉ាងណាខ្ញុំនៅតែមានសុទិដ្ឋិនិយមថា កម្ពុជានឹងមិនមានបញ្ហាប៉ះពាល់ធ្ងន់ធ្ងរឡើយ»។
លោក យិន សូសាកុល ប្រធានផ្នែកអភិវឌ្ឍន៍អាជីវកម្មនៃក្រុមហ៊ុន Zilingo បានប្រាប់ថា នេះជាលើកដំបូងដែលក្រុមហ៊ុនលោកបាននាំយកប្រព័ន្ធសូហ្វវែរថ្មីមួយពីប្រទេសឥណ្ឌាមកផ្សព្វផ្សាយនៅកម្ពុជា។
លោកបានបន្តទៀតថា ប្រព័ន្ធ Zilingo (Zilingo Production software) នឹងផ្តល់ផលប្រយោជន៍ជាច្រើនដល់រោងចក្រកាត់ដេរ ដូចជា បង្កើនប្រសិទ្ធភាពចង្វាក់ផលិតកម្មពី ១០ ទៅ ១២ ភាគរយ ការគ្រប់គ្រងពេលវេលា និងមានទិន្នន័យច្បាស់លាស់ជួយកាត់បន្ថយកំហុសនៅលើចង្វាក់ផលិតកម្មបានពី ២០ ទៅ ៥០ ភាគរយ និងមានភាពងាយស្រួលដោយមិនចាំបាច់ធ្វើរបាយការណ៍ដោយការសរសេរលើក្រដាសទៀតឡើយ។
លោកបានអះអាងថា៖ «នេះជាលើកទី ១ ដែលក្រុមហ៊ុនយកប្រព័ន្ធនេះមកផ្សព្វផ្សាយក្នុងវិស័យវាយនភណ្ឌនៅកម្ពុជា ខណៈបច្ចុប្បន្នប្រព័ន្ធនេះកំពុងប្រើប្រាស់យ៉ាងច្រើននៅតាមរោងចក្រក្នុងប្រទេសមួយចំនួនរួចមកហើយ»។
បើតាមលោក សូសាកុល បច្ចុប្បន្នសូហ្វវែររបស់ Zilingo កំពុងត្រូវបានប្រើប្រាស់យ៉ាងទូលំទូលាយនៅប្រទេសមួយចំនួនដូចជា ដូចជា ឥណ្ឌា ស្រីលង្កា បង់ក្លាដែស ឥណ្ឌូនេស៊ី និងវៀតណាម។
បច្ចុប្បន្ននៅកម្ពុជាមានរោងចក្រកាត់ដេ រោងចក្រផលិតកាបូប និងស្បែកជើងសរុបជាង ៦០០ ក្រុមហ៊ុន៕LA
