ភ្នំពេញៈ ការផលិតស្រាពីផ្លែស្វាយកែវរមៀតរបស់សហគមន៍កសិកម្មនៅខេត្តត្បូងឃ្មុំត្រូវរំពឹងនឹងទទួលបានលទ្ធផលល្អដើម្បីឈានទៅផលិតសម្រាប់ដាក់លក់លើទីផ្សារក្នុងស្រុក ខណៈលទ្ធផលនៃការសាកល្បងនឹងត្រូវបង្ហាញនៅដើមសប្តាហ៍ក្រោយ។ នេះបើតាមប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ។
ស្រាផលិតពីផ្លែស្វាយកែវរមៀតនេះបានចាប់ផ្តើមផលិតសាកល្បងលើកដំបូងកាលពីថ្ងៃទី ៩ ខែមីនា នៅក្នុងសហគមន៍កសិកម្មសាមគ្គីតំបែរ ខេត្តត្បូងឃ្មុំ។ សហគមន៍នេះមានគ្រួសារអ្នកដាំស្វាយចំនួន ៧០ គ្រួសារ ដោយមានផ្ទៃដីដាំស្វាយកែវរមៀតប្រមាណ ១២៧ ហិកតា ស្មើនឹងប្រមាណ ៣ ម៉ឺនដើម ដែលអាចផ្តល់ទិន្នផលជាមធ្យមក្នុងរង្វង់ ៣០ តោន ក្នុង ១ ឆ្នាំ។
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំបានប្រាប់ភ្នំពេញប៉ុស្តិ៍កាលពីថ្ងៃទី ១៥ ខែមីនាថា នេះគឺជាគំនិតផ្តួចផ្តើមរបស់ថ្នាក់ដឹកនាំក្រសួងក៏ដូចជាមន្ទីរកសិកម្មខេត្តក្នុងការរិះរកវិធីសាស្ត្រដើម្បីជួយលើកតម្កើងតម្លៃបន្ថែមទៀតសម្រាប់ផលិតផលកសិកម្មដែលមានក្នុងស្រុក ក៏ដូចជាប្រាក់ចំណូលដល់ប្រជាកសិករដែលកំពុងដាំដុះស្វាយ ការបង្កើតការងារថ្មីៗ និងការប្រើវត្ថុធាតុដើមក្នុងស្រុកឱ្យអស់លទ្ធភាព។
លោកបន្តថា ការផលិតស្រាពីផ្លែស្វាយកែវរមៀតនេះនឹងត្រូវប្រើប្រាស់ពេល ១៤ ថ្ងៃ ប៉ុន្តែបន្ទាប់ពីចាប់ផ្តើមផលិតសាកល្បងកាលពីថ្ងៃទី ៩ ខែមីនា រហូតមកដល់ពេលនេះលទ្ធផលដែលទទួលបានគឺមានភាពវិជ្ជមានគួរឱ្យកត់សម្គាល់។
លោកបានថ្លែងថា៖ «បើទទួលបានលទ្ធផលល្អ ទាំងគុណភាព និងរសជាតិ ខ្ញុំនឹងខិតខំជំរុញការផលិតស្រាពីផ្លែស្វាយកែវរមៀតនេះឱ្យបានច្រើន ព្រោះនេះគឺជាការបង្កើតនូវតម្លៃបន្ថែម ១ ទៀតសម្រាប់ប្រជាកសិករដាំដុះស្វាយដែលពីមុនពឹងផ្អែកតែទៅលើការនាំចេញផ្លែស្វាយស្រស់ និងការកែច្នៃបន្តិចបន្តួច»។ លោកបន្ថែមថា បើមានការគាំទ្រច្រើនលោកនឹងជួយជំរុញឱ្យមានការផលិតលក់សម្រាប់ទីផ្សារក្នុងប្រទេសផងដែរ។
ទោះបីយ៉ាងណាលោកបញ្ជាក់ថា នេះគឺគ្រាន់តែជាជំហានដំបូងប៉ុណ្ណោះ ដោយលោក និងសហគមន៍នៅមិនទាន់បានពិភាក្សាគ្នាដើម្បីរៀបចំធ្វើផែនការអាជីវកម្មកែច្នៃស្រាស្វាយនេះឱ្យមានលក្ខណៈពាណិជ្ជកម្ម ព្រមទាំងសិក្សាស្រាវជ្រាវបច្ចេកទេសកែច្នៃស្វាយឱ្យមានលក្ខណៈស្តង់ដា (ការវេចខ្ចប់) នៅឡើយទេ។
លោក អុំ សុភា ប្រធានសហគមន៍កសិកម្មសាមគ្គីតំបែរ ខេត្តត្បូងឃ្មុំបាននិយាយថា នៅពេលរដូវប្រមូលផលម្តងៗផ្លែស្វាយតែមានបរិមាណច្រើន ដែលធ្វើឱ្យតម្លៃធ្លាក់ចុះខ្លាំង ហេតុនេះទើបលោក និងថ្នាក់ដឹកនាំមន្ទីរកសិកម្ម ពិភាក្សាគ្នាដើម្បីរៀបចំឱ្យមានអ្នកជំនាញមកជួយបណ្តុះបណ្តាលបច្ចេកទេសក្នុងការកែច្នៃផ្លែស្វាយទៅជាស្រា។
ការផលិតស្រាពីផ្លែស្វាយកំពុងទទួលការចាប់អារម្មណ៍ច្រើនពីប្រជាកសិករនៅក្នុងសហគមន៍កសិកម្មសាមគ្គីតំបែរ។ លោកបន្តថា ការផលិតសាកល្បងលើកដំបូងត្រូវបានផលិតឡើងចំនួន ១១ ធុង (ចំណុះ ២០ លីត្រ) ក្នុង ១ ធុងមានផ្លែស្វាយកែវរមៀតចំនួន ៧,៥ គីឡូក្រាម។
លោកនិយាយថា៖ «ការផលិតស្រាពីស្វាយរយៈពេល ១ អាទិត្យមកនេះមានលទ្ធផលល្អច្រើន។ យើងរំពឹងថា នៅអាទិត្យក្រោយ (១៤ ថ្ងៃ បន្ទាប់ពីចាប់ផ្តើមផលិត) ស្រាដែលយើងផលិតនឹងមានគុណភាពល្អ»។ លោកបន្ថែមថា៖ «គោលបំណងរបស់សហគមន៍គឺមិនត្រឹមតែផលិតស្រាប៉ុណ្ណោះទេ ដោយយើងក៏មានបំណងផលិតជាតំណាប់ ទឹកផ្លែស្វាយ និងចាហួយពីផ្លែស្វាយផងដែរ»។
យោងតាមលោក ពិសិដ្ឋ បច្ចុប្បន្នក្នុងខេត្តត្បូងឃ្មុំមានផ្ទៃដីដាំដុះស្វាយប្រមាណ ២ ០០០ ហិកតា ដោយក្នុង ១ ហិកតា ផ្តល់ផលប្រមាណ ៣០ តោន ក្នុង ១ ឆ្នាំ។ ផ្លែស្វាយពេលនេះមានតម្លៃប្រមាណ ២០០ រៀល ក្នុង ១ គីឡូក្រាម (ប្រហែលឆ្នាំមុន) ហើយភាគច្រើនត្រូវនាំចេញទៅវៀតណាម។
យោងតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កម្ពុជាបាននាំចេញផ្លែស្វាយស្រស់ចំនួន ៤៣ ៦៨០ តោន កាលពីឆ្នាំ ២០២០។ ចិន ថៃ វៀតណាម រុស្ស៊ី បារាំង និងកូរ៉េខាងត្បូង គឺជាទីផ្សារធំសម្រាប់ផ្លែស្វាយពីកម្ពុជា៕ LA