.jpg)
ផ្ទាំងថាមពលពន្លឺព្រះអាទិត្យ (សូឡា) ដែលដាក់ប្រើដោយប្រជាពលរដ្ឋនៅទីក្រុងភ្នំពេញ។ ភ្នំពេញ ប៉ុស្តិ៍
ភ្នំពេញៈ បរិមាណផ្គត់ផ្គង់ថាមពលស្អាតនៅកម្ពុជា នឹងមានការកើនឡើងជាបន្តបន្ទាប់ ខណៈដែលគម្រោងវិនិយោគលើការដំឡើងរោងចក្រផលិតថាមពលអគ្គិសនីដើរដោយប្រព័ន្ធពន្លឺព្រះអាទិត្យមានកាន់តែច្រើន ហើយវិនិយោគិនថ្មីៗមួយចំនួនកំពុងចាប់អារម្មណ៍លើដំណើរការថាមពលថ្មីនេះ។ នេះបើយោងតាមអ្នកនាំពាក្យក្រសួងរ៉ែ និងថាមពល។
លោក វិចទ័រ ហ្សូនា អ្នកនាំពាក្យក្រសួងរ៉ែ និងថាមពល បានឲ្យដឹងកាលពីម្សិលមិញថា បន្ទាប់ពីក្រុមហ៊ុន Sunseap Group ដែលជាក្រុមហ៊ុនផ្គត់ផ្គង់ថាមពលមានមូលដ្ឋាននៅសិង្ហបុរី ប្រតិបត្តិការកសិដ្ឋានសូឡាទ្រង់ទ្រាយធំលើកដំបូងនៅកម្ពុជារួចមក មានវិនិយោគិនកាន់តែច្រើនបង្ហាញចំណាប់អារម្មណ៍របស់ពួកគេក្នុងការដាក់ការវិនិយោគនៅក្នុងអាជីវកម្មនេះ។
លោកថ្លែងថា នៅឆ្នាំមុន មន្ដ្រីក្រសួងរ៉ែ និងថាមពលបានចុះកិច្ចព្រមព្រៀងជាមួយក្រុមហ៊ុន SchneiTec Group ដើម្បីសាងសង់រោងចក្រថាមពលសូឡា ៦០ មេហ្គាវ៉ាត់ នៅខេត្តកំពង់ស្ពឺ ហើយរំពឹងថានឹងដំណើរការចុងឆ្នាំនេះ។
លោកបានបន្ថែមថា រោងចក្រថាមពលសូឡាមួយផ្សេងទៀតក្នុងខេត្តកំពង់ឆ្នាំងរំពឹងថា នឹងចាប់ផ្ដើមការសាងសង់នៅឆ្នាំនេះ ខណៈរោងចក្រនេះទទួលបានជំនួយបច្ចេកទេសពីធនាគារអភិវឌ្ឍន៍អាស៊ី (ADB) ហើយធនាគារនេះបានបញ្ចប់ការសិក្សាសមិទ្ធិលទ្ធភាពរួចហើយ និងត្រៀមបើកដំណើរការដេញថ្លៃ។
លោកថ្លែងថា៖ «ធនាគារ ADB បានធ្វើការសិក្សាសមិទ្ធិលទ្ធភាពហើយ បានធ្វើរៀបចំឯកសាររួចហើយសម្រាប់ការដេញថ្លៃ និងរៀបចំផែនការបើកដំណើរការ ដេញថ្លៃ [នៅខែកុម្ភៈ]។ គម្រោងដែលលើកឡើងខាងលើទាំង ៣ នេះ គឺជាគម្រោងពិតប្រាកដ និងអាចសម្រេចបាន»។
លោក ហ្សូនា បានឲ្យដឹងថា ក្រុមវិនិយោគិនជាច្រើន បានមកចរចាជាមួយមន្ដ្រីអំពីការវិនិយោគដែលអាចធ្វើឡើងក្នុងការបង្កើតកសិដ្ឋានសូឡានៅកម្ពុជា ប៉ុន្តែការវិនិយោគទាំងនេះកំពុងស្ថិតក្នុងការពិភាក្សាបឋមនៅឡើយ ហើយមិនទាន់មានការយល់ព្រមជាផ្លូវការនៅឡើយទេ ក្រៅតែពីគម្រោងទាំង ៣ ដែលលើកឡើងខាងលើនេះ។
មានសេចក្តីរាយការណ៍កាលពីថ្ងៃម្សិលមិញថា ក្រុមហ៊ុន Gideon Group ដែលជាក្រុមហ៊ុនហិរញ្ញវត្ថុពិភពលោកមានមូលដ្ឋាននៅសហរដ្ឋអាមេរិក បានផ្ដល់មូលនិធិសម្រាប់គម្រោងថាមពលសូឡាតម្លៃ ៤៨៨ លានដុល្លារនៅទីក្រុងភ្នំពេញ ប្រទេស កម្ពុជា គម្រោងថាមពលសូឡា Kandal Solar Power ទំហំ ១៣៥ មេហ្គាវ៉ាតនេះ ត្រូវបានអភិវឌ្ឍដោយក្រុមហ៊ុន Inner Renewable Energy (Cambodia) (IREC) ដោយមានការគាំទ្រពីរដ្ឋាភិបាល។
ប៉ុន្តែលោក ហ្សូនា បានឲ្យដឹងកាលពីម្សិលមិញថា មន្ដ្រីរបស់ក្រសួងរ៉ែនិងថាមពល មិនដែលសម្រេចបានកិច្ចព្រមព្រៀងណាមួយជាមួយក្រុមហ៊ុននេះទេ។ លោកបានបន្ថែមថា ជាទូទៅមុនពេលសម្រេចបានកិច្ចព្រមព្រៀងក្នុងការវិនិយោគ។
លោកថ្លែងថា៖ «ខ្ញុំគិតថា ក្រុមហ៊ុននេះមិនទាន់រកបានអ្នកទិញណាមួយនៅឡើយទេ និងមិនមានការសិក្សាជាក់លាក់លើរោងចក្រនេះនៅឡើយដែរ»។ លោកបន្តថា៖ «ជាទូទៅ ដើម្បីឲ្យគម្រោងមួយត្រូវបានវិនិយោគ ចាំបាច់ត្រូវមានការសិក្សាជាក់លាក់ និងការសម្រេចបានកិច្ចព្រមព្រៀងក្នុងការអនុវត្តគម្រោង កិច្ចព្រមព្រៀងទិញ និងលក់ជាមួយអគ្គិសនីកម្ពុជា ឬអ្នកទិញផ្សេងទៀត»៕ LA
