ភ្នំពេញៈ នាយករដ្ឋមន្ដ្រី ហ៊ុន សែន បានឲ្យដឹងថា ការផ្គត់ផ្គង់វត្ថុធាតុដើមសម្រាប់វិស័យកាត់ដេរ និងស្បែកជើងរបស់ប្រទេសកម្ពុជាពីប្រទេសចិនបានមកដល់កម្ពុជាហើយកាលពីថ្ងៃចន្ទ បន្ទាប់ពីវិស័យនេះបានរងផលប៉ះពាល់យ៉ាងខ្លាំងដោយសារការរីករាលដាលកូវីដ ១៩។
លោកនាយករដ្ឋមន្ដ្រី ហ៊ុន សែន បានឲ្យដឹងកាលពីម្សិលមិញថា កប៉ាល់ចំនួន ៧ ដែលដឹកវត្ថុធាតុដើមកាត់ដេរពីប្រទេសចិនបានមកដល់កំពង់ផែសមុទ្ររបស់កម្ពុជាកាលពីថ្ងៃចន្ទ ដើម្បីផ្គត់ផ្គង់រោងចក្រនៅក្នុងពេលកំពុងប្រឈមនឹងការខ្វះខាត។
សេចក្ដីប្រកាសនេះត្រូវបានធ្វើឡើងនៅក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ ៥៥ ក្នុងខេត្តពោធិ៍សាត់ភ្ជាប់ទៅព្រំដែនថ្មដា និងពិធីបើកការដ្ឋានសាងសង់ផ្លូវជាតិលេខ ១០ ភ្ជាប់ពីសំឡូតទៅកោះកុងកាលពីថ្ងៃចន្ទ។
លោក ហ៊ុន សែន បានឲ្យដឹងថា នាវា ៥ ក្នុងចំណោមនាវា ៧ នឹងមកដល់កំពង់ផែក្រុងព្រះសីហនុ ខណៈ ២ ទៀតបានមកដល់ហើយនៅកំពង់ផែសមុទ្រទីក្រុងហូជីមិញរបស់ប្រទេសវៀតណាម ដោយសារតែវាជិតនឹងតំបន់សេដ្ឋកិច្ចពិសេសស្វាយរៀង។
លោកថ្លែងថា៖ «នេះជាព័ត៌មានដ៏ល្អសម្រាប់កម្មករកាត់ដេរ។ ចង្វាក់ផលិតនឹងបន្ត កម្មករនឹងបន្តធ្វើការងារដូចធម្មតា។ បន្ទាប់ពីរោងចក្រជាច្រើនមានវត្ថុធាតុដើមគ្រប់គ្រាន់ ហើយវានឹងត្រឡប់ទៅរកភាពធម្មតាវិញ ដូច្នេះសូមកុំភ័យខ្លាចអី»។
លោកឲ្យដឹងថា ប្រទេសចិននឹងដឹកជញ្ជូនវត្ថុធាតុដើមមកប្រទេសកម្ពុជា ចាប់ពីខែមីនារហូតដល់ខែឧសភា ឆ្នាំនេះ។
លោកបន្តថា៖ «ខ្ញុំសូមថ្លែងអំណរគុណដល់រដ្ឋាភិបាលចិន ដែលនាវាដឹកកុងតឺន័រ ៧ ដឹកវត្ថុធាតុដើមសម្រាប់រោងចក្រនៅក្នុងប្រទេសកម្ពុជា»។
លោក លូ គឹមឈន់ អគ្គនាយកកំពង់ផែស្វយ័តក្រុងព្រះសីហនុ (PAS) កាលពីថ្ងៃចន្ទបានប្រាប់ភ្នំពេញប៉ុស្ដិ៍ថា នាវាដឹកកុងតឺន័រគ្រោងនឹងមកដល់នៅថ្ងៃចន្ទ។
លោកបានថ្លែងថា៖ «ប្រទេសចិនបានចាប់ផ្ដើមផ្គត់ផ្គង់វត្ថុធាតុដើមកាត់ដេរ និងស្បែកជើងដល់ប្រទេសកម្ពុជា។ ខ្ញុំមានសុទិដិ្ឋនិយមថា ចង្វាក់ផ្គត់ផ្គង់វត្ថុធាតុដើមមកពីប្រទេសចិននឹងកើនឡើងនៅពាក់កណ្ដាលខែមីនា»។
កាលពីថ្ងៃទី ២៦ ខែកុម្ភៈ ក្រសួងការងារ និងបណ្ដុះបណ្ដាលវិជ្ជាជីវៈបានឲ្យដឹងថា យ៉ាងហោចណាស់រោងចក្រ ១០ បានដាក់ឯកសារសុំផ្អាកដំណើរការបណ្ដោះអាសន្ន ដោយសារតែការផ្គត់ផ្គង់វត្ថុធាតុដើមពីប្រទេសចិនអស់ដែលអាចប៉ះពាល់ដល់ជីវភាពរស់នៅរបស់កម្មករ ៣០០០ នាក់ ខណៈរោងចក្រប្រហែល ២០០ ផ្សេងទៀតនឹងរៀបចំឯកសារសុំផ្អាកការងារនៅក្នុងខែនេះ បើមិនមានការផ្គត់ផ្គង់។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងកាលពីថ្ងៃចន្ទថា វិធានការនេះនឹងជួយរក្សាចង្វាក់ផ្គត់ផ្គង់ និងសមត្ថភាពប្រកួតប្រជែងរបស់កម្ពុជា។
លោកថ្លែងថា៖ «វាជាសញ្ញាដ៏ល្អមួយ ក្រុមហ៊ុនជាច្រើននឹងរក្សាចង្វាក់ផ្គត់ផ្គង់របស់ពួកគេ ហើយកម្មករនឹងត្រឡប់ទៅធ្វើការងារវិញ។ ខ្ញុំគិតថា កង្វះវត្ថុធាតុដើមនឹងត្រូវស្ដារឡើងវិញពេលអនាគត»។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានប្រាប់ភ្នំពេញប៉ុស្ដិ៍កាលពីសប្ដាហ៍មុនថា ផលប៉ះពាល់ជាសំខាន់គឺការអាក់ខានចង្វាក់ផ្គត់ផ្គង់ដែលប្រហែល ៦០ ភាគរយនៃវត្ថុធាតុដើមមកពីប្រទេសចិន។
លោកថ្លែងថា៖ «ផលប៉ះពាល់សំខាន់ដែលយើងនឹងមើលឃើញពីខែមីនា និងខែមេសា បើស្ថានការណ៍នៅចិន មិនកែលម្អគឺថារោងចក្រជាច្រើននៅទីនេះនឹងអស់ក្រណាត់។ ជាលទ្ធផល ពួកគេនឹងត្រូវតែផ្អាកប្រតិបត្តិការជាបណ្ដោះអាសន្ន»។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករបានថ្លែងថា៖ «ការដឹកជញ្ជូនទំនិញគឺជាផ្នែកដ៏សំខាន់នៃយុទ្ធសាស្ដ្ររបស់យើង»។
លោកបន្តថា ការផ្គត់ផ្គង់ វត្ថុធាតុដើមចិនដើម្បីបម្រើវិស័យកាត់ដេរកម្ពុជា ហាក់ដូចជាស្ទុះងើបឡើងវិញ ដែលជាសញ្ញាដ៏ល្អសម្រាប់រោងចក្រជាច្រើននៅក្នុងប្រទេសកម្ពុជា។
លោកបញ្ជាក់ថា៖ «ជាមួយគ្នានេះទំនិញនាំចូលសម្រាប់ការប្រើប្រាស់លក្ខណៈពាណិជ្ជកម្មនៅក្នុងទីផ្សារក្នុងស្រុកកំពុងស្ទុះងើបឡើងវិញជាបណ្ដើរៗ» ។ លោកបន្តថា៖ «នេះជាសញ្ញាដ៏ល្អមួយដែលយើងនឹងបន្តត្រួតពិនិត្យ»៕LA
វីដេអូ៖