.jpg)
បុគ្គលិកកំពុងឈរនៅតុផ្តល់ព័ត៌មាននៃផ្សារមូលបត្រកម្ពុជានាពេលកន្លងមក។ ហេង ជីវ័ន
ភ្នំពេញៈ មន្ត្រីផ្សារមូលបត្រកម្ពុជា (CSX) បានឲ្យដឹងថា ការផ្ទុះវីរុសកូរ៉ូណាប្រភេទថ្មីពីប្រទេសចិនបានធ្វើ-ឲ្យមានផលប៉ះពាល់លើការជួញដូរភាគហ៊ុននៅកម្ពុជា ខណៈក្រុមវិនិយោគិនជនជាតិចិនមានជាង ១០ ភាគរយ។
កាលពីល្ងាចថ្ងៃចន្ទ ប្រទេសកម្ពុជាបានរកឃើញវីរុសកូរ៉ូណាប្រភេទថ្មីលើបុរសជនជាតិចិនម្នាក់នៅខេត្តព្រះសីហនុដែលធ្វើដំណើរមកពីទីក្រុងវូហាន ជាកន្លែងដែលផ្ទុះវីរុសនេះ។
យោងតាម CSX ក្នុងចំណោមក្រុមវិនិយោគិននៅក្នុងផ្សារមូលធនកាលពីឆ្នាំមុនជនជាតិចិនស្ថិតក្នុងចំណោម ក្រុមវិនិយោគិនឈានមុខគេទាំង ៥ ដែលមានចំនួន ១៣ ភាគរយ និងវិនិយោគិនក្នុងស្រុកមានចំនួន ៦៦ ភាគរយ។
លោក Jong Weon HA អ្នកយុទ្ធសាស្ដ្រទីផ្សារ និងជាប្រធានប្រតិបត្តិការក្រុមហ៊ុន CSX បានប្រាប់ភ្នំពេញ-ប៉ុស្ដិ៍ថា ការផ្ទុះវីរុសកូរ៉ូណានៅពេលថ្មីៗ បានប៉ះពាល់ដល់ទីផ្សាររបស់កម្ពុជា និងផ្សារហ៊ុនពិភពលោកទាំងមូល។ សម្រាប់ការជួញដូរនៅថ្ងៃអង្គារមានភាគហ៊ុន ១ ៧១៧ ប៉ុណ្ណោះដែលត្រូវបានជួញដូរនៅលើ CSX ខណៈសន្ទស្សន៍ CSX បានបិទការជួញដូរជាមួយនឹងការធ្លាក់ចុះ ២៣ ពិន្ទុ ឬ ៣ ភាគរយ។
លោកបន្តថា ជាមួយគ្នានេះដែរផ្សារហ៊ុនពិភពលោកក៏បានធ្លាក់ចុះយ៉ាងខ្លាំងផងដែរកាលពីថ្ងៃចន្ទ ឧទាហរណ៍ផ្សារហ៊ុន The Stoxx 600 ដែលតាមដានភាគហ៊ុនអឺរ៉ុបបានធ្លាក់ចុះជាង ២ ភាគរយ ខណៈផ្សារហ៊ុន Dow Jones Industrial Average របស់អាមេរិកបានធ្លាក់ចុះ ៣៨៤ ពិន្ទុ ឬ ១,៣ ភាគរយ។
ផ្សារហ៊ុន 30-stock Dow បានធ្លាក់ចុះរយៈពេលខ្លីជាង ៥០០ ពិន្ទុ កាលពីព្រឹកថ្ងៃពុធ។ ខណៈទីផ្សារភាគច្រើននៅអាស៊ីត្រូវបានបិទការជួញដូរ សម្រាប់ការបុណ្យចូលឆ្នាំចិន។ ផ្សារហ៊ុន Nikkei 225 របស់ប្រទេសជប៉ុនបានធ្លាក់ចុះជាង ២ ភាគរយ ខណៈផ្សារហ៊ុន SET Index របស់ប្រទេសថៃបានធ្លាក់ចុះ ២,៨៩ ភាគរយ។
លោកថ្លែងថា៖ «ក្រុមវិនិយោគិនជនជាតិចិន និងតៃវ៉ាន់ជាអ្នកជួញដូរបរទេសឈានមុខគេនៅ CSX នៅក្នុងរយៈពេល ៦ ឆ្នាំដំបូង លុះមកដល់ឆ្នាំ ២០១៨ និងឆ្នាំ ២០១៩ ក្រុមវិនិយោគិនជប៉ុនបានក្លាយជាអ្នកជួញដូរឈានមុខគេទី ១ និងថៃអ្នកជួញដូរឈានមុខគេទី ២»។
លោកបន្តថាកាលពីឆ្នាំ ២០១៩ វិនិយោគិនជប៉ុនបានជាប់ចំណាត់ថ្នាក់ទី ១ ថៃជាប់ចំណាត់ថ្នាក់ទី ២ និងចិនជាប់ចំណាត់ថ្នាក់ទី ៣ ជាមួយចំណែកនៃការជួញដូរបរទេសសរុបជប៉ុន ៩០ ភាគរយ ថៃ ៥ ភាគរយ និងចិន ២ ភាគរយ។ លោកបន្ថែមថា៖ «យើងកំពុងព្យាយាមក្នុងការធ្វើពិពិធកម្មលើក្រុមវិនិយោគិនបរទេសរបស់យើងដោយការបង្កើនមូលដ្ឋានវិនិយោគិនរបស់យើងដល់ប្រទេសផ្សេងៗនៅក្នុងតំបន់បណ្ដាប្រទេសអាស៊ានបូក ៣»។
លោកថ្លែងថា៖ «ខ្ញុំគិតថា ផ្សារហ៊ុនរបស់យើងមិនត្រូវបានរងប៉ះពាល់ដោយសារតែពាណិជ្ជករជនជាតិចិននោះទេ ប៉ុន្តែក៏រងផលប៉ះពាល់ដោយសារវិនិយោគិនក្នុងស្រុកដែលបារម្ភបន្ទាប់ពីអ្នកជំងឺដំបូងនៅកម្ពុជាផងដែរ។ នេះជាកាលៈទេសៈដែលមិនអាចគ្រប់គ្រងបាន។ គ្រប់ផ្សារហ៊ុនត្រូវតែប្រឈមនឹងបញ្ហានេះ»។
លោកបន្តថា៖ «ទន្ទឹមនឹងនេះវាអាចជាឱកាសដ៏ល្អមួយក្នុងការទិញភាគហ៊ុនមួយចំនួនរបស់ក្រុមហ៊ុនល្អៗ ដោយមានការបញ្ចុះតម្លៃសម្រាប់ក្រុមវិនិយោគិនផ្សេងទៀតផងដែរ»។
យោងតាម SECC កាលពីឆ្នាំ ២០១៩ ទីផ្សារមូលធនបានកើនឡើង ១៥៧ ភាគរយដល់ ៨០០,៣៩ លានដុល្លារ។ បច្ចុប្បន្នមានក្រុមហ៊ុន ៥ ចេញភាគហ៊ុន និងក្រុមហ៊ុន ៣ ចេញប័ណ្ណបំណុលដែលបានប្រមូលនិធិសរុបរហូតដល់ ១៥១ លានដុល្លារ។ ចំនួនក្រុមវិនិយោគិនបានកើនឡើងដល់ ២២ ៣៣៨ នាក់ក្នុងនោះ ១៧ ភាគរយជាជនបរទេស។
របាយការណ៍បង្ហាញថា ទំហំការជួញដូរជាមធ្យមមានចំនួន ១៧៥០ ៥០២ ភាគហ៊ុនក្នុង ១ ខែស្មើនឹង ៤ ២២១ ៤៩០ ដុល្លារក្នុង ១ ខែ៕LA
