ភ្នំពេញៈ លោកនាយករដ្ឋមន្ដ្រី ហ៊ុន សែន នឹងចេញដំណើរទៅចូលរួមកិច្ចប្រជុំកំពូលឥណ្ឌាអាស៊ាន ដែលរៀបចំឡើងនៅទីក្រុងញូវដែលី នៅថ្ងៃនេះ ក្នុងគោលបំណងបង្កើនកិច្ចសហប្រតិបតិ្តការ និងពង្រីកភាពជាដៃគូពាណិជ្ជកម្មជាមួយប្រទេសដែលមានសេដ្ឋកិច្ចឈានមុខគេទី៧របស់ពិភពលោកមួយនេះ។
កិច្ចប្រជុំកំពូលនេះធ្វើឡើង ខណៈកម្ពុជាបានអនុម័តកិច្ចព្រមព្រៀងពាណិជ្ជកម្មរវាងអាស៊ាន និងឥណ្ឌា កាលពីថ្ងៃទី១៥ ខែមករា ដែលស្វែងរកការជួយសម្រួលបន្ថែមទៀតលើកិច្ចព្រមព្រៀងរវាងប្រទេសទាំងពីរនេះ ជាពិសេសក្នុងវិស័យទូរគមនាគមន៍ វិស័យសំណង់ និងវិស័យទេសចរណ៍។
លោក ហ៊ុន សែន ត្រូវបានគ្រោងនឹងថ្លែងសុន្ទរកថាដ៏សំខាន់មួយនៅក្នុងកិច្ចប្រជុំពាណិជ្ជកម្មឥណ្ឌាកម្ពុជា ក្នុងអំឡុងពេលជំនួបកំពូលនៅក្នុងទីក្រុងរបស់ប្រទេសឥណ្ឌានេះ។
ទិន្នន័យរដ្ឋាភិបាលឥណ្ឌាបានបង្ហាញថា ពាណិជ្ជកម្មរវាងប្រទេសទាំង២បានជួបការពិបាកដោយសារភាពយឺតយ៉ាវ ខណៈវាបានធ្លាក់ចុះជិត៣០ភាគរយមកនៅត្រឹម១៤១លានដុល្លារ ក្នុងអំឡុងឆ្នាំសារពើពន្ធមុនរបស់ប្រទេសឥណ្ឌា ដែលបានដំណើរការចាប់ពីខែមេសាឆ្នាំ២០១៦ ដល់ខែឧសភាឆ្នាំ ២០១៧។ ចំនួននោះគឺកម្រិតទាបបំផុតចាប់តាំងពីឆ្នាំសារពើពន្ធ ២០១២-២០១៣។
«ការជួញដូរទំនិញរវាងប្រទេសឥណ្ឌា និងអាស៊ានមិនសំខាន់ខ្លាំងនោះទេនៅពេលបច្ចុប្បន្ន មួយផ្នែកដោយសារតែភូមិសាស្ដ្រ និងមួយផ្នែកទៀតដោយសារតែគោលនយោបាយគាំពារនិយមជាទូទៅរបស់ប្រទេសឥណ្ឌា»។ នេះបើយោងតាមលោក Miguel Chanco អ្នកវិភាគអាស៊ានជាន់ខ្ពស់នៅក្រុមហ៊ុន Economist Intelligence Unit ( EIU)។
លោក Chanco បន្តថា ការធ្លាក់ចុះពាណិជ្ជកម្មទ្វេភាគីទំនងជាដោយសារតែកំណើនសេដ្ឋកិច្ចយឺតរបស់ប្រទេសឥណ្ឌា ហើយទំនងជានឹងមិនកើនឡើងនោះទេនៅពេលអនាគតដ៏ខ្លីនេះ។
លោកថ្លែងថា៖ «ការប៉ាន់ប្រមាណកំណើនសេដ្ឋកិច្ចបច្ចុប្បន្នរបស់ EIU សម្រាប់ប្រទេសឥណ្ឌា ក្នុងឆ្នាំសារពើពន្ធ២០១៧ ឆ្នាំ២០១៨ នឹងធ្លាក់ចុះបន្តទៀត ដូច្នេះខ្ញុំនឹងមិនមានការភ្ញាក់ផ្អើលនោះទេ ប្រសិនបើពាណិជ្ជកម្មរបស់ប្រទេសនេះជាមួយកម្ពុជានៅតែខ្សោយក៏ដោយ»។
លោកបន្ថែមថា មូលហេតុផ្សេងទៀតសម្រាប់ពាណិជ្ជកម្មខ្សោយគឺថា ទាំងប្រទេសឥណ្ឌា និងកម្ពុជាភាគច្រើននាំចេញផលិតផលដូចគ្នា ដូចជាអង្ករ និងវាយនភ័ណ្ឌ។
លោក សៀង ថាយ អ្នកនាំពាក្យក្រសួងពាណិជ្ជកម្មកម្ពុជាបានថ្លែងថា មានការវិនិយោគរបស់ប្រទេសឥណ្ឌាបន្តិចបន្តួចនៅក្នុងប្រទេសកម្ពុជា ហើយពាណិជ្ជកម្មជារួមនៅមានកម្រិតរវាងប្រទេសទាំងពីរ មួយផ្នែកដោយសារតែប្រទេសឥណ្ឌាមានភូមិសាស្ដ្រឆ្ងាយ អាស្រ័យហេតុនេះការធ្វើពាណិជ្ជកម្មមានតម្លៃខ្ពស់ជាងប្រទេសជិតខាងអាស៊ានរបស់ប្រទេសកម្ពុជា។
លោកបានថ្លែងថា៖ «យើងសង្ឃឹមថា ការមានការចរចាទាំងនេះនឹងអាចឲ្យយើងដោះស្រាយឧបសគ្គណាមួយដែលអាចរារាំងដល់ទំនាក់ទំនងពាណិជ្ជកម្មដែលអាចកើតឡើង និងដើម្បីស្វែងរកដំណោះស្រាយសមស្របក្នុងការពង្រឹងបន្ថែមទៀតលើពាណិជ្ជកម្ម និងការវិនិយោគទ្វេភាគី»។
លោក ថាយ បន្ថែមថា ភាគច្រើននៃផលិតផលរបស់ប្រទេសឥណ្ឌា មកកាន់ប្រទេសកម្ពុជាគឺថ្នាំពេទ្យ ឬផលិតផលជាប់ទាក់ទងនឹងសុខភាព ខណៈទិន្នន័យធនាគារពិភពលោកបង្ហាញថា ការនាំចេញដ៏សំខាន់របស់ឥណ្ឌាមកកម្ពុជាមានដូចជាប្រភេទវាយនភ័ណ្ឌជាដើម៕ LA