ភ្នំពេញ: រដ្ឋមន្ត្រីក្រសួងពាណិជ្ជកម្មស្នើឱ្យគណៈកម្មាធិការជាតិគ្រប់គ្រងកម្មសិទ្ធិបញ្ញា (គ.ក.ប.) បង្កើនកិច្ចខិតខំក្នុងការលើកកម្ពស់ការគ្រប់គ្រងកម្មសិទ្ធិបញ្ញាឱ្យកាន់តែមានប្រសិទ្ធភាពដើម្បីអភិវឌ្ឍប្រព័ន្ធកម្មសិទ្ធិបញ្ញាជាតិ និងឈានឆ្ពោះទៅការធ្វើសមាហរណកម្មពាណិជ្ជកម្មជាអន្តរជាតិ។
សំណើនេះបានធ្វើឡើងក្នុងកិច្ចប្រជុំគណៈកម្មាធិការជាតិគ្រប់គ្រងកម្មសិទ្ធិបញ្ញាលើកទី ១០ កាលពីថ្ងៃអង្គារ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានលើកឡើងថា ស្ថាប័នពាក់ព័ន្ធទាំងអស់ត្រូវបន្តពង្រឹងប្រព័ន្ធកម្មសិទ្ធិបញ្ញាតាមរយៈការរៀបចំ និងអនុវត្តឱ្យមានប្រសិទ្ធភាពនូវផែនការការងារកម្មសិទ្ធិបញ្ញា ៣ ឆ្នាំ (២០២១-២០២៣) និងផែនការយុទ្ធសាស្ត្រជាតិ កម្មសិទ្ធិបញ្ញា ឆ្នាំ ២០២១-២០២៦ ដើម្បីសំដៅដល់ការអភិវឌ្ឍប្រព័ន្ធកម្មសិទ្ធិបញ្ញាជាតិឱ្យកាន់តែរឹងមាំ និងស្របតាមស្តង់ដាកម្មសិទ្ធិបញ្ញាអន្តរជាតិ។
លោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញា ក្រសួងពាណិជ្ជកម្ម ធ្លាប់ប្រាប់ភ្នំពេញ-ប៉ុស្តិ៍ថា អ្នកវិនិយោគក្នុងស្រុកមានការយល់ដឹងច្រើនជាងមុនពីកម្មសិទ្ធិបញ្ញា។ លោកថ្លែងថា៖ «ការចុះបញ្ជីម៉ាកពាណិជ្ជកម្មបានត្រឹមត្រូវនឹងជួយធានាមិនឱ្យមានជម្លោះ និងការពារដល់ម្ចាស់ម៉ាកដើម ជាពិសេសធានាឱ្យមានការប្រកួតប្រជែងដោយសេរី និងយុត្តិធម៌»។
របាយការណ៍ក្រសួងពាណិជ្ជកម្មបង្ហាញថា ការចុះបញ្ជីម៉ាកពាណិជ្ជកម្មទាំងក្រុមហ៊ុនក្នុងស្រុក និងក្រុមហ៊ុនបរទេសមានចំនួន ៣ ៨៤១ កាលពីឆ្នាំ ២០១៩ កើនឡើង ២,១៣ ភាគរយធៀបនឹងឆ្នាំ ២០១៨ ដែលមានចំនួន ៣ ៧៦១។ ក្នុងនោះការចុះបញ្ជីម៉ាកក្រុមហ៊ុនក្នុងស្រុកមានចំនួន ១ ៤៤៥ និងក្រុមហ៊ុនបរទេស ២ ៣៩៦៕ LA